Followim Olketa Mark Bilong God for Mekhae Long Jehovah
“Mi bae mekhae long hem witim wei for sei thankiu.”—PSALM 69:30.
1. (a) Why nao man shud mekhae long Jehovah? (b) Hao nao iumi savve mekhae long hem witim wei for sei thankiu?
JEHOVAH nao Olmaeti God, Sovereign bilong Universe, datfala Creator. From diswan, man shud mekhae long nem and olketa purpose bilong hem. For mekhae long Jehovah minim man mas tinghae long hem, praisem hem long toktok and samting man duim. For duim diswan “witim wei for sei thankiu” minim iumi mas olowe thankiu for samting wea hem duim distaem and long future. Iumi need for garem sem feeling wea showaot long Revelation 4:11, wea olketa faithful spirit creature long heven singaot: “Iu nao fit, Jehovah, God bilong mifala, for kasem glory and honor and paoa, from iu creatim evri samting, and from will bilong iu nao evri samting hia stap and kamap.” Hao nao iumi savve mekhae long Jehovah? Taem iumi lane abaotem hem and then duim samting wea hem laekem. Iumi shud garem sem feeling olsem man for raetem psalm wea sei: “Teachim mi for duim will bilong iu, from iu nao God bilong mi.”—Psalm 143:10.
2. Hao nao Jehovah deal witim olketa wea mekhae long hem and olketa wea no duim diswan?
2 Jehovah tinghae long olketa wea mekhae long hem. Dastawe hem nao “man wea givim reward long olketa wea barava lukaotem hem.” (Hebrews 11:6) Wanem nao disfala reward? Jesus sei, taem hem prea long Father long heven: “Diswan nao minim laef olowe, for olketa kasem savve long iu, only trufala God, and long datwan wea iu sendem kam, Jesus Christ.” (John 17:3) Yes, olketa wea “mekhae long [Jehovah] witim wei for sei thankiu” bae “kasem earth, and olketa bae stap olowe long hem.” (Psalm 37:29) Bat long narasaed, “no eni future stap for eniwan wea nogud.” (Proverbs 24:20) Long olketa last day distaem, need for mekhae long Jehovah hem barava important from klosap nao hem bae distroem wicked pipol and sevem raeteous pipol. “World hem redy for finis and evri samting wea hem wantem tu, bat man wea duim will bilong God bae stap olowe.”—1 John 2:17; Proverbs 2:21, 22.
3. Why nao iumi shud tingting strong long buk bilong Malachi?
3 Man savve faendem will bilong Jehovah insaed Bible, from “evri Scripture hem kam from God.” (2 Timothy 3:16) Word bilong God garem planti story abaotem hao Jehovah blessim olketa wea mekhae long hem and abaotem samting wea savve happen long olketa wea no duim datwan. Wanfala long olketa story hia hem join witim samting wea happen long Israel long taem bilong profet Malachi. Long samting olsem year 443 B.C.E., insaed taem Nehemiah hem governor bilong Judah, Malachi raetem buk wea garem nem bilong hem. Buk hia garem paoa and savve affectim iumi witim information and profesi wea “olketa raetem olsem warning for iumi wea stap long end bilong system.” (1 Corinthians 10:11) Wei for tingting strong long toktok bilong Malachi savve helpem iumi for redy for “bigfala day bilong Jehovah wea mekem man fraet,” taem Hem bae distroem disfala wicked system.—Malachi 4:5.
