Olketa Jehovah’s Witness and Datfala Holocaust—Wanem Nao Bible Talem Abaotem Datwan?

Lo January 27, 2023, staka pipol bae duim anniversary blo International Holocaust Remembrance Day. Olketa nogud samting wea happen winim 75 years bifor maet mekem iu for ting raonem why nao God allowim Holocaust for happen.

• For savve lo wanem nao Bible talem, readim article “Why Did the Holocaust Happen? Why Didn’t God Stop It?”

Staka Jewish pipol kasem barava nogud samting from olketa victim blo datfala Holocaust. Staka million Jew dae bikos pipol organize gud for murderim olketa. Olketa member blo olketa nara grup tu kasem persecution and olketa dae during Holocaust. Olketa Jehovah’s Witness tu insaed datfala grup and olketa kasem persecution bikos lo wat olketa bilivim lo Bible.

• For lanem moa samting, readim article “What Happened to Jehovah’s Witnesses During the Time of the Holocaust?”

“Gudfala future and hope”

Staka pipol wari nogud event olsem datfala Holocaust happen moa. Bat gud nius hem stap. Bible promisim dat lo future, no eni nogud samting olsem bae happen moa.

• “‘Bikos mi savve finis lo wanem mi laekem for iufala,’ hem nao wanem Jehovah talem, ‘mi laek for givim iufala peace, and no trabol, for givim iufala gudfala future and hope.’”—Jeremiah 29:11.a

Disfala hope bae kamap tru taem Jehovah God bae finisim olketa wicked samting and stretem olketa problem wea kamap bikos lo datwan. Klosap nao bae hem:

• Finisim wicked pipol wea spoelem olketa narawan.—Provebs 2:22, SIPB.

• Healim evriwan wea kasem olketa nogud samting.—Revelation 21:4.

• Resurrectim olketa wea dae finis for laef bak lo earth.—John 5:28, 29.

Iu savve trustim datfala hope lo Bible wea comfortim iumi. For lanem why, mifala invaetem iu for traem free Bible study course.