“Lisin Gud Winim Enitaem Bifor”
“Hem important for iumi lisin gud winim enitaem bifor long olketa samting wea iumi herem, mekem iumi nating isisi go difren.”—HEBREWS 2:1.
1. Storyim wei wea mind wea go difren savve kosim trabol.
ACCIDENT long trak hem killim dae samting olsem 37,000 pipol evri year long United States nomoa. Olketa savveman sei staka long olketa hia bae no dae sapos draeva bin lukluk gud long road. Samfala draeva lukluk long olketa saen long saed road or toktok long mobile phone. Samfala moa kaikai taem olketa draev. Long olketa taem hia, wei for mind go difren savve kosim trabol.
2, 3. Wanem kaonsel nao Paul givim long olketa Hebrew Christian, and why nao datfala kaonsel hem fitim?
2 Klosap 2,000 year bifor olketa wakem firstfala trak, aposol Paul storyim wankaen wei for pullim mind wea spoelem samfala Hebrew Christian. Paul mekhae long wei wea Jesus Christ wea resurrect finis kasem position wea moa hae winim evri angel, from hem sidaon long raet saed bilong God. Then aposol Paul hem sei: “Dastawe hem important for iumi lisin gud winim enitaem bifor long olketa samting iumi herem, mekem iumi nating isisi go difren.”—Hebrews 2:1.
3 Why nao olketa Hebrew Christian need for ‘lisin gud winim enitaem bifor long olketa samting olketa herem’ abaotem Jesus? Bikos klosap 30 year go pas finis from taem Jesus lusim earth. From Masta bilong olketa no stap, samfala Hebrew Christian start for isisi go difren from trufala faith. Interest bilong olketa gogo nao long Judaism, wei bilong worship bilong olketa bifor.
Olketa Need for Lisin Gud Winim Enitaem Bifor
4. Why nao maet samfala Hebrew Christian laek for followim moa Judaism?
4 Why nao maet wanfala Christian interest for go bak long Judaism? Wei bilong worship anda long Law hem join witim olketa samting wea man savve lukim. Pipol savve lukim olketa priest and smelem olketa sakrifaes. Bat, Christian Wei hem barava difren long samfala samting. Olketa Christian garem wanfala Hae Priest, Jesus Christ, bat olketa no lukim hem for 30-fala year. (Hebrews 4:14) Olketa garem wanfala temple, bat holy ples bilong hem long heven. (Hebrews 9:24) No olsem physical wei for circumcise anda long Law, Christian wei for circumcise hem bilong “heart thru long spirit.” (Romans 2:29) So, for olketa Hebrew Christian, Christian Wei maet luk hard tumas for minim.
5. Hao nao Paul showimaot system bilong worship wea Jesus startim hem winim wan wea followim datfala Law?
5 Olketa Hebrew Christian need for luksavve long barava important samting saed long system bilong worship wea Christ startim. Hem garem faondeson long faith winim wanem man lukim, bat hem winim datfala Law wea olketa kasem thru long profet Moses. Paul hem raet: “Sapos blood bilong olketa goat and olketa buluka and asis bilong youngfala buluka wea olketa splasem antap long olketa wea no klin mekem olketa kamap holy long wei wea body kamap klin, long sem wei blood bilong Christ, wea thru long spirit bilong olowe offerim hemseleva olsem perfect sakrifaes long God, bae barava klinim conscience bilong iumi from olketa waka wea iusles mekem iumi savve givim holy service long datfala living God!” (Hebrews 9:13, 14) Tru nao, long planti wei, forgiveness wea stap thru long faith long ransom sakrifaes bilong Jesus Christ hem barava winim forgiveness wea kam thru long olketa sakrifaes anda long datfala Law.—Hebrews 7:26-28.
6, 7. (a) Wanem nao kamap wea mekem hem important tumas for olketa Hebrew Christian ‘lisin gud winim enitaem bifor long olketa samting olketa herem’? (b) Taem Paul raetem leta bilong hem long olketa Hebrew, haomas taem nao Jerusalem garem yet bifor hem distroe? (Lukim footnote.)
6 Nara reason stap for why olketa Hebrew Christian need for barava lisin gud long olketa samting olketa herem abaotem Jesus. Hem profesi finis hao Jerusalem bae distroe. Jesus hem sei: “Taem bae kam wea olketa enemy bilong iu bae buildim strongfala fence witim sharpfala stik raonem iu and bae spoelem iu from evri saed, and olketa bae smasem iu and olketa pikinini bilong iu long graon, and olketa bae no leavim eni ston antap long narafala ston, bikos iu no luksavve long taem wea hem lukluk gud long iu.”—Luke 19:43, 44.
