Letem Olketa Principle Bilong God Leadim Olketa Step Bilong Iu
“[Jehovah hem] teachim iufala for helpem iufala seleva.”—ISAIAH 48:17.
1. Hao nao Creator hem leadim olketa man?
TAEM olketa scientist trae hard for faendemaot olketa secret bilong universe, olketa sapraes tumas long barava bigfala energy long universe wea stap raonem iumi. Sun bilong iumi—wanfala star wea no big tumas—hem mekem kamap energy olsem “100 billion hydrogen bomb wea bosta evri second.” Creator savve kontrolem and directim olketa bigfala samting long heven witim maeti paoa bilong hem. (Job 38:32; Isaiah 40:26) Waswe long iumi olketa man, wea garem present bilong free will, savve saed long fasin, tingting, and wei for minim spiritual samting? Long wanem wei nao Man wea Wakem iumi chus for leadim iumi? Long loving wei hem leadim iumi witim olketa perfect law and hae principle bilong hem, wea waka tugeta witim conscience wea iumi trainim gud.—2 Samuel 22:31; Romans 2:14, 15.
2, 3. God hapi long wanem wei for obey?
2 God hapi long creation bilong hem wea garem tingting wea chus for obeyim hem. (Proverbs 27:11) Hem no putim program insaed iumi for duim samting olsem machine, bat Jehovah givim iumi free will mekem iumi savve disaed for duim samting wea stret.—Hebrews 5:14.
3 Jesus, wea showimaot fasin bilong Father bilong hem long perfect wei, sei olsem long olketa disaepol bilong hem: “Iufala olketa fren bilong mi sapos iufala duim samting wea mi komandim iufala. Distaem mi no kolem iufala olketa slave.” (John 15:14, 15) Long taem bifor, wanfala slave mas obeyim order bilong masta bilong hem. Long narasaed, wei for fren hem kamap taem man showimaot fasin wea heart bilong narawan laekem. Iumi savve kamap fren bilong Jehovah. (James 2:23) Disfala wei for fren hem kamap strong sapos tufala saed garem love for each other. Jesus joinim wei for obeyim God witim love taem hem sei: “Sapos eniwan lovem mi, hem bae obeyim toktok bilong mi, and Dadi bilong mi bae lovem hem.” (John 14:23) For kasem datwan—and for leadim iumi long sef wei—Jehovah invaetem iumi for garem living wea followim olketa principle bilong hem.
Olketa Principle Bilong God
4. Wanem nao olketa principle?
4 Wanem nao olketa principle? Wanfala principle hem minim “wanfala main truth: wanfala full and main law, teaching, or idea wea olsem faondeson bilong olketa nara law and teaching or wea niu wan savve kamaot from.” (Webster’s Third New International Dictionary) Wei for studyim Bible gud mekem iumi luksavve hao Father bilong iumi long heven provaedem olketa principle for olketa difren part bilong living. Hem duim diswan from hem laekem iumi for kasem gud samting for olowe. Datwan hem fitim samting wea wise King Solomon hem raetem: “Herem, son bilong mi, and acceptim toktok bilong mi. Then long iu olketa year bilong laef bae kamap planti. Mi bae teachim iu long wei bilong wisdom; mi bae mekem iu for wakabaot long road bilong stretfala wei.” (Proverbs 4:10, 11) Olketa main principle wea Jehovah provaedem affectim wei wea iumi fren witim hem and olketa nara man, worship bilong iumi, and evriday living bilong iumi. (Psalm 1:1) Iumi bae lukluk long samfala main principle hia.
