Iusim Gud Olketa Change Long Living Bilong Iu
Pum, Jan, Dries, and Otto, fofala Christian elder wea stap long Netherlands, semsem long planti samting. Fofala evriwan marit and garem olketa pikinini. And tu, samfala year bifor, olketa waka full-taem for selen and garem gudfala haos. Bat olketa finis for waka for selen and start for iusim full strong and taem bilong olketa for saportim Kingdom bilong God. Wanem nao helpem olketa for mekem change hia? Evriwan long fofala hia mekius long olketa change wea kamap long living bilong olketa.
PLANTI long iumi bae experiencem hao living bilong iumi savve change. Planti change wea kamap, olsem wei for marit, garem pikinini, or for luk aftarem olo parents, hem bringim moa responsibility. Bat, samfala change givim iumi moa freedom for mekem Christian ministry bilong iumi kamap moa big. (Matthew 9:37, 38) Olsem example, olketa pikinini bilong iumi wea big finis maet lusim hom, or iumi maet retire from waka for selen.
And tu, nomata hem tru hao living bilong iumi maet change nomata iumi wantem datwan or nomoa, samfala Christian win for mekem olketa change long living bilong olketa wea open wei for share moa long ministry. Hem nao barava samting wea Pum, Jan, Dries, and Otto duim. Hao?
Taem Olketa Pikinini Lusim Hom
Pum waka olsem accountant long wanfala company. Hem and waef bilong hem, Anny, planti taem serve olsem auxiliary pioneer witim tufala dota bilong olketa. Pum and Anny mekem olketa arrangement tu for garem hapitaem witim olketa wea insaed pioneer ministry. Tufala sei: “Diswan protectim mifala from olketa problem wea difren kaen wei for kaban maet kosim.” Example bilong parents bilong tufala muvim tufala dota hia for kamap regular pioneer stretawe bihaen tufala finisim hae skul.
Taem pikinini bilong tufala lusim hom, Pum and Anny luksavve hao disfala change mekem tufala for moa free and garem extra selen wea tufala savve iusim for go long samfala interesting ples or for enjoyim olketa difren kaen hapitaem. Bat tufala disaed for iusim disfala change long living for mekem ministry bilong tufala kamap moa big. So Pum askem boss bilong hem for no waka wanfala day each week. Bihaen, Pum mekem arrangement mekem hem fit for start waka long 7:00 a.m. and finis long 2:00 p.m. For katdaon long waka hem minim for live long lelebet selen wea no olsem bifor. Nomata olsem, tufala win, and long 1991, Pum joinim waef bilong hem olsem wanfala regular pioneer.
Next samting, olketa askem Pum for lukaftarem wanfala Assembly Hall bilong Olketa Jehovah’s Witness. Diswan minim tufala mas lusim hom wea tufala stap long hem for 30 year finis and go for stap long wanfala smol haos long area bilong datfala Assembly Hall. So tufala muv go long there. Waswe, hem hard? Anny sei taem hem tingim hom, hem savve askem hemseleva, ‘Waswe, mi olsem waef bilong Lot?’ Hem nating laek for ‘luk bak.’—Genesis 19:26; Luke 17:32.
Pum and Anny feelim hao disison bilong tufala bringim staka blessing. Witim planti nara samting, tufala enjoyim service bilong tufala long datfala Assembly Hall, olsem wei for prepare for olketa distrik convention, and for story witim olketa circuit overseer (minister wea travel raon) wea givim tok long datfala assembly hall. Samfala taem, tufala visitim olketa difren kongregeson taem Pum hem serve olsem substitute circuit overseer.
Wanem nao mekem tufala win long wei for mekem moa big service bilong tufala? Pum sei: “Taem wanfala big change kamap long laef bilong iu, iu need for disaed strong for mekius long datwan.”
