CHAPTER WAN
‘Nomata Hem Dae, Hem Gohed Teachim Iumi’
1. Wat nao stopem famili blo Adam and Eve for go insaed lo garden blo Eden, and wat nao Abel laekem tumas for happen?
IMAGINIM, Abel hem lukluk lo olketa sheepsheep blo hem wea kaikaim grass saed lo maunten. Then, maet hem luk go farawe and hem lukim wanfala samting wea shaen braet. Hem savve datwan hem sword blo fire wea gohed for tane raon for stopem road for go insaed garden blo Eden. Datwan hem ples wea parents blo hem stap bifor, bat gogo tufala and olketa pikinini blo tufala no savve go insaed lo datfala garden nao. Maet Abel sidaon and enjoyim wind wea blow lo datfala aftanun, and hem luk ap lo skae and tingting abaotem Creator blo hem. Waswe, eni wei stap for man fren bak moa witim God? Abel laekem tumas datwan for happen.
2-4. Hao nao Abel teachim iumi distaem?
2 Abel gohed teachim iumi distaem. Hao nao hem duim datwan? Iu maet sei datwan hard for happen, bikos disfala mek-tu son blo Adam hem dae longtaem nao. Abel dae samting olsem 6,000 year finis so body blo hem no stap nao. And Bible sei: “Olketa wea dae finis no savve lo eni samting.” (Eccl. 9:5, 10) And tu, Bible no garem eni toktok wea Abel talem. So hao nao Abel savve teachim iumi?
3 Aposol Paul story olsem abaotem Abel: “Bikos long faith bilong hem, nomata hem dae, [Abel] gohed teachim iumi.” (Readim Hebrew 11:4.) So, hao nao Abel gohed for teachim iumi? Faith blo hem nao teachim iumi. Abel nao first man wea garem datfala nambawan wei. From hem showimaot nambawan example blo faith, datwan hem olsem hem laef yet and iumi savve followim example blo hem. Sapos iumi lane from hao hem showimaot faith and followim example blo hem, datwan showimaot Abel hem real lo iumi and hem gohed teachim iumi.
4 So wat nao iumi savve lanem from Abel and wei wea hem garem faith nomata Bible no storyim staka samting abaotem hem? Bae iumi storyim.
Abel Growap lo Taem “Olketa Man Start for Born”
5. Why nao Jesus storyim Abel taem hem talem disfala toktok “taem wea olketa man start for born”? (Lukim footnote.)
5 Abel hem born lo firstfala man and woman wea God wakem. Jesus sei Abel hem stap lo “taem wea olketa man start for born long earth.” (Readim Luke 11:50, 51.) Luk olsem taem Jesus iusim disfala toktok “olketa man” lo disfala verse, hem minim olketa wea savve kasem forgiveness for sin blo olketa. Nomata Abel hem fourth person lo earth, luk olsem hem nao firstfala man for kasem forgiveness from God.a So Abel growap witim olketa wea no savve helpem hem for fren witim God.
6. Abel garem wanem kaen parents?
6 Nomata laef lo earth just start, barava sorre samting nao happen. Masbi parents blo Abel, Adam and Eve barava luk naes and garem strong for duim samting. Bat tufala no kasem eni gud samting and tufala luksavve lo datwan. Lo firstaem, Adam and Eve perfect and garem chance for laef olowe. Then tufala againstim Jehovah God and hem aotem tufala from datfala garden blo Eden. Adam and Eve lusim perfect laef and chance for laef olowe from tufala tingim nomoa samting wea tufala seleva laekem, and no tingim olketa pikinini blo tufala.—Gen. 2:15–3:24.
7, 8. Wat nao Eve talem taem Cain hem born, and wat nao maet hem tingim?
7 Taem Jehovah raosem Adam and Eve from garden blo Eden, laef blo tufala barava hard. Nomata olsem, taem first pikinini hem born tufala nemim hem Cain, wea minim “samting wea hem producem,” and Eve sei: “Mi garem wanfala pikinini boy bikos Jehovah nao helpem mi.” Taem Eve talem toktok hia maet hem tingim promis wea Jehovah talem lo garden blo Eden. Jehovah sei wanfala woman bae bornem wanfala “pikinini” wea bae finisim datfala wicked wan wea leadim Adam and Eve for againstim Jehovah. (Gen. 3:15; 4:1) Waswe, Eve tingse hem nao woman lo datfala profesi and Cain nao datfala “pikinini”?
