“Diswan Maet Soa Lelebet”

IU HEREM toktok hia bifor? Maet wanfala doctor or wanfala nurse talem diswan bifor hem recommendim long iu wankaen treatment.

Iu nating trae for rejectim disfala treatment nomata hem pain. Bat, iu sat eye long pain mekem health bilong iu kamap moabeta. Long taem bilong bigfala sik, wei for acceptim or rejectim wankaen treatment wea givim iumi pain savve minim laef or dae.

Nomata iumi maet no evritaem needim nurse or doctor, iumi evri man wea no perfect needim discipline, or wei for stretem iumi, wea samfala taem givim pain. (Jeremiah 10:23) For showimaot bigfala need for diswan saed long olketa pikinini, Bible hem sei: “Krangge fasin hem stap insaed long heart bilong wanfala boy; stik bilong discipline nao bae aotem datwan from hem.”—Proverbs 22:15.

Long scripture hia, stik hem piksarem paoa wea dadi and mami garem. Hem tru, olketa pikinini no savve laekem discipline. Olketa les for kasem eni wei for panis. Bat, wise and loving dadi and mami luk winim pain wea pikinini bae kasem and lukim gud samting wea bae kamaot from hem. Christian parents savve hao Word bilong God hem tru taem hem sei: “No eni discipline hem hapi samting taem man kasem, bat hem mekem man sorre; nomata olsem, bihaen for olketa wea kasem training from diswan hem bae garem frut bilong peace, hem nao, raeteous fasin.”—Hebrews 12:11; Proverbs 13:24.

Bat no olketa pikinini nomoa needim discipline. Olketa wea full-grown tu needim. Bible tok for olketa full-grown man taem hem sei: “Hol strong long discipline; no lusim. Gardim gud, from hem nao laef bilong iu.” (Proverbs 4:13) Yes, wisefala pipol—young and olo—bae hol strong long discipline wea kam from Word Bilong God, Bible, bikos wei for duim olsem bae minim laef for olketa.