“Gohed Followim Olketa Tru Teaching”

1. Taem iumi storyim hao iumi kam insaed lo truth, hao nao datwan helpem iumi?

IUMI hapi tumas for savve hao gogo olketa brata and sista blo iumi kam insaed lo truth. And iumi laek for storyim tu wat nao mekem iumi tinghae lo truth. Maet hem gud for askem olketa narawan, “Hao nao gogo iu savve lo Jehovah and disaed for kamap wanfala Jehovah’s Witness?” (Rome 1:11) Olketa story olsem savve helpem iumi for gohed tinghae lo truth. And tu, datwan bae helpem iumi for disaed strong for “gohed followim olketa tru teaching,” wea minim for iumi gohed duim wanem Jehovah hapi lo hem.​—3 John 4.

2. Wat nao bae iumi storyim lo disfala article?

² Lo disfala article, bae iumi storyim samfala reason why iumi tinghae lo olketa tru teaching. Then bae iumi storyim tu wanem iumi savve duim wea showimaot iumi gohed tinghae lo truth. Diswan bae helpem iumi for barava tinghae lo wanem Jehovah duim for leadim iumi kam insaed lo truth. (John 6:44) And tu, datwan bae helpem iumi for laek storyim olketa tru teaching lo Bible witim olketa narawan.

WHY IUMI TINGHAE LO “OLKETA TRU TEACHING”

3. Wat nao wanfala main reason why iumi tinghae lo olketa tru teaching?

³ Iumi garem staka reason for tinghae lo olketa tru teaching. Main reason, hem bikos iumi lovem Jehovah God, wea olketa tru teaching kam from hem. Toktok blo hem insaed Bible helpem iumi for savve hao hem garem bigfala paoa and hem wakem heven and earth, bat hem wanfala Dadi wea lovem iumi and barava tingim iumi tu. (1 Pet. 5:7) Iumi savve hem God wea “showimaot mercy and wea kaen tumas, no savve kros kwiktaem, garem bigfala love, and evritaem duim wanem hem talem.” (Ex. 34:6, NWT) Jehovah hem God blo justice. (Aesaea 61:8) Hem sorre tumas taem hem lukim iumi kasem olketa nogud samting, and hem luk forward for taem wea hem bae finisim evri nogud samting hia. (Jeremaea 29:11) Iumi tu luk forward for datfala taem! Datwan hem wanfala reason why iumi barava lovem Jehovah!

4-5. Why nao aposol Paul sei hope blo iumi hem olsem wanfala anka?

⁴ Wat nao nara reason why iumi tinghae lo olketa tru teaching? Taem iumi savve lo olketa tru teaching lo Bible, datwan barava helpem iumi. Tingim wanfala example. Wanem Bible teachim hem mekem iumi garem hope. Paul storyim hao hope savve helpem iumi. Hem sei: “Disfala hope wea hem olsem wanfala anka for laef bilong iumi hem strong and stedy.” (Heb. 6:19) Olsem anka hem helpem boat for stedy, hope blo iumi savve helpem iumi for no wari tumas taem iumi feisim olketa problem.

⁵ Nomata Paul storyim hope wea olketa anointed Christian garem for go lo heven, wanem hem storyim hem fitim tu olketa Christian wea luk forward for laef olowe lo paradaes lo earth. (John 3:16) Tru nao, taem iumi lane abaotem datfala hope for laef olowe, laef blo iumi hem garem mining.

6-7. Taem Yvonne lanem wanem Bible talem abaotem future, hao nao datwan helpem hem?

⁶ Tingim experience blo wanfala sista wea nem blo hem Yvonne. Hem no growap lo truth, and taem hem pikinini hem fraetem tumas dae. Hem readim wanfala toktok wea hem no savve forgetim, wea sei: “Wanday bae no eni tumoro.” Hem sei: “Mi savve tingim datfala toktok lo naet and hem savve mekem mi wari tumas abaotem future bikos mi no laek for dae! Bat mi savve tingim tu, ‘Hao, laef blo mi hem olsem nomoa? Why nao mi laef?’”

