Hao, Distaem Truth Hem No Important Nao?

Lo tingting blo iu, hao, distaem hem moa hard for lukim klia difference between wat nao truth and wat nao false? Pipol distaem duim tings nomoa followim feeling and biliv blo olketa seleva winim wat nao truth and facts. For example, disfala word “post-truth,” wea hem niu word wea pipol inventim for describem datkaen situation, hem word wea popular distaem.a Diswan hem tru samting lo full world, bikos staka pipol bilivim dat truth hem no exist.

Datkaen tingting hem no niu samting. Samting olsem 2,000 years ago, Roman Governor Pontius Pilate askem Jesus olsem for mekfani lo hem: “Wanem nao tru samting?” (John 18:38) Nomata Pilate no laek herem ansa blo Jesus, kwestin wea hem askem hem important. Bible givim ansa wea savve mekem iu satisfae, and hem savve helpem iu for savve wat nao truth and wat nao false lo disfala world wea pipol konfius abaotem datwan.

Hao, truth hem even exist?

Yes. Bible iusim word “truth” for storyim olketa facts and wat hem morally raet. Hem teachim dat Jehovahb God hem Source blo absolute truth, and kolem hem lo “God blo truth.” (Psalm 31:5) Bible storyim truth from God, and hem sei truth hem olsem laet, bikos datwan savve gaedem iumi lo staka samting lo world distaem wea mekem pipol konfius.—Psalm 43:3; John 17:17.

Hao nao iu savve faendem truth?

God no laekem for iumi acceptim blind nomoa truth wea stap lo Bible. Bat, hem invaetem iumi for iusim gudfala tingting for ting raonem wat Bible talem winim for followim feeling blo iumi nomoa. (Rome 12:1) Hem laekem iumi for iusim “full mind” blo iumi for lane abaotem hem and lovem hem, and hem encouragem iumi for pruvim lo iumi seleva dat wat iumi lanem lo Bible hem tru.—Matthew 22:37, 38; Acts 17:11.

Hu nao startim wei for laea?

Bible sei wei for laea hem start witim enemy blo God, Satan the Devil, wea Bible kolem hem lo “dadi blo wei for laea.” (John 8:44) Hem talem laea story abaotem God lo tufala first human. (Genesis 3:1-6, 13, 17-19; 5:5) Start lo dat taem, Satan hem continue for spredim olketa laea story and haedem truth abaotem God.—Revelation 12:9.

Why nao wei for laea hem normal samting distaem?

Taem wea iumi stap lo hem Bible kolem lo “olketa last day,” and influence blo Satan for misleadim pipol hem big tumas. Hem normal for pipol laea lo others for misleadim and tek advantage lo olketa. (2 Timothy 3:1, 13) Hem common samting for staka religion distaem teachim olketa false idea. For followim wat Bible profesi talem abaotem taem blo iumi, pipol “lukaotem olketa teacher wea talem nomoa samting wea olketa laekem tumas for herem,” and pipol “les for lisin long olketa tru teaching.”—2 Timothy 4:3, 4.

Why nao truth hem important?

Truth hem basis for trust wea pipol garem for each other. If trust no stap, bae olketa frenship and society brekdaon. Bible sei God laekem worship blo iumi for base lo truth. Hem sei: “Olketa wea worshipim [God] mas worshipim hem followim holy spirit and followim samting wea tru.” (John 4:24) For lane abaotem hao Bible truth savve helpem iu for identifyim olketa false idea wea olketa religion teachim and for no letem olketa laea idea hia for kontrolem laef blo iu, readim article series wea garem title “Lies That Make God Seem Unlovable.”

Why nao God laekem mi for savve lo truth?

God laekem iu for sev, and iu need for lanem truth abaotem hem mekem iu kasem datwan. (1 Timothy 2:4) If iu lanem olketa standard blo God abaotem wat hem stret and wat hem no stret and iu live followim olketa standard hia, iu bae klos fren witim God. (Psalm 15:1, 2) For helpem pipol lanem truth, God sendem Jesus kam lo earth. God laekem iumi for followim wat Jesus teachim.—Matthew 17:5; John 18:37.

Hao, enitaem God bae finisim wei for laea?

Yes. God heitim wei for laea lo others for tek advantage lo olketa. Hem promisim dat bae hem distroem from earth pipol wea chus for gohed laea. (Psalm 5:6) Taem God duim datwan, hem bae mekem disfala promis blo hem for fulfill: “Lips wea tok tru bae stap for olowe.”—Proverbs 12:19.