Report Bilong Olketa wea Talemaot Kingdom

Faendem Truth Long Ples wea Man No Expectim

HEM will bilong God for “evri difren kaen man mas sev and kasem stretfala savve bilong truth.” (1 Timothy 2:3, 4) For kasem datfala goal, Olketa Jehovah’s Witness printim and givimaot planti million copy bilong Bible and buk for helpem man studyim Bible. Samfala taem, olketa buk hia helpem pipol wea garem honest heart for lanem truth long wei wea olketa no expectim. Hem nao samting wea olketa wea talemaot Kingdom long Freetown, Sierra Leone, talem experience abaotem.

Osman hem mek-tu son long wanfala famili wea garem naenfala pikinini. From hem growap long wanfala famili wea strong long religion, hem evritaem go for worship witim dadi bilong hem. Bat Osman barava feel nogud long wanem religion bilong hem teachim abaot hell. Hem no savve minim hao nao wanfala God wea garem mercy bae bonem wicked pipol long fire for mekem olketa safa. Evri samting wea olketa talem for helpem Osman minim hellfire nating satisfaem mind bilong hem.

Wanday, taem Osman hem 20 year, hem lukim wanfala blue buk insaed rabis-bin wea rabis klosap kavarem. From hem savve laekem tumas olketa buk, hem pikimap, klinim, and lukim datfala title—Truth Where Bringim Man Long Life All-the-way.a

‘Wanem truth nao diswan?’ Osman hem tingting. From hem interest tumas, Osman tekem datfala buk long haos and stretawe readim full buk. Hem hapi tumas for lanem hao God garem wanfala nem—Jehovah! (Psalm 83:18) Osman lanem tu hao love nao hem main fasin bilong God and hao datfala idea for mekem pipol safa long wanfala ples bilong fire hem samting wea God barava heitim. (Jeremiah 32:35; 1 John 4:8) Bihaen, Osman readim hao klosap nao Jehovah bae bringim wanfala paradaes long earth wea pipol savve stap olowe. (Psalm 37:29; Revelation 21:3, 4) Hem barava nambawan truth from wanfala God wea garem love and mercy! Osman thankiu long Jehovah from heart for letem hem faendem truth long ples wea hem no expectim.

Tu-thri day bihaen, witim help bilong samfala fren, Osman faendem Kingdom Hall bilong Olketa Jehovah’s Witness and attendim wanfala meeting for firstaem. Taem hem long there, hem askem wanfala Witness for studyim Bible witim hem. Nomata Famili bilong hem strong for againstim hem, Osman go ahed for grow long spiritual wei and hem baptaes. (Matthew 10:36) Distaem, hem serve olsem wanfala elder long kongregeson. Iumi sapraes hao evri samting hia kamaot from hem faendem wanfala Bible buk insaed rabis-bin!

[Footnote]