Mekem Laef Kamap Moa Simpol
Jan and waef bilong hem, Woth, garem thrifala pikinini. Olsem Pum and famili bilong hem, Jan iusim change wea kamap long wisefala wei. For planti year, Jan kasem bigfala pei from hae position bilong hem long bank and hem provaedem naesfala living for famili bilong hem. Nomata olsem, hem garem strong feeling for mekem ministry bilong hem kamap moa big. Hem sei: “Wei for tinghae tumas long truth kamap moa strong long laef bilong mi, and love bilong mi for Jehovah hem grow.” So long 1986, Jan hem mekem change long living bilong hem. Hem sei: “Taem olketa organizem moa olketa waka long office, mi mekius long datfala chance and start for waka thrifala day nomoa long week. Olketa wakfren bilong mi wea sapraes long diswan kolem mi Diwodo bikos mi waka long dinsdag [Tuesday], woensdag [Wednesday], and donderdag [Thursday] nomoa. Pei bilong mi hem go daon 40 percent. Mi sellim haos bilong mifala and baem wanfala haos-boat mekem mifala savve serve long ples wea need for olketa Kingdom pablisa hem moa big. Bihaen, mi ask for retire early, and selen wea mi kasem hem go daon 20 percent moa, bat long 1993, mi fit for serve olsem wanfala regular pioneer.”
Distaem, Jan hem wanfala member bilong Hospital Liaison Komiti and planti taem hem serve olsem convention overseer. Nomata health bilong hem no mas gud, Woth serve olsem auxiliary pioneer samfala taem. Thrifala pikinini bilong tufala marit finis and, witim marit partner bilong olketa, olketa barava strongfala minister bilong Kingdom.
Hao nao Jan and Woth change for fitim lelebet selen wea hem kasem? Jan hem sei, “Long taem wea mifala garem yet extra selen, mifala mek sure for no tinghae long olketa material samting. Long disfala taem, wei wea man mas weit bifor hem kasem samting hem no isi, bat olketa spiritual blessing and privilege wea mifala kasem hem winim wei wea hem no isi.”
Olsem Jan and Woth, Dries and waef bilong hem, Jenny, mekem disison tu for keepim laef bilong tufala simpol mekem tufala savve iusim moa taem for duim Kingdom waka. Dries and Jenny serve olsem pioneer go kasem taem tufala garem pikinini. So, for lukaftarem famili bilong hem, Dries duim waka olsem secretary bilong wanfala big company. Olketa boss bilong hem tinghae tumas long waka bilong hem and offerim hem wanfala hae position. Bat Dries no acceptim datfala hae position bikos diswan minim hem bae no garem staka taem for duim olketa Christian waka.
For lukaftarem wanfala famili—and tu for lukaftarem mami bilong Jenny wea sik—needim staka taem and strong bilong tufala. Nomata olsem, tufala go ahed for mekem grow pioneer spirit. Wanem nao helpem tufala for duim datwan? Jenny hem sei: “Mifala letem samfala pioneer for live witim mifala, samfala taem mifala invaetem samfala moa for kaikai, and provaedem rum for olketa circuit overseer stap long hem.” Dries sei moa: “Mifala keepim laef simpol and stap klia long wei for garem kaon. Mitufala disaed for no join insaed eni big bisnis or baem bigfala haos, mekem long future diskaen samting no savve holem bak mifala.”
Staka blessing kamaot from disison bilong Dries and Jenny for mekem olketa change long living wea bae givim tufala moa taem for duim Kingdom waka. Distaem tufala son bilong tufala serve olsem elder, and wanfala hem pioneer witim waef bilong hem. Dries and Jenny serve firstaem olsem spesol pioneer, and bihaen Jenny joinim Dries long circuit waka. Distaem tufala duim volunteer waka long Bethel, wea Dries hem serve olsem wanfala member bilong Branch Komiti.
Retire Early
Olsem Dries and Jenny, Otto and waef bilong hem, Judy, pioneer bifor tufala garem tufala dota. Taem Judy hem babule witim first pikinini bilong tufala, Otto faendem waka olsem skulteacher.
Taem tufala pikinini hia kakamap big, planti taem Otto and Judy invaetem olketa pioneer for sharem kaikai witim olketa mekem tufala dota bilong olketa savve lukim hapi bilong olketa full-taem Christian wakman. Gogo, first dota bilong tufala joinim pioneer service. Bihaen, hem attendim Gilead Skul and, distaem hem witim hasband bilong hem, serve olsem missionary long wanfala kantri long Africa. Mek-tu dota bilong Otto and Judy start for pioneer long 1987, and Judy tu start for pioneer.
Taem change wea kamap mekem Otto savve katdaon long skul waka, hem iusim datfala extra taem for pioneer. Gogo, hem finis from datfala waka evribit. Distaem, insaed traveling waka, Otto hem iusim datfala savve wea hem garem olsem teacher for strongim olketa kongregeson long spiritual wei.
