Waswe, Wei wea Christ hem Lead Hem Really Samting Long Iu?

“Olketa mas no kolem iufala ‘leader,’ from Leader bilong iufala hem wanfala, hem nao Christ.”—MATTHEW 23:10.

1. Hu nomoa trufala Leader bilong olketa tru Christian?

HEM Tuesday, Nisan 11. Olketa bae killim dae Jesus Christ thrifala day bihaen. Diswan hem lastfala visit bilong hem long temple. Long disfala day, Jesus teachim wanfala important samting long pipol wea hipap long there and long olketa disaepol. Hem sei: “No letem eniwan kolem iufala Rabbi, from wanfala nomoa hem teacher bilong iufala, bat iufala evriwan olketa brata. And tu, no kolem eniwan father bilong iufala long earth, from wanfala nomoa hem Father bilong iufala, Datwan long heven. And olketa mas no kolem iufala ‘leader,’ from Leader bilong iufala hem wanfala, hem nao Christ.” (Matthew 23:8-10) Tru tumas, Jesus Christ nao Leader bilong olketa tru Christian.

2, 3. Wei for lisin long Jehovah and acceptim Leader wea hem appointim affectim laef bilong iumi long wanem wei?

² Taem wei wea Jesus hem lead really affectim iumi, laef bilong iumi kasem gud samting! Thru long profet Isaiah Jehovah God profesi abaotem disfala Leader wea bae kam taem hem sei: “Hey, iufala evriwan wea thirsty! Kam long wata. And olketa wea no garem eni selen! Kam, baem and kaikaim. Yes, kam, baem wine and milk nomata no eni selen and no eni price. . . . Lisin gud long mi, and kaikaim samting wea gud, and letem soul bilong iufala faendem bigfala hapi long wei for kamap fat. . . . Lukim! Mi givim hem olsem wanfala witness for olketa nation, olsem wanfala leader and komanda long olketa nation.”—Isaiah 55:1-4.

³ Isaiah iusim wata, milk and wine, olsem tokpiksa for showim hao wei for lisin long Jehovah and followim Leader and Komanda wea hem givim long iumi, hem affectim laef bilong iumiseleva. Samting wea kamaot from diswan hem strongim iumi. Hem olsem wei for drinkim cold wata long hot day. Hem satisfaem wei wea iumi thirsty for truth and raeteous fasin. Long wei wea milk hem strongim olketa baby and helpem olketa for grow, ‘milk bilong datfala word’ strongim iumi and mekem spiritual wei wea iumi fren witim God for grow. (1 Peter 2:1-3) And wine savve givim hapi taem man drinkim. Olsem tu, wei for worshipim trufala God and followim step bilong Leader wea hem appointim hem mekem laef “hapi fogud.” (Deuteronomy 16:15) So, hem important tumas for iumi evriwan—young and olo, man and woman—for showimaot hao wei wea Christ lead hem really samting long iumi. Bat, hao nao iumi savve showim long evriday living dat Messiah nao hem Leader bilong iumi?

Olketa Young Wan—Go Ahed for “Grow Long Wisdom”

4. (a) Wanem nao happen taem Jesus wea 12 year hem visitim Jerusalem long taem bilong Passover? (b) Jesus garem wanem kaen savve taem hem 12 year?

⁴ Tingim example wea Leader bilong iumi showimaot for olketa young wan. Nomata iumi no savve long staka samting abaotem taem wea Jesus hem pikinini, wanfala samting wea happen hem showim planti samting. Taem Jesus hem 12 year, dadi and mami bilong hem tekem hem go long Jerusalem for Passover, samting wea olketa duim evri year. Long datfala taem, hem join insaed wanfala story abaotem Bible, and famili no savve olketa lusim hem. Thrifala day bihaen, dadi and mami bilong hem, Joseph and Mary wea wari tumas faendem hem insaed long temple, “hem sidaon midolwan long olketa teacher and hem lisin long olketa and askem olketa kwestin long olketa.” And tu, “olketa wea lisin long hem go ahed for barava sapraes long savve bilong hem and olketa ansa wea hem givim.” Tingim, taem hem 12 year nomoa, Jesus savve askem olketa spiritual kwestin wea mekem man tingting strong and tu givim barava gudfala ansa! Iumi no daot hao hem kasem help from wei wea dadi and mami trainim hem.—Luke 2:41-50.

