Gohed “Strongim Narawan”

1. Olsem 1 Thessalonica 5:11 storyim, wat kaen waka nao iumi evriwan savve duim?

WASWE, enitaem kongregeson blo iu buildim or renovatim Kingdom Hall blo iufala? Sapos olsem, maet iu no savve forgetim first meeting wea iu attendim lo datfala niu Kingdom Hall. Iu barava tinghae lo wanem Jehovah duim for iufala. Maet from iu hapi tumas iu klosap krae taem evriwan singim firstfala song lo datfala meeting. Olketa naesfala Kingdom Hall blo iumi mekhae lo Jehovah. Bat iumi barava mekhae lo Jehovah taem iumi duim nara waka, wea hem nao for strongim olketa brata and sista wea meet tugeta lo olketa Kingdom Hall hia. Aposol Paul storyim diswan taem hem raetem datfala toktok lo 1 Thessalonica 5:11, wea hem theme scripture blo disfala article.​—Readim.

2. Wat nao bae iumi storyim lo disfala article?

² Aposol Paul showimaot nambawan example lo hao for strongim olketa brata and sista. Hem evritaem tingim feeling blo olketa. Lo disfala article, bae iumi storyim hao hem helpem olketa brata and sista lo kongregeson for (1) deal witim olketa hard taem, (2) keepim peace witim each other, and (3) strongim faith blo olketa lo Jehovah. Bae iumi storyim hao iumi savve followim example blo Paul distaem for strongim olketa brata and sista.​—1 Cor. 11:1.

PAUL HELPEM OLKETA BRATA AND SISTA FOR DEAL WITIM OLKETA HARD TAEM

3. Wanem balance tingting nao Paul garem abaotem waka?

³ Paul lovem tumas olketa brata and sista blo hem. Hem kasem staka hard taem lo laef blo hem, so hem minim feeling blo olketa and sorre lo olketa taem olketa feisim hard taem. Wantaem, from Paul short lo selen hem mas faendem waka for selen for sapotim hemseleva and olketa fren blo hem. (Acts 20:34) Waka blo Paul hem for wakem tent, so taem hem arrive lo Corinth hem waka witim Aquila and Priscilla wea tufala tu wakem tent. Bat lo “evri Sabbath” hem savve preach lo olketa Jew and pipol blo Greece. Then taem Silas and Timothy arrive, Paul “barava busy nao for preachim message bilong God.” (Acts 18:2-5) Diswan showimaot Paul garem balance tingting abaotem waka, and worship blo hem for Jehovah nao main samting lo laef blo hem. So Paul fit for encouragem olketa brata and sista. Hem remindim olketa hao hard taem and waka for provaed for famili, shud no stopem olketa for duim olketa “barava important” samting, wea hem nao for worshipim Jehovah.​—Phil. 1:10.

4. Hao nao Paul and Timothy helpem olketa brata and sista lo Thessalonica taem pipol againstim olketa?

⁴ No longtaem bihaen kongregeson lo Thessalonica start, olketa brata and sista kasem hard taem from samfala pipol againstim olketa. Taem olketa pipol hia lukaotem Paul and Silas bat no faendem tufala, olketa tekem ‘samfala brata go long olketa bigman bilong taon,’ and singaot olsem: “Evriwan hia olketa againstim law bilong King.” (Acts 17:6, 7) Olketa brata and sista hia mas barava seke taem pipol lo datfala taon againstim olketa. Datwan fit for mekem olketa for wikdaon lo spiritual wei, bat Paul no laekem datwan for happen. Nomata hem and Silas mas go from olketa, tufala mek sure olketa brata and sista hia kasem help wea olketa needim. Paul sei lo olketa: “Mifala sendem kam brata bilong iumi Timothy . . . Hem bae strongim and comfortim iufala for helpem faith bilong iufala, mekem olketa hard taem hia no spoelem faith bilong eniwan.” (1 Thess. 3:2, 3) Luk olsem taem Timothy hem stap lo hom kongregeson blo hem lo Lystra, pipol againstim olketa brata and sista lo there. Timothy lukim hao Paul strongim olketa. From Timothy lukim hao Jehovah stap witim olketa lo datfala taem, hem fit for encouragem olketa brata and sista lo Thessalonica for tingim hao Jehovah bae helpem olketa tu.​—Acts 14:8, 19-22; Heb. 12:2.