Wanem nao advaes bilong Otto for olketa wea retire early from waka bilong olketa for selen? “Taem iu retire, no disaed for stap nating for wan or tu year firstaem. Hem isi tumas for getius long wei for ‘stap nating and relax.’ Gogo iu bae no tingim wei for pioneer nao. So, start stretawe for duim moa samting long ministry bilong iu and waka insaed long kongregeson.”
Iusim Savve wea Iu Garem Long Wisefala Wei
Hem tru, olketa brata olsem Pum, Jan, Dries, and Otto no strong nao olsem taem olketa young yet. Bat olketa garem bigfala savve, wisdom, and mature fasin. (Proverbs 20:29) Olketa savve wanem nao insaed wei for kamap dadi, and from olketa waka tugeta witim waef bilong olketa, olketa lelebet minim bigfala waka wea olketa garem. Witim waef bilong olketa, olketa deal witim famili problem and putim olketa theocratic goal for olketa pikinini bilong olketa. Otto hem sei: “Taem mi givim kaonsel olsem wanfala circuit overseer long olketa samting saed long famili, wei wea mi lukaftarem finis wanfala famili helpem mi for givim gudfala kaonsel.” Long sem wei, savve wea Dries garem hem helpem Bethel famili, wea garem planti young wakman.
Tru nao, savve wea olketa kasem finis bae helpem olketa brata olsem for kea for olketa difren kaen need insaed kongregeson. Hem olsem savve bilong olketa nao sharpenem tul wea olketa iusim, mekem olketa savve iusim strong bilong olketa long wei wea givim bigfala help. (Ecclesiastes 10:10) For tok stret, olketa savve duim moa samting winim olketa wea moa strong long physical wei bat wea no garem big savve.
Olketa brata olsem, witim waef bilong olketa tu, barava nambawan example for olketa young wan midolwan long pipol bilong Jehovah. Planti young pipol luksavve hao olketa hia experiencem finis planti long olketa challenge and blessing wea iumi read abaotem insaed olketa Christian pablikeson. Hem encouragem iumi for lukim olketa man and woman wea showimaot spirit for sakrifaesim seleva olsem Caleb wea, nomata hem olo, hem ask for wanfala hardfala assignment.—Joshua 14:10-12.
Followim Faith Bilong Olketa
Waswe, iu savve followim faith and samting wea olketa duim wea iumi story abaotem insaed disfala article? Remember, olketa mekem truth main samting long laef bilong olketa. Olketa mekem grow insaed pikinini bilong olketa feeling for laek pioneer. Olketa duim diswan, olsem Jan talem, “long wei for showimaot example long love for Jehovah and organization bilong hem, long wei for arrangem gudfala wei for kaban, and long wei for teachim olketa pikinini hao for saportim olketa seleva saed long selen.” Olketa waka and plei tugeta olsem famili tu. Pum hem sei: “Long taem bilong holiday, evritaem full famili go aot long preaching waka long morning and long aftanun mifala enjoyim tugeta wei for relax.”
Nara samting tu, olketa Christian hia plan firstaem, mekem taem eni change kamap, olketa redy for mekius long datwan. Olketa markem olketa goal and mekem disison wea helpem olketa for kwiktaem kasem olketa goal hia. Olketa lukaotem samfala wei for duim part-taem waka for selen and willing for kat daon long selen wea tufala kasem. (Philippians 1:10) Olketa waef hia saportim evribit hasband bilong olketa. Olketa garem strongfala feeling for go insaed datfala “bigfala door wea lead go for waka” and, from diswan, olketa kasem staka blessing from Jehovah.—1 Corinthians 16:9; Proverbs 10:22.
Waswe, iu tu want for mekem wei wea iu share long ministry kamap moa big? Sapos olsem, wei for iusim gud olketa change wea kamap long living bilong iu bae helpem iu for duim datwan.
[Piksa long page 20]
Pum and Anny lukaftarem Assembly Hall
[Piksa long page 20]
Jan and Woth share long preaching waka
[Piksa long page 21]
Dries and Jenny serve long Bethel
[Piksa long page 21]
Otto and Judy prepare for visitim nextfala kongregeson