5. Hao nao olketa young wan savve lukluk gud long tingting bilong olketa abaotem famili Bible study?

⁵ Maet iu wanfala young wan. Sapos dadi and mami tufala loyal servant bilong God wea mekem program for duim famili Bible study evritaem. Hao nao iu ting long datfala famili study? Hem gud tumas for ting raonem olketa kwestin olsem: ‘Waswe, mi givim full saport for arrangement bilong Bible study long famili bilong mi? Waswe, mi willing for duim diswan, and no duim eni samting for spoelem?’ (Philippians 3:16) ‘Waswe, mi tekpart insaed study? Waswe, mi askem olketa kwestin saed long information bilong study and talemaot hao man savve followim diswan? Taem mi muv ahed long spiritual wei, waswe, mi mekem grow wei for laekem “strong kaikai [wea bilong] mature pipol”?’—Hebrews 5:13, 14.

6, 7. Program for readim Bible evriday savve helpem olketa young wan long wanem wei?

⁶ Hem gud tumas tu for garem program for readim Bible evriday. Man wea raetem psalm hem sing olsem: “Hapi nao man wea no wakabaot long kaonsel bilong olketa wicked wan, . .  bat hem hapi long law bilong Jehovah, and hem read smol long law bilong Hem day and naet.” (Psalm 1:1, 2) Man wea kamap leader bihaen Moses, Joshua, ‘read insaed buk bilong law long day and naet.’ Diswan mekem hem fit for duim samting long wise wei and duim assignment wea God givim long hem. (Joshua 1:8) Leader bilong iumi, Jesus Christ, sei: “Olketa raetem finis, ‘Man mas laef, no long bred nomoa, bat long evri toktok wea kamaot from mouth bilong Jehovah.’” (Matthew 4:4) Sapos iumi needim physical kaikai evriday, iumi barava needim spiritual kaikai tu evritaem!

⁷ From hem luksavve long spiritual need bilong hem, Nicole wea 13 year start for readim Bible evriday.a Distaem hem 16 year, hem readim full Bible wanfala taem finis, and distaem hem kasem hafwe long mek-tu taem. Teknik bilong hem simpol nomoa. “Mi readim wanfala chapter evriday,” hem sei. Hao nao wei wea hem readim Bible evriday helpem hem? Hem ansa: “Staka nogud samting stap distaem. Evriday mi meetim hevi wea againstim faith bilong mi long skul and nara ples. Wei for readim Bible evriday helpem mi for kwiktaem rememberim olketa Bible komand and principle wea encouragem mi for againstim olketa hevi hia. From diswan, mi feel moa klos long Jehovah and Jesus.”

8. Wanem nao Jesus savve duim taem hem go long synagogue evritaem, and hao nao olketa young wan savve followim hem?

⁸ Hem wei bilong Jesus for lisin and tekpart long Bible reading long synagogue. (Luke 4:16; Acts 15:21) Hem gud tumas for olketa young wan followim datfala example taem olketa evritaem attendim olketa Christian meeting, wea olketa readim and studyim Bible! Taem hem talemaot wei wea hem tinghae long olketa meeting hia, Richard wea 14 year sei: “Olketa meeting gud tumas for mi. Long there mi evritaem kasem reminder long samting wea gud and samting wea nogud, samting wea klin and no klin, wanem nao followim Christ and wanem nao no followim. Mi no need for lanem diswan long hard wei—thru long samting wea kasem mi.” Tru nao, “man fit for trustim reminder bilong Jehovah, mekem man wea no garem savve for kamap wise.” (Psalm 19:7) Nicole tu hem duim best for attendim faevfala meeting bilong kongregeson evri week. Hem iusim tu go kasem thrifala hour for prepare for olketa meeting hia.—Ephesians 5:15, 16.