4. Wanem nao sixfala point wea Malachi chapter 1 mekem iumi tingim?
4 Hao nao buk bilong Malachi, wea olketa raetem winim 2,400 year go finis, helpem iumi long mek-21 century for redy for datfala bigfala day bilong Jehovah wea mekem man fraet? First chapter hem talem sixfala point wea barava important long wei wea iumi mekhae long Jehovah witim wei for sei thankiu mekem hem favorim iumi and givim laef olowe: (1) Jehovah lovem pipol bilong hem. (2) Iumi mas showimaot wei for tinghae long olketa holy samting. (3) Jehovah expectim iumi for givim hem best bilong iumi. (4) Samting wea muvim man for tru worship hem love wea no selfish, no greedy fasin. (5) Service wea God acceptim hem no wanfala hevi. (6) Evriwan long iumi wanwan mas givim ansa long God. So, long disfala firstfala article wea part long thrifala article abaotem buk bilong Malachi, iumi bae tingim each wan long olketa point hia taem iumi lukluk moa klos long Malachi chapter 1.
Jehovah Lovem Pipol Bilong Hem
5, 6. (a) Why nao Jehovah lovem Jacob? (b) Sapos iumi followim faithful fasin bilong Jacob, wanem nao iumi savve expectim?
5 Love bilong Jehovah hem showaot klia long olketa firstfala verse long profesi bilong Malachi. Buk bilong hem start witim toktok hia: “Wanfala announcement: Word bilong Jehovah abaotem Israel.” Then, God hem sei: “Mi bin lovem iufala pipol.” Hem talem wanfala example, long sem verse, Jehovah sei: “Mi bin lovem Jacob.” Jacob hem wanfala man wea garem faith long Jehovah. Gogo, Jehovah changem nem bilong Jacob for kamap Israel, and hem kamap laen dadi bilong nation bilong Israel. From Jacob hem man wea garem faith dastawe Jehovah lovem hem. Olketa pipol bilong Israel wea garem sem feeling wea Jacob garem for Jehovah bae kasem love bilong Hem tu.—Malachi 1:1, 2.
6 Sapos iumi lovem Jehovah and loyal for stap witim pipol bilong hem, iumi savve kasem comfort from disfala toktok long 1 Samuel 12:22: “Jehovah bae no lusim pipol bilong hem for saed bilong bigfala nem bilong hem.” Jehovah lovem pipol bilong hem and long end hem bae givim reward bilong laef olowe long olketa. Dastawe iumi read olsem: “Trust long Jehovah and duim gud samting; stap long earth, and duim samting witim faithful fasin. And tu kasem nambawan hapi long Jehovah, and hem bae givim samting wea heart bilong iu wantem.” (Psalm 37:3, 4) Insaed wei wea iumi lovem Jehovah hem disfala mek-tu point long Malachi chapter 1.
Showimaot Wei for Tinghae Long Olketa Holy Samting
7. Why nao Jehovah heitim Esau?
7 Taem iumi readim Malachi 1:2, 3, bihaen Jehovah sei, “mi bin lovem Jacob,” hem sei tu, “Esau mi heitim.” Why nao hem difren? Jacob mekhae long Jehovah, bat twin brata bilong hem, Esau, no duim datwan. Nara nem bilong Esau hem Edom. Long Malachi 1:4, hem kolem land bilong Edom territory bilong barava nogud fasin, and pipol wea stap insaed kasem judgment. Esau kasem datfala nem Edom (wea minim “Red”) bihaen hem sellim position bilong hem olsem firstborn long Jacob for samfala red supsup. Genesis 25:34 hem sei: “Esau hem lukdaonem position bilong firstborn.” Aposol Paul encouragem olketa narawan wea biliv for mas careful nogud “eniwan wea duim fornication or eniwan wea no tinghae long olketa holy samting, olsem Esau, wea for wanfala pleit kaikai nomoa, hem sellim go position bilong hem olsem firstborn.”—Hebrews 12:14-16.