5. Givim olketa example bilong samfala main principle.
5 Jesus sei olsem abaotem wei wea iumi fren witim Jehovah: “Iu mas lovem Jehovah God bilong iu witim full heart bilong iu and witim full soul bilong iu and witim full mind bilong iu.” (Matthew 22:37) And tu, God provaedem olketa principle wea join witim fasin wea iumi showim long olketa nara man, olsem datfala Golden Rul: “Evri samting wea iufala wantem olketa man for duim long iufala, iufala tu mas duim olsem long olketa.” (Matthew 7:12; Galatians 6:10; Titus 3:2) Long saed bilong worship, iumi kasem disfala kaonsel: “Letem iumi tingim and muvim narawan for showimaot love and gudfala waka, no lusim wei for hipap tugeta.” (Hebrews 10:24, 25) Aposol Paul sei olsem abaotem evriday living: “Nomata iufala kaikai or drink or duim eni samting, duim evri samting for glory bilong God.” (1 Corinthians 10:31) Planti nara principle stap insaed Word bilong God.
6. Hao nao olketa principle difren from olketa law?
6 Olketa principle nao olketa main important truth, and olketa Christian wea wise lane for lovem olketa principle bikos olketa hia main truth wea laef. Jehovah muvim Solomon for raet olsem: “Lisin gud long toktok bilong mi. Givim ear long olketa toktok bilong mi. Eye bilong iu mas no lusim olketa. Keepim olketa insaed long heart bilong iu. Bikos olketa hia laef for pipol wea faendem olketa and health for full body bilong olketa.” (Proverbs 4:20-22) Hao nao olketa principle difren from olketa law? Olketa principle nao faondeson bilong olketa law. Olketa rul, wea planti taem fitim wanfala samting nomoa, maet fitim wanfala taem or wanfala need, bat olketa principle fitim for olowe. (Psalm 119:111) No enitaem olketa principle bilong God no fitim or finis. Disfala toktok bilong profet Isaiah hem barava tru: “Green grass hem drae nao, flaoa hem dae finis, bat word bilong God bilong iumi, hem bae stap go kasem taem olowe.”—Isaiah 40:8.
Tingting and Duim Samting Followim Olketa Principle
7. Hao nao Word bilong God encouragem iumi for tingting and duim samting followim olketa principle?
7 “Word bilong God” evritaem encouragem iumi for tingting and duim samting followim olketa principle. Taem samwan askem Jesus for talem main point bilong Law, hem talem tufala short toktok—wanfala mekhae long love for Jehovah, and narawan love for pipol. (Matthew 22:37-40) Taem hem duim olsem, Jesus talem samfala toktok from shortfala list bilong olketa main principle long Law bilong Moses, wea stap long Deuteronomy 6:4, 5: “Jehovah God bilong iumi hem wanfala Jehovah. And iu mas lovem Jehovah God bilong iu witim full heart bilong iu and full soul bilong iu and full strong bilong iu.” Luk olsem Jesus tingim tu komand bilong God wea stap long Leviticus 19:18. Long kliafala toktok wea endim buk bilong Ecclesiastes, King Solomon talem staka long olketa law bilong God: “Main point bilong diswan, from iumi herem finis evri samting, hem: Fraet long trufala God and obeyim olketa komandment bilong hem. From diswan nao full responsibility bilong man. From trufala God bae judgem evrikaen waka wea haed, for lukim sapos hem gud or nogud.”—Ecclesiastes 12:13, 14; Micah 6:8.
8. Why nao wei for savve gud long olketa main Bible principle hem protectim iumi?
8 Wei for minim gud olketa main principle olsem savve helpem iumi for minim and followim olketa difren instruction. And tu, sapos iumi no minim evribit and acceptim olketa main principle, maet iumi no disaedem samting long wisefala wei and maet hem isi for faith bilong iumi seksek. (Ephesians 4:14) Sapos iumi barava putim olketa principle olsem insaed mind and heart bilong iumi, bae iumi fit for iusim olketa for disaedem samting. Taem iumi followim olketa witim wei for minim samting, bae iumi win.—Joshua 1:8; Proverbs 4:1-9.