7 Wanem taem nao bae diswan happen? Jesus no talem day and hour. Bat, hem givim disfala instruction: “Taem iufala lukim olketa army camp raonem Jerusalem, then iufala mas savve end bilong hem klosap for kam nao. Then letem olketa long Judea start for ranawe go long olketa maunten, and letem olketa wea stap insaed go aot from hem, and letem olketa wea stap aotsaed no go insaed long hem.” (Luke 21:20, 21) Insaed 30 year bihaen Jesus talem toktok hia, samfala Christian long Jerusalem lusim nao feeling for hariap and letem interest bilong olketa for go difren. Hem olsem olketa no lukluk long road taem olketa draev. Sapos olketa no changem tingting bilong olketa, olketa bae sure for kasem trabol. Nomata olketa bilivim or nomoa, Jerusalem hem klosap for distroe!a Hem important tumas for disfala kaonsel bilong Paul for wekapem olketa Christian long Jerusalem wea sleep long spiritual wei.
Garem Wei for “Lisin Gud Winim Enitaem Bifor”
8. Why nao iumi need for “lisin gud winim enitaem bifor” long olketa truth bilong Word bilong God?
8 Olsem olketa first-century Christian, iumi need for “lisin gud winim enitaem bifor” long olketa truth bilong Word bilong God. Why nao olsem? Bikos iumi tu klosap nao feisim wei for distroe, no bilong wanfala nation nomoa, bat bilong full system bilong world. (Revelation 11:18; 16:14, 16) Hem tru, iumi no savve long barava day and hour wea Jehovah bae duim diswan. (Matthew 24:36) Nomata olsem, iumi barava lukim olketa Bible profesi fulfill wea showimaot klia hao iumi insaed “olketa last day.” (2 Timothy 3:1-5) So, iumi shud gardim iumiseleva from eniting wea savve pullim iumi go difren. Iumi need for lisin gud long Word bilong God and go ahed for garem feeling for hariap. Wei for duim diswan nomoa bae mekem iumi “win for missim evri samting hia wea mas happen.”—Luke 21:36.
9, 10. (a) Hao nao iumi savve showaot iumi lisin gud long olketa spiritual samting? (b) Hao nao word bilong God hem ‘lamp for leg bilong iumi’ and ‘laet for road bilong iumi’?
9 Long important taem distaem, hao nao iumi savve showimaot iumi “lisin gud winim enitaem bifor” long olketa spiritual samting? Wanfala wei hem for evritaem attendim olketa Christian meeting, assembly, and convention. Iumi shud strongfala Bible student tu mekem iumi savve kam moa klos long Wan wea Raetem Bible, Jehovah. (James 4:8) Sapos iumi kasem savve abaotem Jehovah thru long wei for study seleva and olketa meeting, iumi bae olsem man wea raetem psalm wea sei long God: “Word bilong iu hem wanfala lamp for leg bilong mi, and laet for road bilong mi.”—Psalm 119:105.
10 Bible hem olsem ‘laet for road bilong iumi’ taem hem talem iumi olketa purpose bilong God for future. Hem ‘lamp for leg bilong iumi’ tu. Diswan minim hem savve showim wei for iumi wakabaot followim taem iumi feisim olketa hardfala problem long laef. Dastawe hem important for iumi “lisin gud winim enitaem bifor” taem iumi hipap for kasem instruction witim olketa wea iumi sem biliv and taem iumi wanwan readim Word bilong God. Information wea iumi kasem bae helpem iumi for disaedem olketa samting long wisefala wei and long wei wea bae helpem iumi, and wea bae mekem heart bilong Jehovah hapi. (Proverbs 27:11; Isaiah 48:17) Hao nao iumi savve mekem moa big hao long nao iumi savve interest long olketa meeting and taem iumi duim study seleva, mekem iumi kasem moa samting from olketa spiritual samting wea God provaedem?
Kamap Moabeta Long Wei for Lisin Gud Long Olketa Meeting
11. Why nao samfala taem wei for lisin gud long olketa Christian meeting hem wanfala challenge?
11 Samfala taem, wei for lisin gud long olketa Christian meeting hem wanfala challenge. Hem isi for olketa samting pullim mind, maet hem krae bilong wanfala baby or wanfala man kam leit and lukluk for ples for sidaon. Bihaen iumi waka hard for full day, maet iumi taed. Speaker long platform maet no interesting, and seknomoa mind bilong iumi go difren nao—maet iumi sleep tu! From information wea speaker hem givim hem important, iumi shud trae for kamap moabeta long wei for lisin long olketa kongregeson meeting. Bat hao nao iumi savve duim diswan?