⁷ Gogo, taem Yvonne kamap teenager hem meetim Olketa Jehovah’s Witness. Hem sei: “Mi start for luksavve maet mi savve laef olowe lo Paradaes lo earth.” Taem sista blo iumi lanem wanem Bible teachim, hao nao datwan helpem hem? Hem sei: “Distaem mi no wekap lo naet and wari abaotem future or dae.” Yvonne barava tinghae lo truth wea hem lanem lo Bible, and hem barava laek for storyim hope blo hem for future lo olketa narawan.​—1 Tim. 4:16.

8-9. (a) Lo tokpiksa blo Jesus, hao nao wanfala man ting lo treasure wea hem faendem? (b) Why nao iu tinghae lo truth wea iumi lanem lo Bible?

⁸ Nara samting wea Bible teachim tu, hem gud nius abaotem Kingdom blo God. Jesus markem datfala Kingdom witim wanfala treasure wea stap haed. Lo Matthew 13:44 Jesus sei: “Kingdom bilong God hem olsem wanfala expensive samting wea stap haed long wanfala pis land, wea wanfala man faendem datwan and hem haedem moa. Then, from hem hapi tumas hem go salem evri samting wea hem garem and baem datfala pis land.” Datfala man hem no lukaotem datfala treasure, bat taem hem faendem, hem salem evri samting wea hem garem for baem datfala pis land mekem hem ownim datfala treasure. Why nao hem duim olsem? Bikos hem savve datfala treasure hem expensive samting wea gud winim eni nara samting wea hem garem.

⁹ Masbi iumi tu garem sem tingting olsem abaotem truth wea iumi lanem lo Bible. Iumi luksavve for worshipim Jehovah distaem, and hope wea iumi garem for laef olowe anda lo Kingdom blo God, hem gud winim eni samting lo world. Iumi garem privilege for fren witim Jehovah and datwan hem winim eni sakrifaes wea iumi mekem. Taem iumi “mekem hem hapi,” datwan mekem iumi hapi tumas.​—Col. 1:10.

10-11. Why nao Michael willing for changem laef blo hem?

¹⁰ Staka lo iumi mekem olketa big sakrifaes for mekem Jehovah hapi lo iumi. Samfala lusim waka blo olketa lo world wea pipol tinghae lo hem. Olketa narawan stop for aftarem selen. And samfala narawan barava changem laef blo olketa taem olketa lane abaotem Jehovah. Hem nao wat Michael duim. Hem no growap lo truth, and taem hem young hem lanem karate. Hem sei: “Mi laekem tumas for exercise mekem mi fit and strong, bikos hem savve mekem mi feel olsem mi savve winim eniwan.” Bat taem Michael start for studyim Bible, hem lanem hao Jehovah no laekem pipol blo hem for raf. (Ps. 11:5, NWT) Michael storyim Witness couple wea studyim Bible witim hem. Hem sei: “No enitaem tufala talem mi for stop for duim karate. Tufala gohed nomoa for teachim mi olketa tru samting wea Bible teachim.”

¹¹ Taem Michael gohed lane abaotem Jehovah, datwan strongim love blo hem for Jehovah. Hem barava tinghae lo hao Jehovah lovem pipol blo hem. Gogo, Michael luksavve hem need for changem laef blo hem. Hem sei: “Mi savve bae hem no isi for mi stop for duim karate. Bat mi savve sapos mi stop mi bae mekem Jehovah hapi, and mi sure for worshipim hem, hem winim eni sakrifaes mi mekem.” Michael tinghae lo olketa tru teaching wea hem lanem lo Bible, and datwan mekem hem willing for changem laef blo hem.​—Jas. 1:25.

12-13. Hao nao Bible helpem Mayli for luksavve lo truth?

¹² Nara reason iumi tinghae lo olketa tru teaching lo Bible, hem bikos Bible hem olsem laet wea shaen lo ples wea dark. (Sams 119:105; Eph. 5:8) Mayli, wanfala sista from Azerbaijan, tinghae lo hao Bible helpem hem for luksavve lo truth. Taem hem smol, dadi blo hem Muslim and mami blo hem lo Jew religion. Hem sei: “Mi savve God hem stap, bat mi garem staka kwestin abaotem God. Mi laek savve, ‘Why nao God wakem iumi olketa man? And why nao iumi gohed safa taem iumi laef, then bihaen iumi dae iumi gohed safa lo hell?’ From pipol sei evriting wea happen hem followim will blo God, mi laek for savve, ‘Waswe, God kontrolem iumi, then hem hapi nomoa for lukim iumi safa?’”