9. Why nao hem no isi evritaem for luksavve and followim olketa Bible principle?
9 Wei for luksavve and followim olketa Bible principle hem no isi olsem wei for followim wanfala list bilong olketa law. Olsem olketa man wea no perfect, maet iumi no willing for waka hard for ting raonem olketa principle. Maet iumi laekem wanfala rul taem iumi mas disaedem samting or taem iumi feisim wanfala problem. Samfala taem maet iumi askem direction from wanfala mature Christian—maet wanfala elder long kongregeson—and ting bae hem talem wanfala rul wea fitim samting wea kasem iumi. Nomata olsem, Bible or olketa Bible pablikeson maet no givim wanfala rul, and nomata sapos wanfala rul hem stap, maet hem no fitim long evritaem and evri samting wea kamap. Maet iu rememberim man wea askem Jesus: “Teacher, talem brata bilong mi for divaedem evri samting bilong dadi witim mi.” Jesus no kwiktaem givim wanfala law for stretem raoa midolwan tufala brata, bat hem givim hem wanfala principle: “Keepim eye bilong iufala open and gard againstim evri kaen fasin for kavet.” So Jesus givim wanfala principle for leadim tingting wea helpem tufala and wea savve helpem iumi tu.—Luke 12:13-15.
10. Hao nao wei for garem fasin wea followim olketa principle showimaot wanem nao stap long heart bilong iumi?
10 Maet iu lukim finis pipol wea komplen taem olketa obeyim olketa law, bikos olketa fraet for kasem panis. Wei for respectim olketa principle bae mekem man no garem kaen tingting olsem. Wei wea olketa principle difren from olketa law hem muvim olketa wea followim for duim olsem from heart. Tru nao, long klosap evri principle, man bae no stretawe kasem panis from hem no followim. Diswan givim iumi chance for showimaot why nao iumi obeyim Jehovah, wanem nao muvim heart bilong iumi. Example long diswan hem long wei wea Joseph no laek for duim dirty fasin witim waef bilong Potiphar. Nomata Jehovah no givim yet eni law againstim adultery and no markem eni panis for wei for duim sex witim waef bilong nara man, Joseph luksavve long olketa principle bilong God saed long wei for faithful insaed marit. (Genesis 2:24; 12:18-20) Iumi lukim long disfala ansa bilong hem hao olketa principle hia barava affectim hem: “Hao nao mi savve duim disfala barava nogud samting and sin againstim God?”—Genesis 39:9.
11. Olketa Christian shud letem olketa principle bilong Jehovah for leadim olketa long wanem samting?
11 Distaem, olketa principle bilong Jehovah shud leadim olketa Christian saed long samting wea man seleva mas disaedem, olsem wei for chusim olketa fren, hapitaem, music, and wanem for readim. (1 Corinthians 15:33; Philippians 4:8) Taem iumi grow long savve, wei for minim samting, and wei for tinghae long Jehovah and olketa standard bilong hem, conscience bilong iumi bae helpem iumi for followim olketa principle bilong God nomata wanem iumi feisim, nomata hem samting bilong iumiseleva. From olketa Bible principle nao leadim iumi, bae iumi no lukaotem eni wei wea law bilong God hem no klia mekem iumi no need for followim, and tu, bae iumi no followim olketa wea duim samting wea no stret evribit bat long semtaem no brekem law tu. Iumi luksavve tingting olsem savve spoelem iumi.—James 1:22-25.