8 Sapos hem nao wat hem tingim, wat hem expectim hem no happen. And tu, sapos Adam and Eve storyim olketa idea olsem lo Cain, maet datwan mekem hem praod. Bihaen, Eve bornem mek-tu son, bat Eve no talem eni toktok wea mekhae lo hem olsem Cain. Olketa nemim hem Abel, wea maet minim for “Brith aot” or “Iusles.” (Gen. 4:2) Waswe, nem wea tufala chusim for Abel showimaot tufala no expectim eni gud samting from Abel olsem wat tufala expectim from Cain? Maet olsem.
9. Wat nao olketa parents distaem savve lanem from first parents blo iumi Adam and Eve?
9 Olketa parents distaem savve lane from samting wea Adam and Eve duim. Waswe, bae iufala talem and duim samting wea mekem pikinini praod, selfish, and laek kasem hae position? Or waswe, bae iu teachim olketa for lovem Jehovah God and for fren witim hem? Sorre samting nao, Adam and Eve fail for duim responsibility blo tufala. Nomata olsem, olketa pikinini blo tufala garem hope.
Wanem Nao Helpem Abel for Garem Faith?
10, 11. Wat kaen waka nao Cain and Abel duim, and wat kaen fasin nao Abel garem?
10 Taem Cain and Abel growap, luk olsem Adam trainim tufala for duim waka for helpem famili. Cain hem wanfala farmer, and Abel lukaftarem sheepsheep.
11 Bat Abel duim samting wea moa important. Hem waka hard for garem faith, wea hem nambawan fasin wea Paul storyim. Tingim, no eni human being showimaot gudfala example for Abel followim. So, wat nao helpem hem for garem faith lo Jehovah God? Bae iumi storyim thrifala samting wea maet helpem Abel for garem strongfala faith.
12, 13. Hao nao wei for ting raonem creation blo Jehovah hem helpem Abel for garem faith?
12 Olketa creation blo Jehovah. From Jehovah cursim graon olketa rabis grass grow wea mekem kaikai no savve grow gud. Nomata olsem, famili blo Abel garem inaf kaikai. Jehovah no cursim olketa animal olsem olketa bird and fish, and hem no cursim olketa maunten, lake, river, sea, or even skae, sun, moon, cloud, and olketa star. Evri samting wea Abel lukim showimaot bigfala love, wisdom, and gudfala wei blo Jehovah God, man wea creatim evriting hia. (Readim Rome 1:20.) For sure, Abel ting raonem olketa samting wea God wakem and datwan strongim faith blo hem.
From Abel lukluk lo creation, datwan helpem hem for garem strongfala faith lo Creator blo iumi wea showimaot love
13 Masbi Abel iusim staka taem for ting raonem olketa spiritual samting. Imaginim taem Abel lukaftarem sheepsheep. Hem mas wakabaot farawe lo staka ples. Lo olketa maunten, valley, and akrosim olketa river for leadim sheepsheep for faendem kaikai, wata, and ples for olketa rest. Olketa sheepsheep barava needim man for leadim and protectim olketa winim eni nara animal wea God wakem. Waswe, Abel luksavve hem tu needim Samwan wea wise and garem paoa for leadim, protectim, and lukaftarem hem? Maet hem prea abaotem olketa samting olsem, and datwan strongim faith blo hem.
14, 15. Olketa promis blo Jehovah mekem Abel for ting raonem wanem?
14 Olketa promis blo Jehovah. Masbi Adam and Eve storyim lo olketa son blo tufala, olketa samting wea happen lo garden blo Eden wea mekem God raosem tufala. So Abel garem staka samting for ting raonem.
15 Jehovah sei bae hem cursim graon. Abel lukim olketa rabis grass wea grow wea showimaot toktok blo Jehovah hem tru. Jehovah sei tu, taem Eve hem babule and bornem pikinini bae hem pain tumas lo hem. Taem olketa nara brata and sista blo hem born, Abel lukim toktok blo Jehovah hem kamap tru. Jehovah talem tu hao Eve bae laekem tumas for hasband blo hem lovem hem, bat hasband blo hem bae bossim hem. Abel savve lukim datwan happen lo mami and dadi blo hem. Abel luksavve evri samting wea Jehovah talem, hem kamap tru. So Abel garem gudfala reason for trustim promis blo God abaotem “pikinini” wea bae stretem olketa nogud samting wea kamap from wat hem happen lo garden blo Eden.—Gen. 3:15-19.
