Kwestin From Reader
Waswe, Abel savve hem need for sakrifaesim animal for mekem God hapi?
Bible no talem staka samting abaotem taem wea Cain and Abel duim sakrifaes bilong tufala. Genesis 4:3-5 hem sei: “Bihaen samfala taem go pas, Cain hem tekem kam samfala frut bilong graon olsem wanfala offering long Jehovah. Bat Abel, hem tu tekem kam samfala firstborn animal bilong flock bilong hem, and gris bilong olketa tu. And taem Jehovah hem lukluk witim hapi long Abel and offering bilong hem, hem no hapi long Cain and long offering bilong hem.”
Bible no talem sapos bifor diswan tufala bin kasem eni information abaotem sakrifaes or abaotem wanem kaen sakrifaes God bae acceptim. So, luk olsem Cain and Abel seleva nao chusim offering bilong tufala. Tufala kanduit go insaed Paradaes hom bilong parents bilong tufala; tufala start for feelim nogud samting bilong sin; and tufala farawe from God. Living wea anda long sin and sorre masbi mekem tufala barava feelim need for tan go long God for help. Luk olsem tufala seleva nao want for offerim wanfala present long God for mekem hem hapi long tufala.
Samting wea kamaot from diswan nao hem wei wea God acceptim offering bilong Abel bat no bilong Cain. Why? Waswe, hem bikos Abel offerim stret samting and Cain nomoa? Iumi no savve sure sapos kaen sakrifaes affectim eniting bikos God no talem tufala wanem hem bae appruvim and no appruvim. Bat luk olsem hem acceptim tufala evriwan. Long Law wea Jehovah givim long nation bilong Israel, hem no just acceptim sakrifaes bilong animal or part bilong animal nomoa, bat tu grain wea olketa beikem, olketa barley, flour, kaikai wea olketa beikem, and wine. (Leviticus 6:19-23; 7:11-13; 23:10-13) So, no datfala samting wea Cain and Abel offerim nao mekem God for acceptim wanfala and rejectim narawan.—Markem Isaiah 1:11; Amos 5:22.
Winim foa thousand year bihaen, aposol Paul sei: “Thru long faith Abel offerim long God wanfala sakrifaes wea moabeta winim Cain, wea thru long disfala faith hem kasem witness hao hem raeteous and God givim witness abaotem olketa present bilong hem.” (Hebrews 11:4) So, faith nao mekem God ting long Abel olsem hem raeteous. Bat faith long wanem? Faith long promis bilong Jehovah hao hem bae provaedem datfala Seed, wea bae ‘killim hed bilong datfala snek’ and bae mekem olketa man kasem bak peace and perfect laef wea olketa enjoyim firstaem. Wei wea Seed bae ‘garekil long leg’ maet mekem Abel tingim hao diswan bae needim wanfala sakrifaes wea bae join witim wei for kapsaetem blood. (Genesis 3:15) Nomata wanem, iumi sure faith bilong Abel nao mekem sakrifaes bilong hem “wanfala sakrifaes wea moabeta winim Cain.”
And tu, God rejectim Cain, no bikos hem offerim rong sakrifaes, bat bikos hem short long faith, olsem fasin bilong hem showimaot. Jehovah talem klia long Cain: “Sapos iu change for duim gudfala samting, waswe, bae hapi no kamap?” (Genesis 4:7) God no rejectim Cain bikos hem no hapi long offering bilong hem. Bat, “bikos olketa waka bilong [Cain] hem nogud”—olsem jealous fasin, heit, and gogo, wei for killim man dae—dastawe God rejectim hem.—1 John 3:12.