Hao for Mekem Grow Balance Tingting Abaotem Waka
LONG taem distaem wea olketa kantri stragol witim each other saed long selen, wea pipol laek winim each other long bisnis, and wea olketa company iusim machine for wakem moa and moa samting, staka pipol no luk forward for go waka each day. Nomata olsem, iumi shud enjoyim waka bilong iumi. Why? Bikos God wakem iumi long image bilong Hem—and God kasem hapi from waka hem duim. Olsem example, taem hem lukim waka wea hem duim insaed sixfala “day” bilong creation, or longfala sekson bilong taem, Genesis 1:31 sei “God lukim evri samting wea hem wakem and, lukim! hem gud tumas.”
Wei wea Jehovah laekem tumas for duim waka hem wanfala reason Bible kolem hem “datfala hapi God.” (1 Timothy 1:11) Dastawe, sapos iumi followim hem, iumi bae hapi tu! Saed long diswan, King Solomon bilong Israel bifor, man for build and organize, hem raet: “Evri man shud kaikai and drink and lukim gud samting from evri hard waka bilong hem. Hem nao present from God.”—Ecclesiastes 3:13.
Long world distaem wea olketa waka go ahed for change, hem wanfala challenge for mekem grow gudfala and balance tingting abaotem waka. Bat Jehovah God hem blessim olketa wea followim loving direction bilong hem. (Psalm 119:99, 100) Olketa hia kamap wakman wea waka gud wea boss trustim and from diswan, staka taem olketa no lusim waka bilong olketa. Olketa lane for tingim laef and waka no just from saed long selen bat from spiritual saed tu. Diswan mekem olketa fit for disaed gud long laef and for lukim hao wei wea olketa hapi and feel sure hem no depend long waka or haomas waka nao stap for olketa duim. (Matthew 6:31-33; 1 Corinthians 2:14, 15) Hem helpem olketa for mekem grow balance wei for tingim waka.
Mekem Grow Wei for Tingim Waka wea Mekem God Hapi
Samfala pipol no savve stop waka, olketa putim waka olsem first samting long evri nara samting. Samfala laekem end bilong day kam kwiktaem mekem olketa finis waka and go bak long haos. Wanem nao balance wei? Bible givim ansa: “Hem moabeta for garem lelebet rest winim wei for waka olowe and aftarem wind.” (Ecclesiastes 4:6) For ova tumas long waka hem kosim problem and no helpem man kasem eni gud samting—for “aftarem wind.” Why nao olsem? Bikos hem savve spoelem samting wea givim iumi really hapi: wei wea iumi fren gud witim famili and olketa fren, spiritual laef bilong iumi, health bilong iumi, and wei wea iumi laef longtaem. (1 Timothy 6:9, 10) Balance tingting hem for satisfae witim lelebet material samting and garem peace winim wei for ova tumas long waka bat garem trabol and sorre.
Wei wea Bible encouragem datkaen balance tingting no minim hem appruvim lesy fasin. (Proverbs 20:4) Lesy fasin hem isisi spoelem wei wea man respectim seleva and wei wea nara pipol respectim iumi. Worse moa, hem spoelem wei wea iumi fren witim God. Bible talem stret hao man wea les for waka no fit for kaikai from waka bilong nara pipol. (2 Thessalonians 3:10) Hem shud changem wei bilong hem and waka hard, mekem hem savve provaed for hemseleva and olketa wea depend long hem. Thru long hard waka maet hem savve helpem tu pipol wea garem really need—samting wea Word bilong God encouragem iumi for duim.—Proverbs 21:25, 26; Ephesians 4:28.
Trainim Pikinini for Tinghae Long Waka
For waka gud hem no samting wea kamap seleva; man lanem from taem hem pikinini. Dastawe, Bible encouragem olketa dadi and mami olsem: “Trainim wanfala boy [or girl] fitim wei for hem followim; nomata taem hem kamap olo, hem bae no lusim datwan.” (Proverbs 22:6) For join witim wei for showim gud example olsem pipol for waka, wise parents start for trainim pikinini bilong olketa long wei for givim olketa waka for duim raonem haos fitim age bilong olketa. Nomata pikinini maet les for duim samfala waka, gogo olketa bae lukim hao olketa tu important part bilong famili—especially taem Mami and Dadi praisem olketa taem olketa duim gud waka bilong olketa. Sorre tumas, samfala parents duim klosap evriting for pikinini bilong olketa from olketa maet tingse diswan hem kaenfala fasin. Olketa parents olsem shud ting raonem Proverbs 29:21, wea sei: “Sapos man duim evriting for servant [or pikinini] bilong hem from taem hem young yet, taem hem kamap moa olo bae hem kamap man wea no tinghae long samting.”
Parents wea kea for olketa pikinini bilong olketa barava interest tu long skul waka bilong olketa and encouragem olketa for lane and waka hard long skul. Diswan bae helpem olketa young wan bihaen, long taem olketa waka for selen.
Chusim Waka Long Wisefala Wei
Bible no talem iumi wanem waka iumi shud aftarem, bat hem givim iumi samfala mark mekem iumi no blokem wei wea iumi grow long spiritual wei, servem God, and duim olketa nara important responsibility bilong iumi. Olsem example, aposol Paul raet olsem: “Taem wea stap yet hem short. So, letem olketa . . . wea iusim olketa samting bilong world [kamap] olsem olketa wea no iusim evribit; from wei bilong disfala world hem go ahed for change.” (1 Corinthians 7:29-31) No eniting long disfala system hem stap olowe or garem strong faondeson. For givim evri strong and taem bilong iumi long hem hem olsem for spendem evri selen bilong iumi long wanfala haos wea olketa buildim long area wea savve flood olowe. Hem krangge samting!