16, 17. Wat nao maet Abel lanem from olketa cherub blo Jehovah?
16 Olketa wakaman blo Jehovah. Nomata no eni nara faithful man stap lo earth wea Abel fit for followim example blo hem, Abel savve luk followim example blo olketa cherub wea stap lo earth lo datfala taem. Taem Jehovah aotem Adam and Eve from garden blo Eden, hem mek sure tufala and olketa pikinini blo tufala no savve go bak insaed lo datfala Paradaes. Jehovah putim olketa cherub wea hem olketa angel wea garem spesol position, for gaedem entrance blo garden blo Eden witim wanfala sword blo fire wea gohed for tane raon.—Readim Genesis 3:24.
17 Imaginim feeling blo Abel taem hem smol boy and hem lukim olketa cherub hia. Olketa cherub hia luk spesol tumas and olketa garem big paoa. Masbi Abel laekem tumas for lukim datfala “sword” blo fire wea gohed for tane raon. Taem Abel gohed for growap, waswe, enitaem hem lukim olketa cherub hia boring and lusim waka blo olketa? Nomoa. Olketa cherub hia gohed for standap lo there evriday and evri naet for staka year. From diswan, Abel luksavve Jehovah God garem olketa raeteous wakaman wea faithful. Olketa cherub hia loyal and obeyim Jehovah, and Abel no lukim datkaen wei insaed famili blo hemseleva. Example blo olketa angel hia mas barava strongim faith blo hem.
Lo full laef blo Abel, hem lukim olketa cherub wea faithful and obey for duim waka blo Jehovah
18. Wat nao iumi savve duim for strongim faith blo iumi distaem?
18 Wei for ting raonem olketa creation blo Jehovah, olketa promis blo hem and example blo olketa angel, hem strongim faith blo Abel lo Jehovah. Example blo Abel teachim iumi staka samting. Hem helpem olketa young wan for luksavve, olketa savve garem strong faith lo Jehovah God, nomata olketa narawan lo famili no duim datwan. Distaem iumi savve lukim staka nambawan samting wea Jehovah wakem, iumi garem full Bible, and tu, iumi garem staka gud example blo pipol wea faithful lo Jehovah. Evri samting hia savve strongim faith blo iumi.
Why Jehovah Hapi lo Sakrifaes blo Abel
19. Wat nao tru samting wea Abel luksavve lo hem abaotem God?
19 Abel laek for duim samting wea showimaot hem garem faith lo Jehovah. Bat wat nao wanfala man savve givim lo Creator blo full universe? God no needim man for helpem hem or givim present lo hem. Wanfala important samting nao Abel luksavve lo hem: Sapos man givim best blo hem lo Jehovah bikos hem lovem hem, Jehovah bae hapi lo datwan.
Abel offerim sakrifaes from hem garem faith; bat Cain no garem faith
20, 21. Wat kaen sakrifaes nao Cain and Abel offerim lo Jehovah, and hao nao Jehovah ting lo datwan?
20 So Abel redyim samfala sheepsheep for sakrifaesim lo Jehovah. Hem chusim olketa best young sheepsheep, and sakrifaesim olketa best part blo olketa animal hia. Lo semtaem, Cain tu laekem God for blessim hem, so hem redyim olketa kaikai from garden blo hem for sakrifaesim lo Jehovah. Bat hem no lovem Jehovah olsem Abel. Datwan showaot klia taem tufala brata hia givim sakrifaes blo tufala.
21 Luk olsem Cain and Abel bonem olketa sakrifaes antap lo olketa altar. Maet lo ples wea olketa cherub stap, wea olketa representim Jehovah lo datfala taem. Jehovah lukim datwan! Bible sei: “Jehovah hapi lo Abel and lo offering blo hem.” (Gen. 4:4) Bat Bible no talem hao nao God showimaot datwan.
22, 23. Wat nao reason wea mekem Jehovah hapi lo sakrifaes wea Abel offerim?
