Kwestin From Reader
Waswe, hem stret for prea long God and no talem toktok “insaed nem bilong Jesus”?
Bible showaot hao olketa Christian wea laek for prea long Jehovah mas duim diswan insaed nem bilong Jesus. Jesus talem olketa disaepol bilong hem: “No eniwan savve kam long Dadi bat only thru long mi.” Hem sei moa: “Eni samting wea iufala askem long nem bilong mi, mi bae duim, mekem Father bae kasem glory long saed bilong Son. Sapos iufala askem eni samting long nem bilong mi, mi bae duim.”—John 14:6, 13, 14.
Disfala buk Cyclopedia of Biblical, Theological, and Ecclesiastical Literature tok olsem abaotem disfala spesol position bilong Jesus: “Prea hem go long God nomoa, thru long Jesus Christ olsem Mediator. Evri prea wea go long olketa saint or angel hem iusles and daonem God tu. Evrikaen wei for worshipim samting, nomata hu or wanem nao datfala samting, hem wei for worshipim idol and hem barava tambu anda long holy law bilong God.”
Hao sapos samwan, bihaen hem kasem barava naes experience, hem sei, “Thankiu Jehovah” and no talem “insaed nem bilong Jesus”? Hao, diswan hem no stret? Nomoa. Sapos wanfala Christian seknomoa kasem danger and singaot: “Helpem mi, Jehovah!” God bae no les for givim help bikos servant bilong hem no sei “insaed nem bilong Jesus.”
Nomata olsem, samting for tingim nao hem wei wea, for tokaot big nomoa, nomata long God, hem no minim man prea. Olsem example, bihaen Jehovah judgem hem for wei wea hem killim dae brata bilong hem Abel, Cain hem sei: “Panis bilong mi for rong hem big tumas for mi karem. Iu go ahed for raosem mi distaem from antap graon, and from feis bilong iu bae mi haed; and mi mas kamap man for muv evritaem and wanfala wea no garem hom long earth, and eniwan wea faendem mi bae killim mi.” (Genesis 4:13, 14) Nomata hem story long Jehovah, disfala toktok wea Cain talem hem wanfala komplen abaotem nogud frut bilong sin.
Bible talem iumi: “God hem againstim praod pipol, bat hem givim kaenfala fasin wea man no fit for kasem long olketa hambol wan.” For tok long Most Hae olsem iu story long man nating barava no showimaot hambol fasin. (James 4:6; Psalm 47:2; Revelation 14:7) Hem bae no showaot respect tu for no luksavve long Jesus Christ taem man savve finis wanem Word bilong God talem abaotem position bilong hem.—Luke 1:32, 33.
Diswan no minim Jehovah expectim iumi for prea followim wankaen stael or wei. Important key hem heart bilong man. (1 Samuel 16:7) Long first century C.E., wanfala bigman bilong army bilong Rome wea garem nem Cornelius hem “barava askem God olowe.” Cornelius, wanfala Gentile wea no circumcise, hem no dedicate long Jehovah. Olketa prea wea Cornelius talem “go ap olsem samting wea God rememberim,” nomata luk olsem hem no talem olketa insaed nem bilong Jesus. Why? Bikos Jehovah hem “man [wea] lukluk gud insaed long olketa heart,” hem lukim hao Cornelius hem “wanfala man wea strong for worship and wea fraet long God.” (Acts 10:2, 4; Proverbs 17:3) Taem hem kasem savve abaotem “Jesus wea kam from Nazareth,” Cornelius kasem holy spirit and kamap wanfala baptaes disaepol bilong Jesus.—Acts 10:30-48.
Hem no bilong man for disaedem wanem prea nao God herem. Sapos samfala taem wanfala Christian talem toktok long God and no ting for sei “insaed nem bilong Jesus,” hem no need for feel wikdaon witim guilty feeling. Jehovah savve gud long wik point bilong iumi and hem laek for helpem iumi. (Psalm 103:12-14) Iumi savve sure hao sapos iumi showimaot faith long “Son bilong God . . . , nomata wanem samting iumi askem wea fitim will bilong hem, hem herem iumi.” (1 John 5:13, 14) Bat, especially taem olketa tru Christian prea for olketa narawan, olketa showimaot olketa luksavve long waka wea Bible storyim wea Jesus duim insaed purpose bilong Jehovah. And olketa obey taem olketa laek for honorim Jesus thru long wei for talem prea go long God thru long hem.