Report Bilong Olketa wea Talemaot Kingdom
Olketa Martyr Bilong Distaem Givim Witness Long Sweden
Greek word for “witness” hem martyr, wea English word “martyr” kam from hem and wea minim “man wea givim witness from dae bilong hem.” Planti Christian long First-century givim witness abaotem Jehovah taem olketa dae for faith bilong olketa.
Olsem tu, long mek-20 century, olketa wea saportim Hitler killim dae planti thousand Witness from olketa no teksaed long politik and samting wea mekhae long kantri duim. Olketa Martyr hia givim strongfala witness tu. Hem nao samting wea happen no longtaem go nomoa long Sweden.
For join witim mek-50 anniversary bilong end bilong World War II, gavman bilong Sweden startim wanfala education campaign long full kantri abaotem datfala Holocaust. Olketa kolem disfala project Living History. Olketa invaetem Olketa Jehovah’s Witness for tekpart and for sharem olketa experience bilong olketa.
Olketa Witness mekem wanfala show wea garem title Olketa Wea Dae long Holocaust wea World Forgetim. Olketa openem disfala show long Assembly Hall bilong Olketa Jehovah’s Witness long Strängnäs. Olketa Witness wea no dae insaed Holocaust stap for talem experience bilong olketa long 8,400 wea visit kam long firstfala day! Kasem end bilong 1999, disfala show hem kamap finis long winim 100 museum and pablik library long Sweden, and winim 150,000 pipol lukim. Samfala bigman bilong gavman lukim tu, and olketa barava tinghae long wanem olketa lukim.
No eni nara samting wea join witim waka bilong Olketa Jehovah’s Witness long Sweden hem kasem bigfala interest bilong pipol olsem diswan. Planti visitor ask: “Why nao iufala no talem mifala bifor abaotem olketa samting wea iufala experiencem long Holocaust?”
Bihaen taem wea datfala show hem kam long area bilong olketa, wanfala kongregeson reportim hao namba bilong olketa Bible study go ap 30-percent! Wanfala Witness invaetem wakfren for lukim disfala show. Man hia hapi for go and tekem nara fren witim hem. Bihaen, datfala fren talem hao hem hard for minim hao pipol savve garem strongfala faith olsem wea mekem olketa chus for dae winim for saenem pepa wea talemaot hao olketa lusim faith bilong olketa. Bihaen olketa story raonem moa, hem start for studyim Bible.
Olsem olketa martyr long first-century, olketa faithful martyr hia bilong mek-20 century barava no fraet for givim witness hao Jehovah hem only trufala God, wea fit for kasem barava loyal fasin bilong iumi, and for iumi faithful evribit long hem.—Revelation 4:11.
[Piksa Credit Line long page 13]
Camp prisoner: Państwowe Muzeum Oświęcim-Brzezinka, courtesy of the USHMM Photo Archives