Taem Preaching Waka Hem Barava Samting for Rememberim

“Sun hem barava shaen kam daon. Datfala road wea go ap long maunten luk olsem hem no savve kasem end. Bihaen mifala winim planti hardfala samting, mifala kasem goal bilong mifala: datfala vilij wea farawe tumas. Wei for feel taed tumas hem tan go long hapi taem mifala noknok long first haos and mifala kasem kaenfala welkam. Kasem end bilong datfala day, mifala offerim evri literature wea mifala tekem and startim samfala Bible study. Pipol hia barava want for lane. Hem taem for mifala mas go, bat mifala promis for kam bak.”

WANFALA grup bilong olketa pioneer minister long Mexico kasem olketa experience olsem evritaem. Olketa hia barava want for share long strongfala wei for fulfillim waka wea Jesus Christ givim long olketa disaepol bilong hem: “Iufala bae witness for mi . . . go kasem evri farawe ples long earth.” (Acts 1:8) Long Mexico, olketa spesol preaching campaign—wea olsem wanfala plan bilong gogo for olketa pioneer—olketa organizem for kasem olketa territory wea olketa no markem for eni kongregeson and, wea gud nius bilong Kingdom bilong God no kasem evritaem. Planti taem, olketa hia hem olketa territory wea farawe and hard for kasem. Olketa farawe kongregeson wea garem bigfala territory tu kasem help.

For disaedem olketa wanem area long kantri nao datfala pioneer gogo bae kavarem, branch office bilong Olketa Jehovah’s Witness lukluk gud long olketa need bilong territory.a Bihaen diswan, olketa markem olketa grup bilong olketa spesol pioneer for preach long datfala territory. Olketa givim olketa trak wea fit for go long olketa road wea raf tumas. Olketa iusim olketa trak hia tu olsem stoahaos for olketa literature and ples for sleep taem hem fitim.

Willing for Acceptim

Start long October 1996, olketa narawan for preachim gud nius kasem invitation for tekpart long disfala waka, for go witim olketa spesol pioneer. Olketa Kingdom pablisa and olketa regular pioneer wea willing for serve long ples wea garem bigfala need, joinim datfala spesol preaching campaign long olketa difren ples. Samfala pablisa kasem assignment for waka witim wanfala long olketa kongregeson wea olketa bae kasem long datfala campaign mekem olketa luk aftarem datfala territory and mekem grow interest bilong pipol. Planti young pablisa and pioneer acceptim olketa invitation hia and olketa kasem olketa experience wea barava encouragem olketa.

Olsem example, Abimael, wanfala young Christian wea waka long wanfala mobile phone company wea hem kasem gud pei, disaed for tekpart long preaching waka hia long olketa farawe ples. Taem olketa boss bilong hem faendaot hem bae lusim waka bilong hem, olketa offerim hem wanfala hae position and for apim wages bilong hem. Olketa man wea olketa waka tugeta putim hevi long hem, and sei diswan hem wanfala spesol chance and hem bae krangge tumas sapos hem let go long datfala offer. Nomata olsem, Abimael disaed strong for saportim datfala spesol preaching waka for thrifala month. Bihaen hem enjoyim disfala service, Abimael disaed for stap olowe nao long wanfala farawe kongregeson wea garem bigfala need for olketa Kingdom pablisa. Distaem hem garem wanfala waka wea fitim hem and hem lane for garem simpol living.

Long nara example, Julissa mas travel 22 hour long bas for kasem assignment bilong hem. Long last part bilong gogo bilong hem, hem missim last bas for datfala day. Bat, wanfala pik-ap trak hem stap wea savve tekem olketa wakman. Julissa strongim hemseleva for no feel fraet and hem go askem olketa sapos hem savve kam witim olketa long datfala trak. From hemseleva nomoa woman midolwan long evri man hem lelebet feel seksek. Taem hem start for preach long wanfala young man, hem luksavve dat hem wanfala Jehovah’s Witness! Julissa ting go bak, “witim datwan, man wea draevem datfala trak hem wanfala elder long kongregeson wea mi go long hem!”