8. Wanem nao mekem Paul markem Esau olsem wanfala man wea duim fornication?
8 Why nao Paul joinim samting Esau duim witim fornication? Bikos wei for garem tingting olsem Esau savve leadim man for no tinghae long olketa holy samting. Gogo, diswan savve mekem bigfala sin for kamap, olsem fornication. So, iumi shud askem iumiseleva: ‘Waswe, samfala taem mi laek for exchangem samting wea mi bae kasem olsem Christian—laef olowe—for samting wea bae stap for lelebet taem nomoa olsem wanfala dish bilong lentil supsup? Waswe, maet mi ting daonem olketa holy samting, bat no luksavve mi duim?’ Esau garem feeling for mas stretawe satisfaem samting wea body wantem. Hem sei long Jacob: “Kwiktaem, plis, givim mi wanfala spoon bilong datfala red supsup.” (Genesis 25:30) Sorre, bat hem olsem samfala long olketa servant bilong God sei: “Kwiktaem! Why nao mi mas weit for marit wea garem honor?” Feeling for want for satisfae saed long sex nomata wanem bae kamaot from datwan, hem kamap olsem dish bilong lentil supsup long olketa.
9. Hao nao iumi savve keepim wei for fraet long Jehovah?
9 Iumi mas nating ting daonem olketa holy samting long wei for no respectim klinfala fasin, faithful fasin, and spiritual present bilong iumi. Winim wei for olsem Esau, iumi mas olsem faithful Jacob and keepim wei for fraet long God and evritaem showimaot deep wei for tinghae long olketa holy samting. Hao nao iumi duim diswan? Taem iumi careful for keepim olketa mark bilong Jehovah. Diswan leadim iumi long mek-thri point wea stap long Malachi chapter 1. Wanem nao datwan?
Givim Jehovah Best Bilong Iumi
10. Hao nao olketa priest lukdaonem tebol bilong Jehovah?
10 Olketa priest bilong Judah wea serve long temple long Jerusalem long taem bilong Malachi nating offerim long Jehovah olketa best sakrifaes. Malachi 1:6-8 sei: “‘Wanfala son, for saed bilong hem, hem honorim wanfala father; and wanfala servant, bigfala masta bilong hem. So sapos mi wanfala father, wea nao honor for mi? And sapos mi wanfala bigfala masta, wea nao wei for fraet long mi?’ Jehovah bilong olketa army hem talem long iufala, O olketa priest wea lukdaonem nem bilong mi.” “Long wanem wei nao mifala lukdaonem nem bilong iu?” olketa priest askem. “Taem iufala putim bred wea dirty antap long altar bilong mi,” Jehovah hem ansa. “Long wanem wei nao mifala mekem iu dirty?” olketa priest askem. So Jehovah talem olketa: “Taem iufala sei: ‘Tebol bilong Jehovah hem samting for lukdaonem.’” Olketa priest hia wea duim sin lukdaonem tebol bilong Jehovah evritaem olketa offerim animal wea blind, cripple, or sik for sakrifaes, and sei: “Hem gud nomoa.”
11. (a) Wanem nao Jehovah talem abaotem olketa sakrifaes olsem wea hem no acceptim? (b) Hao nao pipol tu garem blame?
11 Then Jehovah sei olsem abaotem olketa kaen sakrifaes olsem wea hem no acceptim: “Tekem kam klosap, plis, long governor bilong iu. Waswe, bae hem hapi long iu, or welkamim iu long kaenfala wei?” Nomoa, governor bilong olketa bae no hapi long datkaen present. Sapos olsem, Sovereign Bilong Universe bae barava nating acceptim olketa nogud sakrifaes olsem! And hem no olketa priest nomoa wea kasem blame. Hem tru, olketa lukdaonem Jehovah taem olketa mekem olketa sakrifaes hia. Bat, waswe, pipol hia garem blame tu? Yes! Olketa nao tekem kam olketa animal wea blind, cripple, and sik long olketa priest for sakrifaesim. Datwan hem bigfala sin!
12. Hao nao iumi kasem help for give best bilong iumi long Jehovah?
12 Wei for givim Jehovah best bilong iumi hem wei for showimaot iumi barava lovem hem. (Matthew 22:37, 38) No olsem olketa priest long taem bilong Malachi, organization bilong Jehovah distaem givimaot Bible instruction wea helpem iumi for mekhae long Jehovah taem iumi kasem olketa mark bilong God. Mek-foa important point long Malachi chapter 1 hem join witim diswan.