5. Hao nao wanfala elder helpem Bryant?

⁵ Wat nao nara samting wea Paul duim for strongim olketa brata and sista? Taem Paul and Barnabas go bak moa lo Lystra, Iconium, and Antioch, tufala “markem samfala man . . . for elder long olketa kongregeson.” (Acts 14:21-23) Masbi olketa elder barava comfortim olketa kongregeson hia, olsem olketa elder duim distaem. Tingim wanem wanfala brata wea nem blo hem Bryant talem. Hem sei: “Taem mi 15 years, dadi lusim famili blo mifala and mami hem disfellowship. Mi discourage and feel olsem mi stap seleva.” Wat nao helpem Bryant for deal witim datfala hard taem? Hem sei: “Tony, wanfala elder, savve story witim mi lo olketa meeting and lo olketa nara taem. Hem storyim olketa narawan wea gohed hapi nomata olketa kasem hard taem. Hem savve readim Sams 27:10 witim mi, and staka taem hem storyim Hezekiah wea gohed faithful for worshipim Jehovah nomata dadi blo hem no showimaot gud example.” Wanem gud samting nao Bryant kasem from elder hia helpem hem? Hem sei: “From Tony hem encouragem mi, gogo mi pioneer and datwan mekem mi barava hapi.” Olketa elder, hem gud for lukaotem chance for talem olketa “gud toktok” lo olketa wea needim encouragement olsem Bryant.​—Provebs 12:25.

6. Wanem moa Paul duim for strongim olketa brata and sista?

⁶ Paul remindim olketa brata and sista blo hem hao “bigfala sekson bilong olketa witness” fit for deal witim olketa hard samting bikos Jehovah strongim olketa. (Heb. 12:1) Paul luksavve hao example blo olketa wea faithful lo bifor savve helpem olketa brata and sista hia for gohed garem faith lo Kingdom blo God. (Heb. 12:22) Distaem tu, hem barava strongim iumi taem iumi read abaotem hao Jehovah helpem Gideon, Barak, David, Samuel, and olketa narawan. (Heb. 11:32-35) And example blo olketa faithful brata and sista distaem tu savve strongim iumi. Staka taem olketa brata and sista raet kam lo mifala lo world hedquarter, for talem hao taem olketa readim laef story blo olketa faithful brata and sista, datwan barava strongim faith blo olketa.

PAUL HELPEM OLKETA BRATA AND SISTA FOR KEEPIM PEACE WITIM EACH OTHER

7. Wat nao iumi lanem from kaonsel blo Paul lo Rome 14:19-21?

⁷ Iumi strongim olketa brata and sista taem iumi waka hard for keepim peace insaed kongregeson. Sapos iumi no agree witim samwan abaotem wanfala samting iumi no laekem datwan for divaedem iumi, and especially sapos datwan no brekem eni Bible principle. Tingim disfala example. Kongregeson lo Rome garem olketa Christian wea Jew and no Jew. Taem Law blo Moses hem finis, olketa Christian hia no need for followim nao law wea stopem olketa Jew for no kaikaim samfala kaikai. (Mark 7:19) So start lo datfala taem, samfala Jew Christian feel free for kaikaim evri difren kaen kaikai. Bat olketa nara Jew Christian tingse datwan no stret. Datwan mekem olketa lo kongregeson no wan mind. Paul showimaot hao hem important for keepim peace taem hem sei: “Hem gud for no kaikaim meat, drinkim wine, or duim eni samting wea savve spoelem faith bilong brata bilong iu.” (Readim Rome 14:19-21.) Paul helpem olketa Christian hia for luksavve raoa savve spoelem wan mind insaed kongregeson or savve mekem wanfala Christian for no stap gud witim narawan. Paul tu willing for changem wei blo hem mekem olketa narawan no stambol. (1 Cor. 9:19-22) Iumi tu savve strongim olketa narawan and keepim peace sapos iumi no forcem olketa narawan for followim tingting blo iumi.