Olketa nara Bible transleison transleitim toktok “no iusim evribit” olsem “no busy tumas long hem.” (Today’s English Version) Wise pipol bae tingim evritaem wei wea taem wea stap yet for disfala system “hem short” and and wei wea, for “busy tumas” long hem, bae lead go long sorre.—1 John 2:15-17.
‘God Bae Nating Forgetim Iu’
Jehovah savve long samting iumi needim winim iumiseleva. Hem savve tu long taem iumi stap insaed, saed long purpose bilong hem. Dastawe, hem remindim iumi: “Living bilong iufala mas kamap free from wei for lovem selen, taem iufala satisfae long samting wea stap distaem. From [God] talem finis: ‘Mi bae nating lusim iu and bae nating forgetim iu.’ ” (Hebrews 13:5) Toktok hia barava givim comfort! For followim loving wei wea God kea for pipol bilong hem, big haf bilong sermon bilong Jesus long maunten hem for teaching olketa disaepol bilong hem balance tingting saed long waka and material samting.—Matthew 6:19-33.
Olketa Jehovah’s Witness trae hard for followim olketa teaching hia. Olsem example, wanfala Witness, wea hem electrician, hem no acceptim offer bilong boss bilong hem for waka ovataem. Why? Bikos hem no laekem waka bilong hem for spoelem taem wea hem markem for famili bilong hem and for olketa spiritual samting. From hem nambawan wakman wea boss trustim, boss bilong hem respectim wanem hem laekem. Hem tru, no evri boss bae kaen olsem, and man maet need for luk aotem nara waka for go ahed balance long living. Nomata olsem, olketa wea putim full trust long Jehovah staka taem lukim hao gud fasin bilong olketa and wei wea olketa waka gud hem mekem boss bilong olketa hapi long olketa.—Proverbs 3:5, 6.
Taem Evri Waka Kasem Reward
Long disfala system wea no perfect, olketa waka bae no savve free from problem and samting wea happen wea man kanduit kontrolem. Tru nao, olketa samting maet kamap worse taem world gogo for no stedy and saed long selen hem ap and daon or hem fail. Bat diswan hem for lelebet taem nomoa. Klosap nao evriwan bae garem waka. And tu, evri waka man bae hapi for duim and kasem reward from hem. Hao nao datwan fit for kamap? Wanem nao bae mekem change olsem kamap?
Thru long profet bilong hem Isaiah, Jehovah point go long wanfala taem olsem long future. Jehovah hem sei: “Mi wakem niu heven and wanfala niu earth; and olketa samting bilong bifor bae no kamap moa long mind, and hem bae no kamap moa long heart.” (Isaiah 65:17) Hem story abaotem niu gavman bilong hem, wea anda long hem wanfala sekson bilong pipol wea barava difren and niu bae kamap.—Daniel 2:44.
Abaotem living and waka bilong pipol long datfala taem, profesi go ahed for sei: “Olketa bae buildim haos and stap insaed; and olketa bae plantim plantation and kaikaim frut bilong hem. Olketa bae no buildim and narafala man nao stap insaed; olketa bae no plantim and narawan nao kaikaim. From olketa day bilong pipol bilong mi bae olsem olketa day bilong wanfala tree; and waka wea olketa seleva duim pipol wea mi chusim bae iusim evribit. Olketa bae no hard waka nating, or bonem pikinini for mek trabol; bikos olketa nao pikinini bilong olketa wea Jehovah blessim, witim laen pikinini bilong olketa tu.”—Isaiah 65:21-23.
Datfala niu world wea God designim bae barava difren! Waswe, bae iu laek for laef long world olsem, wea iu “bae no hard waka nating” bat bae enjoyim evribit samting wea kamaot from waka wea iu duim? Bat, lukim tu hu nao bae kasem kaen blessing olsem: “Olketa nao pikinini bilong olketa wea Jehovah blessim.” Iu savve kamap wanfala long olketa hia wea Jehovah “blessim” long wei for lane abaotem Jehovah and followim olketa mark bilong hem. Jesus hem sei: “Diswan nao minim laef olowe, for olketa kasem savve long iu, datfala only tru God, and long datwan wea iu sendem kam, Jesus Christ.” (John 17:3) Olketa Jehovah’s Witness bae hapi for helpem iu kasem datfala savve wea lead go long laef olowe thru long wei for studyim Word bilong God, Bible.
[Box long page 6]
“STAKA ASK FOR OLKETA”
Bible sei: “Nomata wanem iufala duim, duim witim full soul for Jehovah, and no for man.” (Colossians 3:23) Hem klia hao man wea waka followim gudfala principle hia hem bae wakman wea staka boss bae laekem. Dastawe J.J.Luna, insaed buk bilong hem How to Be Invisible, advaesem olketa boss for luk aotem olketa wakman wea active member bilong samfala religion, bat hem sei moa: “Samting wea staka taem happen nao hem wei wea gogo mifala givim waka long Olketa [Jehovah’s] Witness.” Wanfala long olketa reason hem talem nao hem wei wea pipol savve long honest fasin bilong olketa, and diswan mekem “staka ask for olketa.”
[Olketa Piksa long page 5]
Wei for balancem waka witim olketa spiritual samting and hapitaem mekem man satisfae