Datfala Lord’s Supper​—Hem Wanem?

WANEM nao datfala Lord’s Supper, and wanem mining nao hem garem for pipol distaem? Olketa Encyclopedia and dictionary explainim Lord’s Supper olsem datfala kaikai wea Jesus Christ kaikaim witim olketa aposol bilong hem long evening bifor hem dae olsem sakrifaes. From hem lastfala kaikai bilong Jesus witim olketa faithful follower bilong hem, samfala kolem diswan Last Supper. And from Lord Jesus Christ seleva nao startim, datfala nem Lord’s Supper hem fitim.

Insaed history, staka pipol willing for dae for olketa samting olketa tinghae long hem. Olketa wea dae olsem givim gud samting long samfala pipol for lelebet taem. Bat, no eni wei olsem for sakrifaesim laef bilong man hem kasem dae bilong Jesus Christ. And tu, no eni dae insaed history bilong man wea fulap witim trabol hem affectim moa pipol olsem diswan. Why?

For ansarem disfala kwestin and for helpem iu faendaot mining bilong Lord’s Supper for iu, mifala invaetem iu for readim nextfala article.