9. Hao nao olketa young wan savve “go ahed for grow long wisdom”?

⁹ Taem man young hem gudfala taem for kasem ‘savve long only tru God, and long datwan wea hem sendem kam, Jesus Christ.’ (John 17:3) Maet iu savve long young pipol wea iusim planti taem for readim comic buk, lukluk television, pleim video game, or lukluk long Internet. No followim example bilong olketa, bat followim perfect example bilong Leader bilong iumi. Taem hem smol boy, hem hapi tumas for lane abaotem Jehovah. And wanem nao kamaot from diswan? From love wea hem garem for olketa spiritual samting, “Jesus hem go ahed for grow long wisdom.” (Luke 2:52) Iu tu savve olsem.

“Stap Anda Long Each Other”

10. Wanem nao bae helpem famili laef for garem peace and hapi?

¹⁰ Famili savve kamap wanfala sef ples bilong peace and gudfala living or ples for raoa and faet. (Proverbs 21:19; 26:21) Wei wea iumi acceptim Christ olsem leader hem helpem peace and hapi insaed famili kamap moa big. Tru nao, example bilong Jesus nao olketa famili shud followim. Bible sei: “Stap anda long each other long wei for fraet long Christ. Letem olketa waef stap anda long hasband bilong olketa olsem long Lord, from hasband hem hed bilong waef bilong hem olsem Christ tu hem hed bilong kongregeson, hem nao man wea sevem disfala body. . . . Olketa hasband, go ahed for lovem waef bilong iufala, olsem Christ tu hem lovem kongregeson and givim laef bilong hem for kongregeson.” (Ephesians 5:21-25) Aposol Paul raet olsem for kongregeson long Colossae: “Iufala pikinini, obeyim dadi and mami bilong iufala long evri samting, from diswan nao mekem Lord hapi.”—Colossians 3:18-20.

11. Hao nao hasband showimaot wei wea Christ lead hem really samting long hem?

¹¹ Wei for followim disfala kaonsel minim hasband hem lead insaed famili, waef loyal for saportim hem, and olketa pikinini obeyim dadi and mami. Bat, only sapos hedship wea man showimaot hem stret nao bae famili savve hapi. Hasband wea wise mas lane hao for showimaot hedship taem hem followim datwan wea Hed and Leader bilong hem, Christ Jesus. (1 Corinthians 11:3) Nomata Jesus kamap “hed ovarem evri samting long kongregeson,” hem kam long earth, “no for olketa servem hem, bat for serve.” (Ephesians 1:22; Matthew 20:28) Long sem wei, Christian hasband iusim hedship, no for kasem gud samting for hemseleva, bat for lukaftarem olketa samting bilong waef and olketa pikinini bilong hem—yes for full famili. (1 Corinthians 13:4, 5) Hem lukaotem wei for followim olketa fasin bilong God wea hed bilong hem, Jesus Christ showimaot. Olsem Jesus, hem garem kwaet fasin and hambol long heart. (Matthew 11:28-30) Taem hem rong, hem no faendem hard for talem olketa toktok olsem “sorre tumas” or “iu nao stret.” Gudfala example bilong hem mekem hem isi for waef “helpem,” “balancem,” and olsem “partner” long kaen man olsem, hem savve lane from hem and waka tugeta witim hem.—Genesis 2:20; Malachi 2:14.

