Wanfala Full World Hem Distroe!

Luk long world raonem iu, wea garem olketa taon, kastom, wei wea hem win saed long science, and population wea kasem staka billion. Luk olsem maet hem savve stap olowe. Waswe, iu tingim hao wanday disfala world savve finis evribit? Maet datwan hem hard tumas for tingim. Bat, waswe, iu savve hao wanfala raeting wea fitim man for trustim hem storyim hao wanfala world stap bifor and hem distroe evribit?

IUMI no tok abaotem wanfala world bilong pipol wea no garem big savve. Datfala world wea finis evribit garem olketa bigfala taon, pipol wea kleva saed long art, and garem savve saed long science. Nomata olsem, record bilong Bible talem hao seknomoa, long mek-17 day bilong mek-2 month, 352 year bifor datfala laen dadi Abraham hem born, wanfala flood finisim wanfala full world.a

Waswe, datfala record hem stret? Wanfala samting olsem really happen? Wanfala world really stap bifor, wea grow big and distroe long datfala taem? Sapos olsem, why nao hem finis? Wanem nao problem? And, waswe, iumi lanem eni samting from wei wea hem distroe?

Waswe, Wanfala World Bifor Really Distroe?

Sapos kaen barava big trabol olsem hem really happen, man bae nating forgetim evribit. So, long planti nation samfala samting for rememberim hem stap. Olsem example, tingim datfala date wea olketa recordim insaed Bible. Mek-tu month bilong kalenda bifor hem start from midol October go kasem midol November long kalenda bilong iumi. So mek-17 day hem klosap sem olsem November 1. Maet diswan nao reason why long datfala taem bilong year planti nation celebratem olketa festival for dead pipol and hem no just enikaen taem wea man chusim.

Planti kastom story point go long datfala Flood tu. Klosap evri pipol wea garem longfala history garem kastom story wea sei laen dadi bilong olketa winim wanfala flood wea kasem full world. Pipol bilong Africa, Europe, South America—evriwan garem olketa kastom story wea klosap semsem, olsem tu olketa pipol bilong Alaska, Australia, China, India, Lithuania, Mexico, Micronesia, New Zealand, and samfala part bilong North America, and samfala moa.

Gogo olketa addim go samfala story long datfala kastom story, bat evriwan garem semkaen information wea showimaot hem kamaot from sem story, olsem: Nogud fasin bilong olketa man mekem God kros. Hem bringim wanfala big flood. Olketa man olsem wan sekson hem distroe. Bat tu-thri raeteous wan stap sef. Olketa hia buildim wanfala ship wea olketa man and animal sev long hem. Gogo, olketa sendem aot olketa bird for lukaotem drae ples. Gogo, datfala ship hem sidaon antap long wanfala maunten. Taem olketa wea sev go aot from ship, olketa offerim sakrifaes.

Wanem nao diswan hem pruvim? Hem hard for olketa story hia kamap semsem bikos long wei wea olketa just happen nomoa. Olketa kastom story saportim story bilong Bible hao laen bilong evri man kamaot from olketa wea winim wanfala flood wea distroem wanfala world bilong olketa man. Dastawe, iumi no need for depend long olketa kastom story for savve long wanem nao happen. Iumi garem record wea olketa keepim gud insaed olketa Hebrew Scripture bilong Bible.—Genesis, chapter 6-8.

Bible garem record bilong history wea go bak kasem start bilong laef. Olketa pruv showimaot hao hem no just history nomoa. Olketa profesi wea no savve fail and deep wisdom bilong hem showimaot hao hem barava toktok bilong God for olketa man. No olsem olketa kastom story, history bilong Bible givim olketa nem and date, and tu information abaotem laen wea man kam from and living bilong wanfala ples. Hem givim iumi idea abaot hao nao living bifor datfala Flood and showimaot why nao full world seknomoa hem finis.

Wanem nao rong witim olketa pipol wea stap bifor datfala Flood? Nextfala article hem story abaotem disfala kwestin. Hem wanfala important kwestin for olketa wea laek for savve hao sef nao world wea stap distaem.

[Footnote]

[Chart long page 4]

Olketa Kastom Story Evriwea Long World Abaotem Flood

Kantri Haomas Point 1 2 3 4 5 6 7 8 9 10

Greece 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Assyria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

South America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Nogud fasin mekem God kros

2: Distroe thru long flood

3: God givim order

4: Olketa kasem warning from God

5: Tu-thri pipol stap laef

6: Sev long wanfala ship

7: Samfala animal sev

8: Olketa sendem aot bird or narafala creature

9: Bihaen hem sidaon antap wanfala maunten

10: Offerim sakrifaes