Report Bilong Olketa wea Talemaot Kingdom
‘Word Bilong God Hem Garem Paoa for Duim Samting’
LONG Caribbean island bilong Jamaica, planti pipol savve long Bible. Tru nao, klosap evri haos garem King James Version Bible, and samfala pipol luksavve finis wei wea “word bilong God hem laef and garem paoa for duim samting.” (Hebrews 4:12) Disfala paoa savve changem laef, olsem disfala experience hem showimaot.
Wanfala man wea nem bilong hem Cleveland hem just kam bak long haos from waka taem wanfala Jehovah’s Witness visitim hem. Bihaen hem storyim samfala point from Bible witim hem, datfala Witness leavim witim hem wanfala buk for studyim Bible wea garem nem Savvy Wea Lead Go long Laef Olawe. Cleveland no savve hao Word bilong God bae affectim laef bilong hem long barava bigfala wei.
Cleveland savve prea thrifala taem evriday for askem God for helpem hem faendem stretfala wei for worshipim Hem. Cleveland barava sure dadi and mami bilong hem no worship long stretfala wei, bat bihaen hem lukluk long olketa nara religion, hem no satisfae. Hem herem story abaotem Olketa Jehovah’s Witness, bat hem daotem dat olketa nao garem truth. Nomata hem garem daot, Cleveland agree for studyim Bible witim datfala Witness wea kam long haos bilong hem. Why? Bikos hem want for pruvim wei wea olketa Witness rong!
No longtaem bihaen, Cleveland luksavve hao dirty fasin wea hem go ahed for duim witim tufala difren woman hem samting wea God no hapi long hem. (1 Corinthians 6:9, 10) Bihaen tufala study nomoa, hem kamap strong for finisim wei wea hem fren witim tufala woman hia. Hem start tu for attendim olketa Christian meeting long Kingdom Hall. Bat diswan hem olsem narafala test.
Cleveland hem join insaed soccer team bilong datfala area, and olketa game hia kamap long olketa taem bilong meeting. Wanem nao bae hem duim? Nomata hem kasem bigfala hevi from olketa narawan wea plei soccer witim hem, coach, and olketa fren, Cleveland disaed for finis from datfala soccer team. Tru nao, Word bilong God start for duim samting, affectim hem long gudfala wei.
Paoa bilong Word bilong God showaot moa taem Cleveland start for sharem savve wea hem garem long Bible witim nara pipol. (Acts 1:8) From diswan, tufala wea insaed long sem soccer team witim hem bifor, start for attendim olketa meeting bilong Olketa Jehovah’s Witness. Bihaen Cleveland kamap fit for olsem man for talemaot gud nius, hem kasem bigfala hapi insaed ministry, and iusim Word bilong God for helpem nara pipol.
From Word bilong God go ahed for muvim hem, gogo Cleveland showimaot dedication bilong hem long Jehovah taem hem baptaes long wata and hem kasem privilege for serve olsem wanfala full-taem minister and ministerial servant insaed kongregeson.
Long Jamaica and raonem world, planti thousand pipol lanem hao Word bilong God “hem laef and garem paoa for duim samting.”
[Map/Piksa long page 8]
(For formatted text, lukim pablikeson)
JAMAICA
[Credit Line]
Map and globe: Mountain High Maps® Copyright © 1997 Digital Wisdom, Inc.