Olketa Problem Bilong Man—Waswe, Bae Olketa Savve Finis?
“WAN quarter long population bilong world garem poor living, 1.3 billion kasem samting olsem $6 nomoa evriday, 1 billion no savve read or raet, 1.3 billion no garem gud wata for drinkim and 1 billion olketa hangre evriday.” Hem nao samting wea wanfala report from Ireland hem sei abaotem world distaem.
Hem wanfala sorre pruv wea showimaot wei wea man no savve faendem wei for finisim for olowe olketa problem long world! Taem iumi luksavve hao main pipol wea olketa problem hia affectim hem olketa woman and pikinini hem mekem iumi sorre tumas. Hem nogud tumas hao nomata distaem, long mek-21 century, “evriday namba bilong olketa hia wea no garem freedom wea olketa fit for kasem hem grow gogo man no fit for kaontem.”—The State of the World’s Children 2000.
“Wanfala Niu World Insaed Wanfala Genereson”
United Nations Children’s Fund talemaot hao “feeling for lus hope wea kamap from olketa samting olsem wea spoelem man, . . wea affectim laef bilong planti pipol evriwea long world, savve finis.” Datfala organization sei barava nogud living wea planti billion pipol hia mas deal witim hem samting wea man “savve missim and savve changem.” For tok stret, olketa askem “evri pipol for mekem kamap wanfala niu world insaed wanfala genereson.” Olketa hope hao diswan hem bae wanfala world wea evri man bae “kamap free from poor living and wei for daonem man, free from raf fasin and sik.”
Olketa wea tingting olsem kasem encouragement from olketa lukim hao nomata distaem samfala pipol wea showimaot fasin for kea duim bigfala waka for katem daon olketa sorre samting wea kamap from “olketa wei for faet and olketa bigfala problem wea luk olsem no garem eni end.” Olsem example, insaed 15 year wea go pas, datfala Chernobyl Children’s Project “hem go ahed help for katem daon wei for safa wea kasem planti handred pikinini wea kasem cancer from datfala nuclear disaster.” (The Irish Examiner, April 4, 2000) Olketa organization wea givim help for olketa wea garem need nomata olketa big or smol barava helpem planti pipol wea war and disaster affectim laef bilong olketa.
Nomata olsem, olketa wea duim diskaen waka for givim help luksavve hao hem no isi for finisim olketa problem olsem. Olketa savve hao olketa problem hia “hem moa big and moa hard for finisim winim 10-fala year bifor.” David Begg, wanfala bigman bilong Concern, datfala organization long Ireland for givim help, talem hao “olketa wakman, olketa wea givim saport and wea givim selen barava duim big waka” taem Mozambique kasem olketa flood. “Bat,” hem sei moa, “mifala seleva hard for winim kaen disaster olsem from olketa big tumas.” Long saed bilong wei for givim help long Africa, hem tok stret olsem: “Lelebet reason for garem hope wea stap hem olsem wanfala kandol wea no laet big.” Planti pipol bae ting hao toktok bilong hem barava fitim full world tu.
Waswe, iumi fit for expectim datfala hope for “wanfala niu world insaed wanfala genereson” for fulfill? Nomata olketa organization wea givim help duim gudfala waka, hem bae gud sapos iumi lukluk long narafala wei for kasem wanfala raeteous and peaceful niu world. Bible point go long datwan, olsem bae iumi lukim long next article.
[Piksa Credit Line long page 2]
Page 3, olketa pikinini: UN/DPI Photo by James Bu