22 Why nao God hapi lo Abel? Waswe, hem bikos lo datfala sakrifaes? Abel hem sakrifaesim animal wea blood blo hem piksarem laef. Waswe, Abel luksavve datkaen sakrifaes hem spesol lo Jehovah? Staka handred year bihaen taem blo Abel, God talem pipol blo hem for sakrifaesim pikinini sheepsheep wea piksarem perfect laef blo Son blo Hem wea givim blood blo hem for olketa man. Bible kolem Jesus “Pikinini Sheepsheep bilong God.” (John 1:29; Ex. 12:5-7) Bat, luk olsem hard for Abel savve abaotem datwan.
23 Bat samting wea iumi sure lo hem nao: Abel hem sakrifaesim best samting wea hem garem. Jehovah hapi lo datfala sakrifaes and lo Abel tu. Jehovah hapi lo Abel bikos hem garem faith lo Jehovah and love nao muvim hem for duim datwan.
24. (a) Why nao iumi no fit for sei sakrifaes wea Cain offerim hem nogud? (b) Lo wanem wei nao staka distaem garem wei olsem Cain?
24 Bat Jehovah “no hapi lo Cain and lo offering blo hem.” (Gen. 4:5) Waswe, datkaen sakrifaes blo Cain hem nogud? Nomoa. Taem God givim Law lo olketa Israelite, hem sei olketa savve givim wat olketa plantim olsem sakrifaes. (Lev. 6:14, 15) Bat Bible sei Cain hem “duim olketa nogud samting.” (Readim 1 John 3:12.) Staka pipol lo taem blo iumi tingse wei for act olsem olketa lovem God hem inaf and luk olsem datwan tu tingting blo Cain. Bat next samting wea hem duim hem showimaot Cain no lovem and no garem faith lo Jehovah.
25, 26. Wat nao warning wea Jehovah givim lo Cain, bat wat nao Cain duim?
25 Taem Cain luksavve Jehovah no hapi lo hem, waswe, hem change and trae for followim example blo Abel? Nomoa. Hem heitim go moa brata blo hem. Jehovah lukim heart blo Cain and hem trae for helpem hem. Hem warnim Cain sapos hem no changem wei blo hem bae hem duim bigfala sin, bat sapos hem change, Jehovah bae hapi lo hem.—Gen. 4:6, 7.
26 Cain no followim samting wea God talem hem, bat hem askem Abel for go wakabaot witim hem. Then nomoa Cain killim dae Abel nao. (Gen. 4:8) So Abel nao firstfala man wea kasem persecution and hem dae bikos lo faith blo hem. Nomata hem dae, Jehovah no forgetim hem.
27. (a) Why nao iumi savve trustim dat Abel bae resurrect? (b) Hao nao iumi savve sure dat wanday bae iumi meetim Abel?
27 Lo tokpiksa wei, blood blo Abel hem krae go lo Jehovah God for stretem samting wea happen. God stretem datwan taem hem panisim Cain from hem killim dae brata blo hem. (Gen. 4:9-12) Bat samting wea important nao, iumi distaem savve lanem staka samting from faith blo Abel. Maet Abel hem laef for samting olsem wan handred years nomoa, datwan hem short nomoa sapos iumi markem witim laef blo pipol lo datfala taem wea olketa savve laef for longtaem. Nomata olsem, hem iusim datfala taem for mekem God hapi. Taem hem dae hem savve Jehovah lovem and hapi lo hem. (Heb. 11:4) Dastawe, iumi savve sure Abel hem lo memory blo Jehovah, and bae hem mekem hem laef bak lo paradaes lo earth. (John 5:28, 29) Waswe, bae iu meetim Abel lo Paradaes? Iu savve duim datwan sapos iu disaed strong for letem example blo Abel hem teachim iu and for garem sem faith olsem hem.
a Datfala toktok “taem wea olketa man start for born long earth” hem savve join witim wei for plantim olketa seed, or for garem pikinini, so diswan story abaotem olketa first pikinini wea born. Why nao Jesus connectim datfala story witim Abel and no witim Cain wea hem nao firstborn? Samting wea Cain duim and disaedem showimaot hem chus for againstim Jehovah God. So luk olsem God bae no mekem Cain laef bak and hem bae no kasem forgiveness, olsem tu dadi and mami blo hem.