Biliv Long Honest Wei—Hem Gud Tumas, bat Waswe, Hem Inaf?
WASWE, wei for biliv long honest wei hem gud samting for garem long evriday living bilong iumi? Insaed wei for biliv long honest wei hem wei for free from giaman or hypocrite fasin. Tru nao, disfala fasin savve helpem iumi for strongim wei wea iumi fren witim nara pipol. Aposol Paul sei: “Obeyim olketa wea masta [bilong iufala] long earth, no only long taem olketa lukluk kam, for mekem olketa hapi, bat witim honest heart, witim wei for fraet long Jehovah.” (Colossians 3:22) Evriwan bae hapi for garem kaen man wea honest long waka. Distaem, pipol wea honest long waka maet garem moa chance for faendem and keepim waka bilong olketa.
Bat, samting wea mekem diswan gud tumas nao hem wei wea hem affectim wei wea iumi fren witim God. Olketa Israelite bifor garem blessing bilong God taem olketa careful for followim olketa law and festival. Taem hem storyim wei wea kongregeson hem stap klin, Paul encouragem olketa Christian: “Letem iumi keepim festival, no witim oldfala yeast, and no witim yeast bilong nogud fasin and wicked fasin, bat witim olketa cake bilong honest fasin and truth wea no garem yeast.” (1 Corinthians 5:8) For God acceptim worship bilong iumi, wei for biliv long honest wei hem no just gud samting bat hem samting wea man barava need for garem. Nomata olsem, lukim hao wei for biliv long honest wei hem no inaf. Hem mas join witim truth.
Olketa wea wakem datfala maeti ship Titanic and olketa passenger wea stap insaed maet biliv strong hao datfala ship no savve sink daon. Bat long firstfala gogo bilong hem long 1912, hem bangam bigfala ice and 1,517 pipol lusim laef bilong olketa. Samfala Jew long first-century maet biliv strong long wei bilong olketa for worshipim God, bat strong bilong olketa no “followim stretfala savve.” (Romans 10:2) For God acceptim iumi, wei for biliv long honest wei mas garem faondeson long stretfala information. Olketa Jehovah’s Witness long area bilong iu bae hapi for helpem iu lukluk gud long olketa samting wea insaed wei for servem God witim honest fasin and truth.