12. Wanem nao savve mekem hem moa isi for iumi lisin gud long olketa meeting?
12 Planti taem hem moa isi for lisin gud long olketa meeting taem iumi prepare gud. So iumi bae kamap moabeta long diswan sapos iumi markem taem for ting raonem information wea iumi bae lanem long meeting. Hem tek tu-thri minute nomoa each day for readim and ting raonem wanfala sekson bilong Bible reading bilong week. Sapos iumi plan gud, iumi savve faendem taem for prepare for Kongregeson Buk Study and Wastaoa Study. Nomata wanem nao schedule bilong iumi, wanfala samting hem for sure: Wei for prepare bae helpem iumi for lisin gud long information wea kamap long olketa kongregeson meeting.
13. Wanem nao savve helpem iumi for keepim mind long information wea kamap long olketa meeting?
13 For join witim wei for prepare gud, samfala faendem olketa lisin gud long olketa meeting taem olketa sidaon long front sekson bilong Kingdom Hall. For lukluk long feis bilong speaker, luk followim Bible bilong iu taem speaker readim scripture, and raetem note hem samfala nara wei for stopem mind wakabaot. Nomata olsem, for redyim heart nao hem moa important winim eni teknik for mekem man lisin. Iumi need for minim purpose bilong wei for hipap tugeta. Main reason bilong iumi for hipap witim olketa olketa brata and sista hem for worshipim Jehovah. (Psalm 26:12; Luke 2:36, 37) Important wei wea iumi kasem spiritual kaikai nao hem thru long olketa meeting. (Matthew 24:45-47) And tu, olketa givim iumi chance for “muvim narawan for showimaot love and gudfala waka.”—Hebrews 10:24, 25.
14. Wanem samting nao mekem wanfala meeting hem win?
14 Samfala maet sei meeting hem gud or nogud followim wei wea olketa speaker givim tok. Sapos olketa speaker givim gud tok, olketa sei datwan hem gudfala meeting. Bat sapos wei wea speaker teach no kasem mind bilong olketa, olketa sei meeting hem nogud. Hem tru, olketa speaker shud duim best for teach long gudfala wei and especially for kasem heart bilong audience. (1 Timothy 4:16) Bat, iumi wea lisin shud no judge. Nomata wei wea olketa speaker givim tok hem important, hem no only samting wea mekem meeting hem win. Important samting for iumi tingim nao hem no sapos speaker givim gudfala tok, bat hao gud nao iumi lisin. Taem iumi attendim olketa meeting and lisin gud long olketa speaker, iumi worshipim God followim will bilong hem. Datwan nao samting wea mekem wanfala meeting hem win. Sapos iumi barava want for kasem savve bilong God, iumi bae kasem gud samting from olketa meeting, nomata hao speaker hem givim tok. (Proverbs 2:1-5) So, iumi mas disaed strong for “lisin gud winim enitaem bifor” long olketa meeting bilong iumi.
Kasem Evribit Gud Samting From Wei for Study Seleva
15. Hao nao wei for study and ting raonem samting savve helpem iumi?
15 Taem iumi study seleva and ting raonem wanem iumi lanem, wei for “lisin gud winim enitaem bifor” bae barava helpem iumi. Wei for readim and tingting raonem Bible and olketa Christian pablikeson bae givim iumi nambawan chance for strongim truth bilong Word bilong God insaed heart bilong iumi. Diswan bae barava affectim tingting bilong iumi and samting iumi duim. Tru nao, hem bae helpem iumi for hapi for duim will bilong Jehovah. (Psalm 1:2; 40:8) So iumi need for trainim mind bilong iumi for no wakabaot, mekem iumi kasem gud samting long taem iumi study. Hem isi tumas for samting pullim tingting! Olketa sismol samting—telephone kol or wanfala noise savve pullim mind bilong iumi. Or maet iumi kaen man wea hard for keepim interest long samting for longfala taem. Maet iumi sidaon witim goal for kaikaim spiritual kaikai, bat no longtaem nomoa mind bilong iumi long difren ples nao. Hao nao iumi savve “lisin gud winim enitaem bifor” long taem iumi study seleva long Word bilong God?
16. (a) Why nao hem important for iumi mekem schedule for study seleva? (b) Hao nao iu baem taem for studyim Word bilong God?