8. Wat nao Paul duim for keepim peace insaed kongregeson taem hem no agree witim olketa narawan?

⁸ Paul showimaot gud example for keepim peace witim olketa wea no agree witim hem abaotem wanfala important samting. For example, samfala insaed kongregeson lo first century sei olketa wea no Jew wea kamap Christian mas circumcise, maet for mekem olketa Jew no tok spoelem olketa. (Gal. 6:12) Paul no agree witim datwan, bat hem no forcem olketa for followim tingting blo hem. Hem hambol for askem advaes lo olketa aposol and elder lo Jerusalem. (Acts 15:1, 2) From Paul duim olsem, olketa Christian hia gohed hapi and keepim peace insaed kongregeson.​—Acts 15:30, 31.

9. Hao nao iumi savve followim example blo Paul?

⁹ Sapos iumi no agree witim narawan abaotem wanfala important samting, hem gud for askem advaes from olketa elder, for keepim peace insaed kongregeson. Staka taem olketa savve faendem advaes from Bible lo olketa pablikeson or lo olketa gaedlaen wea kam from organization. Sapos iumi followim olketa advaes hia and no forcem narawan for followim tingting blo iumi, bae iumi help for keepim peace insaed kongregeson.

10. Wanem moa Paul duim for keepim peace insaed kongregeson?

¹⁰ For keepim peace, Paul no storyim wik point blo olketa brata and sista bat hem storyim nao olketa gudfala wei blo olketa. For example, lo end lo leta blo hem for olketa lo Rome, Paul talem nem blo staka pipol, and hem talem gud samting abaotem klosap evriwan hia. Iumi savve followim example blo Paul taem iumi storyim olketa gudfala wei blo olketa brata and sista. Datwan bae strongim olketa brata and sista for fren gud tugeta, and strongim tu love insaed kongregeson.

11. Hao nao iumi savve mek peace, sapos iumi no agree witim each other?

¹¹ Samfala taem, olketa mature Christian savve raoa or no agree witim each other. Hem nao samting wea happen lo Paul and fren blo hem Barnabas. Barnabas laek for tekem Mark lo next missionary gogo blo tufala, bat Paul no agree witim datwan. Tufala “barava raoa nao,” then tufala go difren. (Acts 15:37-39) Bat gogo Paul, Barnabas, and Mark mek peace, and datwan showimaot olketa laekem kongregeson for garem peace and wan mind. Bihaen, Paul talem gud samting abaotem Barnabas and Mark. (1 Cor. 9:6; Col. 4:10) Iumi tu need for mek peace witim eniwan wea iumi raoa witim lo kongregeson, and then gohed for tingim olketa gudfala wei blo hem. Datwan bae mekem kongregeson for garem peace.​—Eph. 4:3.

PAUL STRONGIM FAITH BLO OLKETA BRATA AND SISTA BLO HEM

12. Wat nao samfala hard taem wea olketa brata and sista feisim distaem?

¹² Iumi strongim olketa brata and sista blo iumi taem iumi helpem olketa for garem strongfala faith lo Jehovah. Samfala kasem hard taem from olketa famili member wea no insaed truth, or from olketa workmate or skulmate blo olketa. Samfala wikdaon bikos olketa kasem big sik or from samwan duim samting wea mekem olketa feel nogud. Hem no isi for samfala Christian wea baptaes for longtaem finis bikos olketa weit longtaem for end hem kam. Olketa samting hia savve testim faith blo olketa. Samfala Christian lo first century feisim olketa semkaen test tu. Wat nao Paul duim for strongim faith blo olketa brata and sista?

13. Hao nao Paul helpem olketa Jew Christian wea famili member againstim olketa?

¹³ Paul iusim toktok blo God for strongim faith blo olketa brata and sista. For example, olketa Jew Christian maet no savve wanem for talem taem olketa famili member wea no Christian sei Jew religion hem winim Christian religion. Masbi leta wea Paul raetem lo olketa Hebrew Christian barava strongim olketa hia. (Heb. 1:5, 6; 2:2, 3; 9:24, 25) Olketa savve iusim wanem Paul talem for ansarem olketa famili member hia. Distaem, iumi savve helpem olketa brata and sista for iusim olketa Bible pablikeson for ansarem olketa famili member wea againstim olketa. And sapos olketa skulmate tok spoelem olketa young wan from olketa biliv lo creation, iumi savve helpem olketa for faendem information lo olketa brochure olsem Was Life Created? and The Origin of Life—Five Questions Worth Asking. Datwan savve helpem olketa for explainim why olketa biliv lo creation.

