Kwestin From Reader

Hao nao olketa putim tufala stik for karem ark bilong covenant, bikos 1 Kings 8:8 showaot olketa savve lukim from Holy rum?

Taem Jehovah givim Moses plan bilong tabernacle long wilderness, wanfala main part bilong hem nao ark bilong covenant. Disfala box wea sheip hem olsem rectangle and kava witim gold, garem tufala tablet bilong Law and olketa nara samting insaed. Olketa keepim long rum barava insaed, datfala Most Holy rum. Antap long kava bilong Ark tufala angel stap witim wing wea go aot front long olketa. Long each saed bilong Ark, olketa ring stap mekem olketa savve karem witim tufala stik, wea olketa wakem from acacia wood and kavarem witim gold. So iumi fit for sei tufala stik go thru long olketa ring hia followim long bilong Ark. So, taem Ark stap long ples bilong hem insaed Most Holy bilong tabernacle, wea feis go long east, tufala stik point north-south. Long temple wea Solomon buildim tu position bilong Ark hem olsem.—Exodus 25:10-22; 37:4-9; 40:17-21.a

Wanfala curtain hem separatem Most Holy rum from Holy rum (datfala rum aotsaed from Most Holy). Olketa priest insaed Holy rum no savve luk go insaed Most Holy rum and lukim datfala Ark, wea antap long hem nao God savve showim hemseleva. (Hebrews 9:1-7) So, 1 Kings 8:8 maet konfiusim man: “Tufala stik long tumas, mekem man savve lukim tufala end bilong hem from Holy rum wea stap front long barava rum insaed, bat olketa no savve lukim from aotsaed.” Disfala sem point stap tu long 2 Chronicles 5:9. Hao nao man savve lukim tufala stik from Holy rum bilong temple?

Samfala sei tufala stik hia tasim curtain, wea mekem man lukim sheip bilong hem long curtain. Bat diswan hard for happen sapos tufala stik stap long position wea point north-south and curtain stap saedem tufala. (Numbers 3:38) Wanfala reason wea moa balance hem stap. Man savve lukim tufala stik sapos spes stap midolwan curtain and wall bilong temple or taem hae priest go insaed Most Holy rum. Datfala curtain bae blokem man for no lukim Ark, bat tufala stik hia wea long savve showaot thru long datfala spes. Nomata disfala reason hem saond stret, iumi kanduit bighed for sei hem tru evribit.

Hem klia hao staka samting stap yet for iumi lanem. Aposol Paul talem tu-thri samting abaotem diswan long leta bilong hem for olketa Hebrew. Then hem sei: “Distaem hem no taem for storyim evri information abaotem olketa samting hia.” (Hebrews 9:5) Resurrection bilong olketa faithful wan wea bae kamap shud givim iumi nambawan chance for savve from olketa man olsem Moses, Aaron, Bezalel, and olketa narawan savve long barava plan and waka wea olketa duim insaed tabernacle.—Exodus 36:1.

[Footnote]