16 Hem gud for iumi garem schedule and chusim ples wea isi for study long hem. Staka long iumi no garem inaf taem for iumiseleva. Maet iumi feel wei for busy evriday mekem iumi olsem haf stik wea strong current bilong river pushim olabaot. Tru nao, hem olsem iumi need for faet againstim current and lukaotem wanfala smol island wea kwaet. Iumi kanduit weit nomoa for chance kamap seleva. Bat, iumi mas kontrolem living bilong iumi long wei for markem taem for study. (Ephesians 5:15, 16) Samfala markem morning taem bikos no staka samting savve disturbim man. Olketa narawan faendem evening nao moabeta. Main samting nao hem for iumi no ting smol long important need for kasem stretfala savve abaotem God and Son bilong hem. (John 17:3) So iumi need for mekem schedule for duim study seleva and strong for followim.
17. Wanem nao hem minim for ting raonem samting, and hao nao diswan savve helpem iumi?
17 Wei for ting raonem samting iumi lanem thru long study hem barava important. Hem helpem iumi for tekem tingting bilong God from page bilong buk and putim insaed heart bilong iumi. For ting raonem samting bae helpem iumi savve hao for followim Bible kaonsel mekem iumi kamap “pipol wea duim word, and no herem nomoa.” (James 1:22-25) And tu, wei for ting raonem samting bae helpem iumi for kam moa klos long Jehovah, from hem mekem iumi tingting gud abaotem olketa fasin bilong hem and hao olketa showaot from information wea iumi studyim.
18. For man ting raonem information long gudfala wei hem needim wanem?
18 For kasem evribit gud samting from study and wei for ting raonem samting, mind mas klia from eni samting wea savve pullim hem go difren. For mekem iumi kasem olketa niu point taem iumi ting raonem information, iumi need for aotem from mind olketa samting bilong evriday living wea savve pullim mind. For duim diswan hem needim taem and kwaet ples, bat, for kasem spiritual kaikai and olketa wata bilong truth insaed Word bilong God hem bae barava strongim man!
19. (a) Saed long study seleva, wanem nao helpem samfala for mekem grow hao long nao olketa interest? (b) Hao nao iumi shud ting long wei for study, and hao nao wei for duim disfala important samting bae helpem iumi?
19 Waswe sapos mind bilong iumi savve kwiktaem for wakabaot bihaen shortfala taem iumi study? Samfala faendem hao olketa savve mekem grow hao long nao olketa interest long study taem olketa start witim shortfala taem for study and then isisi mekem moa long. Goal bilong iumi hem for tek-taem for duim study winim wei for hariap witim. Iumi need for mekem grow bigfala interest long subject iumi studyim. And iumi savve duim moa research long wei for mekius long evri information wea faithful and wise slave class provaedem. Staka gud samting bae kamaot from wei for lukluk insaed “olketa deep samting bilong God.” (1 Corinthians 2:10) For duim olsem bae mekem iumi savve gud moa long God and for mekem grow paoa bilong iumi for luksavve. (Hebrews 5:14) Sapos iumi gudfala student bilong Word bilong God, iumi bae “fit for teachim olketa narawan” tu.—2 Timothy 2:2.
20. Hao nao iumi savve mekem grow and keepim klos wei for fren witim Jehovah God?
20 For attendim olketa Christian meeting and duim study seleva bae barava helpem iumi for mekem grow and keepim klos wei for fren witim Jehovah. Luk olsem diswan hem happen long man wea raetem psalm wea sei long God: “Mi barava lovem law bilong iu! Long full day mi ting long hem.” (Psalm 119:97) So, iumi mas evritaem attendim olketa meeting, assembly, and convention. And iumi need for baem taem for duim Bible study and ting raonem wanem iumi studyim. Iumi bae kasem bigfala reward sapos iumi “lisin gud winim enitaem bifor” long Word bilong God.
[Footnote]
a Luk olsem Paul raetem go leta long olketa Hebrew long 61 C.E. Sapos olsem, samting olsem faev year nomoa stap bifor army bilong Cestius Gallus hem raonem Jerusalem. No longtaem bihaen, army hia lusim datfala ples, wea givim chance for olketa Christian wea stap wekap for ranawe. Fofala year bihaen, army bilong Rome anda long General Titus hem distroem datfala taon.
Waswe, Iu Remember?
• Why nao samfala Hebrew Christian isisi go difren from trufala faith?
• Hao nao iumi savve lisin gud long olketa Christian meeting?
• Wanem nao bae helpem iumi kasem gud samting from wei for duim study seleva and for ting raonem samting iumi studyim?
[Piksa long page 11]
Olketa Hebrew Christian need for stap wekap long wei wea Jerusalem klosap distroe
[Piksa long page 13]
Olketa dadi and mami savve helpem pikinini bilong olketa for kasem gud samting from olketa Christian meeting