Samting wea Muvim Man for Duim Tru Worship Hem Love, No Greedy Fasin
13. Wanem nao olketa priest duim wea showimaot greedy fasin nao muvim olketa?
13 Olketa priest long taem bilong Malachi olketa selfish, no garem love, and hangre for selen. Hao nao iumi savve datwan? Malachi 1:10 sei: “‘Hu midolwan long iufala nao bae satem olketa door? And iufala olketa man bae no laetem altar bilong mi—for nating. Mi nating hapi long iufala,’ Jehovah bilong olketa army hem talem, ‘and present wea iufala offerim from hand bilong iufala mi nating hapi long hem.’” Tru nao, olketa greedy priest hia askem selen for duim nomata smol samting long temple service, olketa askem selen for satem olketa door and laetem fire bilong altar. Dastawe Jehovah nating hapi long olketa sakrifaes from hand bilong olketa!
14. Why nao iumi fit for sei love nao muvim Olketa Jehovah’s Witness?
14 Greedy and selfish fasin bilong olketa priest wea sin long Jerusalem bifor hem mekem iumi tingim hao olketa wea greedy bae no go insaed Kingdom bilong God. (1 Corinthians 6:9, 10) Taem iumi tingting raonem selfish wei for serve bilong olketa priest hia hem mekem iumi barava tinghae long preaching waka wea Olketa Jehovah’s Witness duim evriwea long world. Iumi volunteer and no savve askem kostim for ministry bilong iumi. Nomoa, “iumi no man for sellim word bilong God.” (2 Corinthians 2:17) Olsem Paul, iumi wanwan savve tok tru for sei: “Mi no kostim wei wea mi hapi for talemaot gud nius bilong God long iu.” (2 Corinthians 11:7) Lukim hao Paul “hapi for talemaot gud nius.” Datwan leadim tingting long mek-faev point wea stap insaed Malachi chapter 1.
Wei for Servem God No Wanfala Hevi
15, 16. (a) Wanem tingting nao olketa priest garem abaotem wei for offerim sakrifaes? (b) Hao nao Olketa Jehovah’s Witness offerim olketa sakrifaes bilong olketa?
15 Olketa priest wea no garem faith ting long wei for offerim olketa sakrifaes olsem samting wea olketa feel les for duim. Hem wanfala hevi long olketa. Long Malachi 1:13, God talem olketa: “Iufala sei, ‘Lukim! Datwan hem wanfala hevi!’ and iufala lukdaonem datwan.” Olketa priest hia ting nating, or lukdaonem, olketa holy samting bilong God. Iumi mas prea nogud iumi man wanwan kamap olsem olketa. Bat, iumi mas evritaem showimaot spirit bilong toktok long 1 John 5:3: “Diswan nao mining bilong love bilong God, for iumi obeyim evri komandment bilong hem; and olketa komandment bilong hem no hevi.”
16 Iumi mas hapi for offerim olketa spiritual sakrifaes long God, and nating ting long diswan olsem wanfala hevi. Iumi need for followim disfala profesi toktok: “Sei olsem long [Jehovah], iufala evri pipol, ‘Letem iu forgivim rong; and acceptim samting wea gud, and mifala bae offerim olketa youngfala buluka bilong mouth bilong mifala.’” (Hosea 14:2) Datfala toktok “youngfala buluka bilong mouth bilong mifala” hem minim olketa spiritual sakrifaes, toktok wea iumi talem for praisem Jehovah and olketa purpose bilong hem. Hebrews 13:15 hem sei: “Thru long [Jesus Christ] iumi mas evritaem givim wanfala sakrifaes bilong praise long God, hem nao, frut bilong mouth wea talemaot nem bilong hem long pablik.” Iumi hapi tumas from olketa spiritual sakrifaes bilong iumi hem, no samting wea iumi duim evritaem nomoa, bat hem wei wea iumi showimaot love bilong iumi for God witim full heart! Diswan lead go long mek-six point wea iumi savve kasem from Malachi chapter 1.