¹³ Mayli gohed for lukaotem ansa for olketa kwestin wea hem garem. Gogo hem studyim Bible and hem kamap wanfala Jehovah’s Witness. Hem sei: “Wanem Bible teachim hem mek sense lo mi. Then taem mi followim wanem mi lanem, laef blo mi gud and mi garem peace.” Olsem Mayli, iumi evriwan praisem Jehovah, wea “kolem [iumi] kamaot from darkness and tekem [iumi] go insaed long nambawan laet bilong hem.”—1 Pet. 2:9.

14. Wanem nao bae helpem iumi for tinghae lo truth? (Lukim tu datfala box “Bible Markem Truth Witim Olketa Nara Samting.”)

¹⁴ Iumi storyim samfala example nomoa lo why iumi tinghae lo truth. Masbi iu savve tingim staka nara reason tu. Bae hem gud for duim study project abaotem olketa nara subject wea bae helpem iumi for tinghae lo truth. Datwan bae helpem iumi for showimaot hao iumi tinghae lo truth.

HAO IUMI SHOWIMAOT IUMI TINGHAE LO TRUTH

15. Wat nao wanfala samting wea iumi savve duim wea showimaot iumi tinghae lo truth?

¹⁵ Iumi savve showimaot iumi tinghae lo truth taem iumi studyim Bible and olketa Bible pablikeson evritaem. Nomata iumi stap longtaem lo truth, iumi savve gohed lanem moa samting. Firstfala Watchtower magasin wea olketa pablisim hem sei: “Truth hem olsem flaoa wea stap midolwan lo olketa nila grass bikos hem hard for faendem. For man faendem truth hem mas barava lukaotem bikos staka laea teaching hem stap. . . . So hem mas barava waka hard for faendem. Hem no inaf for savve lo samfala samting nomoa. . . . Gohed for lanem olketa tru teaching lo Bible.” Hem tru, hem no isi for duim personal study, bat hem savve barava helpem iumi.

16. Wanem idea for duim study seleva nao iu faendem hem gud? (Provebs 2:4-6)

¹⁶ Maet iumi no laek for duim reading or for duim study seleva. Bat Jehovah laekem iumi for “traehad fo lukaotem” olketa tru teaching lo Bible mekem iumi minim gud olketa teaching hia. (Readim Provebs 2:4-6.) Taem iumi readim and studyim Bible, datwan bae helpem iumi. Corey sei taem hem duim Bible reading, hem readim wanfala verse, then hem chekim olketa footnote and cross-reference wea join witim datfala verse, and duim eni extra research lo hem. Then hem readim next verse and duim sem samting. Hem sei: “Disfala wei for study helpem mi for lanem staka samting!” Nomata iumi followim disfala idea for study or nara idea, iumi showimaot iumi tinghae lo truth from iumi spendem taem and waka hard for duim study.​—Sams 1:1-3.

17. Wat nao iumi savve duim for mek sure iumi followim olketa tru teaching lo Bible? (James 1:25)

¹⁷ Nomata hem gud for studyim Bible datwan no inaf. For kasem gud samting from study wea iumi duim, iumi mas followim wanem iumi lanem. Datwan nomoa savve mekem iumi for hapi. (Readim James 1:25.) Wat nao iumi savve duim for mek sure iumi followim olketa tru teaching lo Bible? Wanfala brata sei hem gud for chekim iumiseleva for lukim sapos iumi followim wanem iumi lanem and wanem iumi need for waka lo hem. Aposol Paul sei: “Nomata iumi kamap strong finis, iumi mas gohed for followim sem wei wea iumi followim kam kasem distaem.”​—Phil. 3:16.

18. Why nao iumi laek for “gohed followim olketa tru teaching”?

¹⁸ Tingim olketa gud samting iumi kasem taem iumi “gohed followim olketa tru teaching”! Laef blo iumi hem kamap gud, and tu, iumi mekem Jehovah and olketa brata and sista hapi. (Provebs 27:11; 3 John 4) So iumi garem staka reason for tinghae lo olketa tru teaching lo Bible and for gohed followim olketa teaching hia.