Hu Nao Startim Religion Bilong Iufala?

Olketa Jehovah’s Witness kamap organization moa long olketa year bilong 1870. Long datfala taem, wanfala smol grup klosap long Pittsburgh, Pennsylvania, long America, start for studyim Bible tugeta. Olketa comparem teaching bilong olketa church witim samting wea Bible teachim. Samting wea olketa lanem olketa raetem long staka article insaed olketa buk, niuspepa, and long magasin wea distaem olketa kolem Wastaoa wea Talemaot Kingdom Bilong Jehovah.

Wanfala man long datfala grup hem Charles Taze Russell. Russell hem lead long datfala waka for teachim Bible long pipol and hem firstfala editor for Wastaoa magasin tu, bat hem no startim wanfala niu religion. Long datfala taem pipol savve kolem datfala grup, olketa Bible Student. Goal bilong Russell and olketa nara Bible Student hem for mekhae long olketa teaching bilong Jesus Christ and for duim sem samting wea olketa Christian duim long taem bilong olketa aposol. From Jesus hem startim Christian Wei, mifala sei Jesus nao startim organization bilong mifala.—Colossae 1:18-20.