“Distaem Mi Savve Wanem Nao Sik Bilong Mi!”

HEM nao feeling bilong wanfala man long Tokyo taem hem readim datfala laef story long December 1, 2000, Wastaoa. Datfala article garem title “Iufala No Savve Wanem Nao Bae Happen Tumoro,” and hem storyim experience bilong wanfala man wea missionary bifor and wea safa long wanfala sik wea olketa long medical kolem manic-depressive psychosis.

Datfala man long Tokyo hem raetem leta long olketa wea pablisim disfala magasin and hem sei: “Olketa samting wea kasem datfala man barava kasem mi tu. So mi go long wanfala psychiatric hospital and mi faendemaot hao mi garem manic depression. Doctor wea mi lukim hem barava sapraes. Hem sei, ‘klosap evritaem pipol wea garem disfala sik no tingse olketa sik.’ Mi kasem help for luksavve mi garem disfala sik bifor hem kamap big tumas.”

Planti million pipol raonem full world kasem planti gudfala samting from olketa evritaem readim Wastaoa and Wekap! magasin. Olketa faendem hao olketa article garem gudfala information and mekem man feel satisfae. Distaem olketa printim Wastaoa magasin long 141 languis, and olketa pablisim Wekap! long 86 languis. Bae iu enjoyim tu wei for readim Wastaoa and Wekap! evritaem.