Long Tebol Bilong Kapten
INTERESTING pipol, naesfala kaikai, and gudfala story mekem man barava enjoyim wei for kaikai long tebol bilong kapten long wanfala ship. Bat wanfala story wea kamap long tebol bilong Kapten Robert G. Smith, bilong White Star Line shipping company, hem wanfala spiritual feast.—Isaiah 25:6.
Long 1894, taem hem 24 year, Robert kamap kapten bilong sailing ship Kinclune of Dundee wea redy for go long firstfala gogo bilong hem raonem full world. Bihaen, hem kamap kapten bilong samfala White Star ship, olsem Cedric, Cevic, and Runic.a Taem hem travel akrosim Atlantic from New York go kasem Liverpool, England, long wanfala ship hia, Robert welkamim Charles Taze Russell long tebol bilong hem. Story bilong hem witim Russell mekem Robert interest long message bilong Bible, and for helpem hem lane moa, hem hapi for kasem olketa buk Studies in the Scriptures from Russell.
Russell go ahed for story long Robert thru long olketa leta, and from diswan, interest bilong hem long message bilong Bible hem grow. Robert sharem niu savve wea hem lanem witim waef bilong hem. No longtaem bihaen, tufala evriwan kamap Olketa Bible Student, wea hem nao nem bilong Olketa Jehovah’s Witness long datfala taem. Bihaen, Robert kasem privilege for givim olketa Bible tok. Olsem example, long Brisbane, Australia, hem storyim theme “Comfort Bilong Gilead” and showim hao Word bilong God garem message wea hem “ansa for stretem evri trabol long earth.” Long England, waef and olketa young pikinini bilong hem help for showim datfala “Photo-Drama of Creation,” and pleim recording bilong tok bilong Russell taem olketa showim olketa piksa hia.
Robert givim long olketa pikinini bilong hem present bilong Kingdom truth wea hem kasem. Distaem, faevfala genereson bihaen, 18 member bilong famili busy for sharem gud nius witim nara pipol, hapi for samting wea kapten kasem long tebol bilong hem.
Thru long olketa pablikeson and Bible education waka bilong olketa, Olketa Jehovah’s Witness helpem pipol raonem full world for lanem Bible message wea Kapten Smith interest tumas long hem. Iu tu savve faendaot wanem nao datfala samting wea interesting tumas long tebol bilong kapten.
[Footnote]
a Kapten bilong wanfala nara ship, Titanic, wea long firstfala gogo bilong hem, hem sink daon, hem Kapten E. J. Smith (no wanfala relative).
[Piksa long page 8]
Robert G. Smith
[Piksa long page 8]
Charles T. Russell