Strongim Hand Bilong Iu
DATFALA word ‘hand’ hem kamap winim 1,800 taem insaed Bible. Planti difren toktok stap wea iusim hand for piksarem difren samting. Olsem example, hand wea klin piksarem wei for no guilty. (2 Samuel 22:21; Psalm 24:3, 4) For openem hand hem piksarem wei for showimaot kaenfala fasin long nara pipol. (Deuteronomy 15:11; Psalm 145:16) Man wea duim samting wea mekem hem stap long danger hem olsem hem putim soul bilong hem long hand bilong hem. (1 Samuel 19:5) For daonem hand hem piksarem wei for wikdaon. (2 Chronicles 15:7) And for strongim hand hem piksarem wei for kasem strong and paoa for duim samting.—1 Samuel 23:16.
Distaem hem important tumas for iumi strongim hand bilong iumi. Iumi stap long “nogud taem wea hard for deal witim.” (2 Timothy 3:1) Taem iumi feel wikdaon, hem wei bilong iumi olketa man for givap, olsem iumi daonem hand bilong iumi from iumi no garem eni strong. Planti taem iumi lukim olketa teenager wea stap nomoa and no laek skul, olketa hasband wea lusim famili, and olketa mami wea lusim olketa pikinini. Iumi olketa Christian need for strongim hand bilong iumi mekem iumi stand strong long olketa test wea iumi feisim taem iumi servem God. (Matthew 24:13) Taem iumi duim olsem, iumi mekem heart bilong Jehovah hapi.—Proverbs 27:11.
Wei wea Hand Savve Kamap Strong
Olketa Jew long taem bilong Ezra need for strongim hand bilong olketa for finisim datfala waka for buildim moa temple bilong Jehovah long Jerusalem. Hao nao hand bilong olketa kamap strong? Bible hem sei: “Olketa go ahed for celebratem festival bilong olketa cake wea no garem yeast for sevenfala day witim hapi; bikos Jehovah mekem olketa hapi, and hem tanem raon heart bilong king bilong Assyria go long olketa for strongim hand bilong olketa long waka bilong haos bilong trufala God, datfala God bilong Israel.” (Ezra 6:22) Hem klia, holy spirit bilong Jehovah nao muvim “king bilong Assyria” for letem pipol bilong God for go bak, and muvim pipol bilong Hem tu for finisim waka wea olketa startim.
Bihaen, Nehemiah strongim hand bilong olketa brata bilong hem for datfala waka for repairim wall bilong Jerusalem. Iumi readim: “Mi go ahed for talem olketa abaotem hand bilong God bilong mi, wei wea hem barava gud taem hem stap long mi, and tu, samting wea king talem long mi. Then olketa sei: ‘Iumi mas go and build.’ So olketa strongim hand bilong olketa seleva for datfala gudfala waka.” From hand bilong olketa kamap strong, Nehemiah and olketa nara Jew fit for buildim bak wall bilong Jerusalem insaed 52 day nomoa!—Nehemiah 2:18; 6:9, 15.
Long sem wei, Jehovah strongim hand bilong iumi for preachim gud nius bilong Kingdom. (Matthew 24:14) Hem duim diswan long wei for ‘redyim iumi witim evri gudfala samting for duim will bilong hem.’ (Hebrews 13:21) Hem provaedem olketa best tul for iumi iusim. Iumi garem Bible and olketa Bible buk, magasin, brochure, tract, and kaset and video for iumi iusim for helpem pipol evriwea long world. Iumi garem olketa pablikeson hia insaed winim 380 languis. And tu, thru long olketa kongregeson meeting, assembly, and convention, Jehovah provaedem theocratic education and training for iumi iusim olketa gudfala tul hia long ministry bilong iumi.
Nomata Jehovah strongim hand bilong iumi long planti difren wei, hem expectim iumi tu for trae hard. Ting go bak long samting wea profet Elisha talem King Jehoash, wea kam long Elisha for kasem help for faet againstim olketa bilong Syria. Elisha talem datfala king for tekem samfala arrow and for hitim graon witim olketa. Bible hem sei: “Hem hitim thrifala taem then hem stop. And datfala man bilong trufala God hem kros long hem; dastawe hem sei: ‘Iu shud hitim faev or sixfala taem! Sapos olsem bae iu finisim Syria evribit, bat from diswan bae iu winim Syria thrifala taem nomoa.’” (2 Kings 13:18, 19) From hem fail for barava trae hard, Jehoash no win evribit taem hem faet againstim olketa bilong Syria.
Disfala sem principle fitim iumi sapos iumi want for fulfillim samting wea Jehovah givim iumi for duim. Winim wei for wari abaotem olketa samting wea maet blokem iumi or hao wanfala assignment hem hard tumas, iumi shud duim witim strong and full heart bilong iumi. Iumi need for strongim hand bilong iumi and depend long help bilong Jehovah.—Isaiah 35:3, 4.
Jehovah Bae Strongim Hand Bilong Iumi
Jehovah bae no fail for helpem iumi and strongim hand bilong iumi for duim will bilong hem. Hem tru, God bae no iusim mirakol for duim evri samting for iumi. Hem expectim iumi for duim part bilong iumi—readim Bible evriday, evritaem prepare for and attendim olketa meeting, join insaed ministry long evri chance iumi garem, and prea long hem evritaem. Sapos iumi faithful and waka hard for duim part bilong iumi taem iumi garem chance, Jehovah bae strongim iumi for duim samting hem expectim iumi for duim.—Philippians 4:13.
Tingim wanfala Christian man wea waef bilong hem and mami bilong hem tufala evriwan dae insaed wanfala year nomoa. No longtaem bihaen, dota-in-law lusim son bilong hem and Christian living. Disfala brata hem sei: “Mi lanem hao iumi no savve chusim test wea iumi kasem, and iumi no savve chusim taem wea iumi kasem diswan or haomas taem hem kamap.” Hao nao hem kasem strong for go ahed? “Prea and study seleva hem barava helpem mi. And wei wea olketa spiritual brata and sista saportim mi hem barava comfortim mi. Winim evri samting, mi luksavve hao hem barava important for mekem grow wei for fren gud witim Jehovah bifor iumi kasem hardfala taem.”
Nomata wanem samting kasem iu long laef, disaed strong for trustim Jehovah evribit and for mekius long evri samting wea hem provaedem for strongim hand bilong iu. Then bae iu fit for givim best bilong iu long service bilong Jehovah and long wei olsem givim praise and honor long nambawan nem bilong hem.—Hebrews 13:15.
[Piksa long page 31]
From hem fail for barava trae hard, Jehoash no win evribit taem hem faet againstim olketa bilong Syria