“Olketa Go Daon”
“Big sea kavarem olketa; olketa go daon insaed long wata olsem wanfala ston.”
MOSES and olketa Israelite singim toktok hia for celebratem wei wea olketa sev thru long Red Sea and dae bilong enemy bilong olketa—Pharaoh and army bilong hem.—Exodus 15:4, 5.
For eniwan wea lukim datfala spesol samting, leson hem klia. No eniwan savve win for challengem or againstim rul bilong Jehovah and stap laef. Bat, bihaen tu-thri month nomoa, samfala important Israelite man—Korah, Dathan, Abiram, and 250 wea saportim olketa—challengem paoa wea God givim long Moses and Aaron.—Numbers 16:1-3.
Jehovah talem Moses for warnim olketa Israelite for lusim olketa tent bilong olketa bighed pipol hia. Dathan and Abiram, witim famili bilong olketa, barava nating willing for change. Then Moses talem hao Jehovah bae showimaot klia long pipol hao olketa man hia “no showaot respect long Jehovah.” Long taem hia nao Jehovah openem graon andanit leg bilong olketa. “So olketa go daon, and evriwan wea saed witim olketa, laef yet taem olketa go insaed Sheol, and earth kavarem olketa.” Waswe long Korah and olketa nara bighed pipol wea saedem olketa? “Fire kamaot from Jehovah and start for bonem tu handred and fifti man wea offerim samting wea smel naes.”—Numbers 16:23-35; 26:10.
Pharaoh and army bilong hem, witim olketa wea bighed long wilderness, dae bikos olketa fail for luksavve long paoa wea Jehovah garem and wei wea hem interest long living bilong pipol bilong hem. Dastawe, hem important for evriwan wea laekem protection bilong Jehovah long olketa hard taem distaem for mas lane abaotem and obeyim Jehovah olsem “Most Hae” and “Olmaeti Wan.” Taem olketa duim olsem, olketa savve kasem strong from promis bilong Jehovah: “Wan thousand bae foldaon long saed bilong iu and ten thousand long raet hand bilong iu; hem bae no kam klosap long iu. Witim eye bilong iu nomoa bae iu lukluk go and lukim panis bilong olketa wicked wan. From iu sei: ‘Jehovah hem sef ples bilong mi,’ iu mekem Most Hae seleva hem ples bilong iu for stap.”—Psalm 91:1, 7-9.