12. Wanem nao bae helpem waef for followim principle bilong hedship?

¹² Saed long waef, hem mas stap anda long hasband bilong hem. Bat, sapos spirit bilong world affectim hem, diswan maet spoelem wei wea hem ting abaotem principle bilong hedship, and idea for stap anda long wanfala man bae kamap samting wea hem les for duim. Bible no sei man hem olsem boss, bat hem sei waef mas stap anda long hasband bilong hem. (Ephesians 5:24) Bible sei tu hao hasband or dadi mas givim ansa, and taem hem followim kaonsel bilong Bible, diswan givim peace and order long famili.—Philippians 2:5.

13. Wanem example bilong wei for stap anda nao Jesus showimaot for olketa pikinini?

¹³ Pikinini mas obeyim dadi and mami. Jesus showimaot nambawan example long diswan. Bihaen samting wea happen long temple, taem olketa lusim Jesus wea 12 year for thrifala day, “hem go daon witim [dadi and mami bilong hem] and kam long Nazareth, and hem go ahed for stap anda long tufala.” (Luke 2:51) Wei wea pikinini stap anda long dadi and mami help for mekem big peace and wan mind insaed famili. Taem evriwan long famili stap anda long wei wea Christ lead, samting wea kamaot from diswan nao hem hapi famili.

14, 15. Wanem nao bae helpem iumi for win sapos iumi feisim hardfala samting long famili? Talem wanfala example.

¹⁴ Nomata hardfala taem kamap long famili, key for win hem for followim Jesus and acceptim wei wea hem leadim iumi. Olsem example, taem Jerry wea 35 year hem maritim Lana, wea garem wanfala teenage dota, diswan mekem challenge kamap wea tufala evriwan no expectim. Jerry sei: “Mi savve hao sapos mi laek for kamap gudfala hed, mi need for followim olketa sem Bible principle wea mekem olketa nara famili win. Bat mi faendaot hao mi need for followim olketa hia witim bigfala wisdom and fasin for luksavve.” Stepdota bilong Jerry ting long hem olsem samwan wea kam midolwan hem and mami bilong hem and barava no laekem hem. Jerry need for iusim fasin for luksavve for lukim hao diswan affectim samting wea datfala girl talem and duim. Wanem nao hem duim? Jerry sei: “Lana and mi agree hao for samfala taem bae Lana nao deal witim wei for givim discipline and mi bae waka hard long wei for fren gud witim stepdota bilong mi. Gogo, gud samting hem kamaot from diswan.”

¹⁵ Taem iumi feisim olketa hard samting long famili, iumi needim fasin for luksavve and faendem aot why nao olketa famili member toktok and duim samting. Iumi needim wisdom tu for followim olketa principle bilong God long stretfala wei. Olsem example, Jesus barava minim why nao datfala woman wea safa from wei wea blood ran olowe hem kam and tasim hem, and hem deal witim woman hia long wise wei wea showimaot fasin for kea. (Leviticus 15:25-27; Mark 5:30-34) Wisdom and fasin for luksavve hem fasin bilong Leader bilong iumi. (Proverbs 8:12) Iumi hapi sapos iumi duim samting followim wei wea hem bae duim.

‘Go Ahed for Lukaotem Kingdom Firstaem’

16. Wanem nao shud main samting long laef bilong iumi, and hao nao example bilong Jesus showimaot diswan?

¹⁶ Jesus talem klia wanem nao shud main samting long living bilong olketa wea acceptim hem olsem Leader. Hem sei: “So, go ahed for lukaotem firstaem kingdom and raeteous fasin bilong [God].” (Matthew 6:33) And thru long example bilong hem, hem showimaot hao for duim diswan. Long end bilong 40-day wea hem no kaikai, hem tingting, and prea bihaen hem baptaes, Jesus kasem wanfala temptation. Devil Satan offerim hem wei for rul ovarem “evri kingdom bilong world.” Tingim laef wea Jesus savve garem sapos hem acceptim offer bilong Devil! Nomata olsem, Christ hem no lusim tingting for duim will bilong Dadi bilong hem. Hem luksavve hao laef insaed world bilong Satan hem for shortfala taem nomoa. Stretawe hem rejectim offer bilong Devil taem hem sei: “Olketa raetem finis, ‘Iu mas worshipim Jehovah, God bilong iu, and iu mas duim holy service long hem nomoa.’” No longtaem bihaen, Jesus “go ahed for preach and sei: ‘Repent, iufala pipol, from kingdom bilong heven hem klosap kam nao.’” (Matthew 4:2, 8-10, 17) For full taem wea hem stap long earth, Christ kamap man wea preach abaotem Kingdom bilong God full-taem.