Each Wan Long Iumi Mas Givim Ansa Long God
17, 18. (a) Why nao Jehovah cursim “datwan wea iusim wei for trik”? (b) Wanem nao olketa wea iusim wei for trik no tingim?
17 Pipol wea stap long taem bilong Malachi garem responsibility for samting wea olketa duim, and iumi tu olsem. (Romans 14:12; Galatians 6:5) For fitim datwan, Malachi 1:14 hem sei: “Curse nao datwan wea iusim wei for trik taem hem garem wanfala man animal midolwan grup animal bilong hem, and hem mekem promis and sakrifaesim wanfala animal wea no mas gud long Jehovah.” Wanfala man wea garem grup bilong olketa animal and no just wanfala animal—maet wanfala sheep nomoa—so hem bae no savve chusim eniwan moa. Taem hem chusim wanfala animal for sakrifaes, hem no need for chusim wanfala wea blind, cripple, or sik. Sapos hem chusim nogud animal olsem, hem showimaot hem lukdaonem arrangement bilong Jehovah for givim sakrifaes, from man wea garem wanfala grup bilong olketa animal savve faendem wanfala wea no garem eni nogud samting!
18 Dastawe Jehovah garem gudfala reason for cursim datwan wea iusim trik, wea garem gudfala man animal bat tekem kam—maet hem mas pullim kam—wanfala animal wea blind, cripple, or sik long priest for sakrifaes. Nomata olsem, no eni samting showimaot sapos eni priest talem toktok from Law and explainim hao God no acceptim nogud animal olsem. (Leviticus 22:17-20) Eniwan wea garem balance tingting mas savve olketa bae kasem nogud samting sapos olketa trae for ravem governor bilong olketa taem olketa givim kaen present olsem long hem. Bat really olketa deal witim Sovereign bilong Universe, Jehovah, wea barava winim eni governor. Malachi 1:14 sei olsem abaotem diswan: “‘Mi wanfala nambawan King,’ Jehovah bilong olketa army hem talem, ‘and nem bilong mi bae samting wea mekem man fraet midolwan long olketa nation.’”
19. Wanem nao iumi barava laek kasem, and wanem nao iumi shud go ahed for duim?
19 Olsem olketa loyal servant bilong God, iumi luk forward long day wea evri man bae worshipim datfala Nambawan King, Jehovah. Long datfala taem, “earth bae fulap witim savve bilong Jehovah olsem wata hem kavarem sea.” (Isaiah 11:9) Bat go kasem datfala taem, iumi mas duim best bilong iumi for kasem olketa mark bilong God taem iumi followim example bilong man wea raetem psalm wea sei: “Mi bae mekhae long hem witim wei for sei thankiu.” (Psalm 69:30) For duim datwan, profesi bilong Malachi garem moa kaonsel wea savve helpem iumi. Long next tufala article, iumi bae careful for ting raonem olketa nara part bilong buk bilong Malachi.
Waswe, Iu Remember?
• Why nao iumi shud mekhae long Jehovah?
• Why nao Jehovah no acceptim olketa sakrifaes bilong olketa priest long taem bilong Malachi?
• Hao nao iumi savve offerim sakrifaes bilong praise long Jehovah?
• Wanem nao shud muvim man for givim tru worship?
[Piksa long page 9]
Profesi bilong Malachi point kam long taem bilong iumi
[Piksa long page 10]
Esau no tinghae long olketa holy samting
[Piksa long page 11]
Olketa priest and pipol offerim olketa sakrifaes wea God no acceptim
[Piksa long page 12]
Evriwea long world, Olketa Jehovah’s Witness offerim free olketa sakrifaes bilong praise