Hao Nao Iu Savve Winim End Bilong Disfala World?

BIBLE hem storyim end bilong disfala system olsem “wanfala day bilong bigfala kros, day for mekem man feel nogud and garem bigfala wari, day bilong bigfala wind and for finisim evri samting, day bilong darkness and nomoa laet, day bilong olketa cloud and bilong smoke.” (Zephaniah 1:15) Hem barava kaen day wea iu no luk forward long hem! Nomata olsem, aposol Peter encouragem olketa Christian brata bilong hem for “weitim and tingting evritaem long taem wea day bilong Jehovah bae stap, wea thru long diswan heven wea bone long fire bae finis, and olketa part bilong hem wea hot tumas bae melt! Bat iumi weitim olketa niu heven and niu earth olsem hem promisim, wea raeteous fasin bae stap.”—2 Peter 3:12, 13.

Peter hem no story long hia abaotem really heven and really earth. Peter hem storyim tokpiksa “heven” and “earth,” wea piksarem olketa nogud gavman bilong man distaem and pipol wea no followim god. “Datfala day bilong Jehovah” bae no distroem really earth bat bae ‘finisim evribit olketa sinner bilong land.’ (Isaiah 13:9) For pipol wea “feel nogud and wea krae long evri rabis samting” wea wicked pipol duim long world distaem, day bilong Jehovah bae olsem day bilong salvation.—Ezekiel 9:4.

So, hao nao man savve sev long “bigfala day bilong Jehovah wea fit for mekem man fraet”? “Toktok bilong Jehovah,” wea wanfala long olketa profet bilong hem kasem, hem ansarem disfala kwestin: “Hem mas happen hao evriwan wea singaot long nem bilong Jehovah bae stap sef.” (Joel 1:1; 2:31, 32) Olketa Jehovah’s Witness bae hapi for helpem iu lanem mining bilong wei for singaot long nem bilong Jehovah.