17. Hao nao iumi savve showimaot hao olketa samting bilong Kingdom hem first samting long laef bilong iumi?

¹⁷ Iumi shud followim Leader bilong iumi and no letem world bilong Satan switim iumi for mekem bigfala waka for selen and laef waka olsem main goal long living. (Mark 1:17-21) Hem krangge samting for busy tumas for aftarem olketa samting bilong world and gogo olketa samting bilong Kingdom kamap olsem mek-tu samting! Jesus givim iumi waka for preach abaotem Kingdom and mek-disaepol. (Matthew 24:14; 28:19, 20) Tru nao, iumi maet garem famili or olketa nara responsibility, bat waswe, iumi hapi for iusim olketa evening and weekend for duim Christian responsibility bilong iumi for preach and teach? Iumi hapi tumas long 2001 service year taem samting olsem 780,000 fit for serve olsem full-taem minister or pioneer!

18. Wanem nao helpem iumi for faendem hapi insaed ministry?

¹⁸ Olketa Gospel showim Jesus olsem man wea duim samting and tu man wea kea for pipol. Taem hem lukim spiritual need bilong pipol raonem hem, hem feel sorre for olketa and willing for helpem olketa. (Mark 6:31-34) Iumi kasem hapi insaed ministry taem iumi share insaed from love and feeling for barava want for helpem narawan nao muvim. Bat hao nao iumi savve kasem feeling olsem? Jayson, wanfala young man talem: “Taem mi teenager, mi no really enjoyim ministry tumas.” Wanem nao helpem hem for mekem grow love for disfala waka? Jayson hem ansa: “Insaed famili bilong mi, evri Saturday morning hem for duim field service. Diswan hem gud samting for mi bikos taem mi go aot olowe long ministry, mi barava lukim gud samting wea kamaot from diswan and mi enjoyim long wei wea moa big.” Iumi tu shud evritaem busy for share insaed ministry.

19. Wanem nao iumi shud disaed strong for duim saed long wei wea Christ hem lead?

¹⁹ Wei for acceptim lead bilong Christ hem strongim iumi and mekem iumi kasem planti gudfala samting. Taem iumi duim olsem, young laef hem kamap wanfala taem for grow long savve and wisdom. Famili laef kamap samting wea givim peace and hapi, and ministry kamap waka wea givim hapi and wei for satisfae. So, letem iumi evriwan disaed strong for showimaot long evriday living and long olketa samting wea iumi disaedem hao iumi mekem wei wea Christ hem lead olsem really samting long iumi. (Colossians 3:23, 24) Jesus Christ leadim iumi thru long nara wei tu—Christian kongregeson. Next article bae storyim hao disfala arrangement savve helpem iumi.

[Olketa Footnote]

Waswe, Iu Remember?

• Hao nao wei for followim Leader bilong iumi wea God markem hem helpem iumi?

• Hao nao olketa young wan savve showaot olketa want for followim lead bilong Jesus?

• Hao nao wei wea Christ lead hem affectim famili laef bilong olketa wea stap anda long hem?

• Hao nao ministry bilong iumi showaot iumi really ting long Christ olsem leader?

[Olketa Piksa long page 9]

Young laef hem gud taem for kasem savve abaotem God and Leader wea hem appointim

[Piksa long page 10]

Wei for stap anda long Christ olsem Leader mekem famili hapi

[Olketa Piksa long page 12]

Jesus lukaotem Kingdom firstaem. Iu tu olsem?