12. Wanem nao key for letem olketa principle bilong God leadim iumi?
12 Olketa Christian wea mature luksavve key for followim olketa principle bilong God hem wei for want for savve long feeling bilong Jehovah abaotem samting. Man wea raetem psalm sei: “Iufala wea lovem Jehovah, heitim nogud samting.” (Psalm 97:10) Taem hem storyim samfala samting wea nogud long eye bilong God, Proverbs 6: 16-19 sei: “Sixfala samting stap wea Jehovah barava heitim; tru nao, sevenfala samting barava rabis long soul bilong hem: praod eye, tongue wea tok laea, and hand wea killim dae man wea no guilty, heart wea tingim olketa plan for spoelem man, leg wea hariap for ran for nogud samting, giaman witness wea talemaot olketa laea, and eniwan wea mekem olketa raoa midolwan olketa brata.” Taem feeling for want for showimaot wanem nao feeling bilong Jehovah long olketa main samting hem kontrolem living bilong iumi, wei for live followim olketa principle hem samting wea iumi duim evritaem.—Jeremiah 22:16.
Needim Gud Samting for Muvim Man
13. Wanem kaen tingting nao Jesus mekhae long hem long Sermon bilong hem long Maunten?
13 For savve and followim olketa principle protectim iumi tu from trap bilong wei for worship drae nomoa. Wei for followim olketa principle and wei for obeyim evribit olketa law, tufala difren. Jesus showimaot diswan klia long Sermon long Maunten. (Matthew 5:17-48) Tingim hao olketa Jew nao lisin long Jesus, so fasin bilong olketa shud followim Law bilong Moses. Bat wei wea olketa ting long datfala law hem no stret. Olketa mekhae hao man mas obeyim wanem Law talem nomata wei wea hem duim maet againstim really mining bilong datfala law. And olketa mekhae long kastom bilong olketa winim teaching bilong God. (Matthew 12:9-12; 15:1-9) Samting wea kamaot from diswan nao pipol no garem tingting for followim olketa principle.
14. Hao nao Jesus helpem pipol wea lisin long hem for tingting followim olketa principle?
14 Long narasaed, Jesus talem long Sermon bilong hem long Maunten olketa principle saed long faevfala area bilong stretfala fasin: kros, marit and divorce, olketa promis, pei bak, and love and heit. Long each taem, Jesus showimaot gudfala samting wea kamaot from wei for followim principle. So, Jesus apim standard bilong fasin for olketa follower bilong hem. Olsem example, long saed bilong adultery, hem givim iumi wanfala principle wea protectim olketa samting iumi duim and tu tingting and samting iumi wantem: “Evriwan wea go ahed for lukluk long wanfala woman for barava laekem hem, hem duim adultery finis witim hem insaed long heart bilong hem.”—Matthew 5:28.
15. Hao nao iumi savve stap klia long wei for followim law nomoa?
15 Disfala example hem showimaot wei wea iumi shud nating ting smol long goal and spirit bilong olketa principle bilong Jehovah. Iumi shud no trae for mekem God hapi long iumi thru long wei for followim olketa law nomoa for mekem nara pipol lukim. Jesus showimaot klia laea wei bilong kaen tingting olsem taem hem point go long mercy and love bilong God. (Matthew 12:7; Luke 6:1-11) Sapos iumi followim olketa Bible principle, bae iumi stap klia long wei for live (or laekem nara pipol for live) followim olketa hardfala rul for duim or no duim samting wea go aotsaed long olketa teaching bilong Bible. Bae iumi ting moa strong long olketa principle bilong love and wei for obeyim God and no long hao nara pipol lukim worship bilong iumi.—Luke 11:42.
Gud Samting wea Kamaot
16. Talem samfala example bilong olketa principle wea olsem faondeson long samfala law bilong Bible.
16 Taem iumi traem best for obeyim Jehovah, hem important for luksavve hao olketa law bilong hem garem faondeson long olketa main principle. Olsem example, olketa Christian mas stap klia long wei for worshipim idol, dirty fasin, and iusim blood long rong wei. (Acts 15:28, 29) Wanem nao faondeson bilong tingting bilong Christian long olketa samting hia? God nomoa fit for kasem worship bilong iumi; iumi shud faithful long partner bilong iumi; and Jehovah hem Man wea Givim Laef. (Genesis 2:24; Exodus 20:5; Psalm 36:9) Wei for minim olketa main principle hia mekem hem moa isi for acceptim and followim olketa law wea join witim olketa.