14. Nomata Paul busy for duim preaching and teaching waka, wat moa hem duim?

¹⁴ Paul encouragem olketa brata and sista for showimaot love and “duim olketa gudfala samting.” (Heb. 10:24) Paul no just talem olketa nomoa, bat hemseleva duim datwan. For example, taem wanfala big hangre kasem olketa Christian lo Judea, Paul help for tekem go samfala samting wea olketa needim. (Acts 11:27-30) Nomata Paul busy for duim preaching and teaching waka, hem evritaem lukaotem wei for helpem olketa wea garem need. (Gal. 2:10) Datwan helpem olketa for trustim hao Jehovah bae lukaftarem olketa. Sapos iumi iusim taem, strong, and savve blo iumi for duim disaster relief waka, iumi savve strongim tu faith blo olketa brata and sista. Nara samting iumi savve duim tu hem for givim donation for sapotim waka raonem world. Olketa samting hia savve helpem olketa brata and sista for trustim hao Jehovah bae no lusim olketa.

15-16. Hao nao iumi savve helpem samwan wea faith blo hem wikdaon?

¹⁵ Paul no givap for helpem olketa wea faith blo olketa wikdaon. Hem tingim feeling blo olketa and story kaen lo olketa. (Heb. 6:9; 10:39) For example, taem Paul givim kaonsel lo leta blo hem for olketa Hebrew Christian, staka taem hem iusim datfala toktok “iumi” for showimaot hem tu followim datfala kaonsel. (Heb. 2:1, 3) Olsem Paul, iumi no givap for helpem olketa wea faith blo olketa hem wikdaon. Bat iumi savve strongim olketa taem iumi showimaot iumi interest lo olketa. Datwan showimaot iumi lovem olketa. Taem iumi story lo kaenfala wei, datwan bae encouragem olketa.

¹⁶ Paul talem olketa brata and sista hao Jehovah hem lukim olketa gudfala samting wea olketa duim. (Heb. 10:32-34) Taem iumi trae for helpem samwan wea faith blo hem wikdaon, iumi savve talem samting for encouragem hem. Maet iumi askem hem for storyim hao gogo hem kam insaed lo truth or for ting abaotem olketa samting wea Jehovah duim for helpem hem bifor. Iumi savve talem hem hao Jehovah no forgetim olketa gudfala samting wea hem duim and hao Jehovah bae no enitaem lusim hem. (Heb. 6:10; 13:5, 6) Olketa story olsem savve encouragem samwan wea faith blo hem wikdaon for no givap for worshipim Jehovah.

‘GOHED FOR ENCOURAGEM NARAWAN’

17. Hao nao iumi savve kamap gud lo hao for strongim olketa narawan?

¹⁷ Samwan wea duim construction waka bae duim staka samting for kamap gud lo datfala waka. Olsem tu, iumi savve duim staka samting for strongim narawan. Iumi savve storyim example blo olketa lo bifor wea no givap. Iumi savve keepim peace taem iumi storyim olketa gudfala wei blo narawan, iumi mas keepim peace witim olketa wea no agree witim iumi, and iumi shud mek peace witim eniwan wea iumi raoa witim lo kongregeson. And iumi savve strongim faith blo olketa brata and sista taem iumi iusim Bible for encouragem olketa, duim olketa gudfala samting for helpem olketa, and helpem olketa taem faith blo olketa wikdaon.

18. Wat nao iu laek for duim?

¹⁸ Olketa wea wakem olketa Kingdom Hall olketa hapi and satisfae. Iumi tu savve hapi and satisfae taem iumi duim datfala waka for strongim olketa brata and sista lo kongregeson. Gogo, wanfala building savve kamap nogud, bat taem iumi helpem samwan datwan savve helpem hem for olowe! So iumi laek for “gohed for encouragem and strongim narawan.”​—1 Thess. 5:11.