Best Taem for Stap Laef

TAEM iu feisim hard taem, waswe, iu ting go bak long “taem bifor wea living hem gud”? Sapos olsem, tingim toktok bilong wise King Solomon: “No sei: ‘Why nao olketa day bifor moabeta winim distaem?’ from wei wea iu ask olsem no kamaot from wisdom.”—Ecclesiastes 7:10.

Why nao Solomon givim disfala advaes? From hem savve hao stretfala wei for ting long olketa day bifor hem helpem man for deal witim olketa nogud samting wea kamap distaem. Olketa wea barava ting go bak long “taem bifor wea living hem gud” maet forgetim hao olketa day bifor fulap witim olketa problem and trabol tu and hao no enitaem man no garem problem. Maet samfala samting bifor hem moabeta, bat planti samting hem nogud tu. Olsem Solomon talem, hem no wise for wantem living olsem long taem bifor, from iumi no savve mekem evri samting kamap semsem olsem long datfala taem.

Waswe, wei for ting go bak olsem savve spoelem man? Yes, sapos diswan stopem iumi for change fitim wanem hem go ahed distaem or sapos hem stopem iumi for luksavve and tinghae long important taem wea iumi stap insaed long hem and hope wea iumi savve garem.

For tok stret, distaem nao hem best taem for laef nomata world hem garem staka problem. Why nao olsem? Bikos iumi klosap long taem wea purpose bilong God bae fulfill for disfala earth, and long peace and olketa blessing wea bae kamaot from Kingdom rul bilong hem. Bible hem promis: “Hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.” (Revelation 21:4) From wei wea evri samting bae barava moabeta long datfala taem, no eniwan bae garem reason for wantem “taem bifor wea living hem gud.”