17. Wanem gud samting nao savve kamaot from wei for luksavve and followim olketa Bible principle?
17 Taem iumi luksavve long olketa main principle and followim olketa, iumi luksavve olketa for helpem iumi. Olketa spiritual blessing wea pipol bilong God enjoyim hem planti taem join witim wei for kasem gudfala samting. Olsem example, olketa wea no smoke, wea garem klin fasin, and wea respectim wei wea blood hem holy no kasem samfala sik. Wei for live followim truth bilong God savve helpem iumi long selen, living, or famili laef. Gud samting olsem pruvim wei wea olketa standard bilong Jehovah barava helpem man. Bat wei for kasem gudfala samting olsem hem no main reason for followim olketa principle bilong God. Olketa tru Christian obeyim Jehovah bikos olketa lovem hem, bikos hem fit for kasem worship bilong olketa, and bikos hem nao stret samting for duim.—Revelation 4:11.
18. Sapos iumi want for win olsem Christian, wanem nao shud leadim laef bilong iumi?
18 Wei for letem olketa Bible principle leadim iumi long laef hem mekem iumi garem living wea winim living bilong man wea no duim, wea datwan nao maet pullim nara pipol kam long wei bilong God. Moa important, living bilong iumi givim honor long Jehovah. Iumi luksavve Jehovah hem really wanfala loving God wea laekem wanem hem best for iumi. Taem iumi disaedem samting followim olketa Bible principle and lukim hao Jehovah blessim iumi, bae iumi feel moa klos long hem. Tru nao, iumi bae garem barava klos wei for fren witim Father bilong iumi long heven.
Waswe, Iu Remember?
• Wanem nao principle?
• Hao nao olketa principle difren from olketa law?
• Why nao hem gud for iumi tingting and duim samting followim olketa principle?
[Box long page 20]
Olketa talem Wilson, wanfala Christian from Ghana, hao bae hem lusim waka bilong hem insaed tu-thri day. Long last day wea hem waka, hem kasem assignment for wasim car bilong boss bilong company. Taem Wilson faendem bigfala selen insaed datfala car, supervisor bilong hem sei God nao sendem datfala selen bikos Wilson hem redy for lei off long datfala day. Nomata olsem, from hem followim olketa Bible principle saed long honest fasin, Wilson givim bak datfala selen long manager. From manager sapraes and tinghae long datwan, hem offerim long Wilson waka for olowe insaed company and tu hem promotim hem for kamap supervisor insaed company.—Ephesians 4:28.
[Box long page 21]
Rukia hem wanfala woman from Albania wea winim 60 year. From raoa wea kamap insaed famili, hem no story witim brata bilong hem for winim 17 year. Hem start for studyim Bible witim Olketa Jehovah’s Witness and lanem hao olketa tru Christian mas stap long peace witim nara pipol, no keepim kros. Hem prea full naet, and heart bilong hem pump-pump taem hem wakabaot go long haos bilong brata bilong hem. Dota bilong brata bilong hem openem door. From hem sapraes tumas, hem askem Rukia: “Hu nao dae? Hao nao iu kam long hia?” Rukia ask for lukim brata bilong hem. Hem explainim hao wei wea hem lanem olketa Bible principle and lane abaotem Jehovah muvim hem for mek-peace witim brata bilong hem. Bihaen olketa krae and huggim each other, olketa celebratem wei wea olketa fren bak tugeta!—Romans 12:17, 18.
[Piksa long page 23]
[Piksa long page 23]
[Piksa long page 23]
[Piksa long page 23]
“Taem hem lukim olketa pipol hem go ap long maunten; and bihaen hem sidaon olketa disaepol bilong hem kam long hem; and hem openem mouth bilong hem and start for teachim olketa.”—MATTHEW 5:1, 2