Olketa Olo Tekpart

Disfala waka hem no for olketa young wan nomoa. Adela, wanfala olo sista, hem evritaem laek for givim moa taem long preaching waka. Hem garem chance for duim olsem taem hem kasem wanfala invitation for tekpart long disfala spesol preaching waka. Hem talem: “Mi barava hapi long assignment bilong mi and mi askem olketa elder long kongregeson for letem mi stap for longfala taem. Mi hapi from nomata mi olo, mi still fit for Jehovah iusim mi.”

Olsem tu, wei wea Martha, wea hem 60 year, tinghae long Jehovah and lovem pipol, muvim hem for volunteer long disfala campaign. Taem hem lukim territory hem farawe and olketa ples hem hard and diswan mekem grup bilong hem for no kasem evri pipol, hem baem wanfala trak for olketa pioneer iusim. Contribution bilong datfala sista mekem olketa fit for kavarem bigfala territory and for preachim truth bilong Bible long planti pipol.

Pipol Barava Acceptim

Goal bilong olketa wea tekpart long olketa spesol preaching campaign hia hem for “mek-disaepol.” Saed long diswan, olketa samting wea kamaot from hem barava nambawan. Pipol wea stap farawe kasem truth from Bible wea savve sevem laef. (Matthew 28:19, 20) Olketa startim planti Bible study. Olketa pablisa wea stap long datfala ples or olketa pablisa bilong grup wea disaed for stap long datfala territory nao conductim olketa Bible study hia. Long samfala ples, olketa organizem olketa grup bilong olketa pablisa, and long samfala ples moa olketa startim olketa smol kongregeson.

Magdaleno and olketa fren bilong hem iusim pablik transport for kasem farawe territory wea olketa markem for olketa. Insaed long trak, olketa iusim gud disfala chance for preach long draeva. “Disfala man talem mifala dat week bifor samfala Witness kam long haos bilong hem taem hem no stap. Taem hem kam bak, famili bilong hem talem hem evri samting wea olketa herem. Mifala talem hem mifala no stap klosap bat kam from planti difren state long kantri mekem mifala saportim disfala spesol preaching campaign and mifala pei for evri samting bilong mifala seleva. Diswan barava muvim hem, and hem sei hem and famili bilong hem bae start for studyim Bible long datfala sem week. Hem saportim waka hia tu long wei wea hem no askem selen long mifala for pei for datfala gogo.”

Magdaleno hem barava sapraes tu long interest bilong olketa lokol pipol long olketa Chiapas maunten. “Mi and waef bilong mi garem experience for talem message bilong Kingdom long wanfala grup bilong 26 young pipol wea olketa attendim Presbyterian Church. Evriwan long olketa barava lisin gud for 30 minute. Olketa holem Bible bilong olketa, and mifala fit for givim gudfala witness long olketa abaotem olketa purpose bilong Jehovah. Klosap evriwan hia garem Bible long Tzeltal languis.” Mifala startim planti Bible study wea muv ahed gud.

Wei for Againstim Hem Katdaon

For winim tufala year, wanfala community long Chiapas no herem message from Bible from samfala pipol againstim Bible message. Teresa, wanfala wea full-taem for talemaot gud nius, hem lukim dat samfala Witness olketa fraet for preach long datfala vilij. “Evriwan sapraes fogud taem pipol hia willing for lisin. Bihaen mifala preach, hem start for rain big nao. Mifala luk aotem ples for haed, then mifala kam nao long haos bilong Sebastián wea hem welkamim and letem mifala go insaed for haed from rain. Taem mifala insaed, mi askem hem sapos eniwan visitim hem finis. Hem sei nomoa, so mi start for witness long hem and startim wanfala Bible study long buk Savvy Wea Lead Go long Laef Olawe.b Taem mifala finis, Sebastián hem krae and begim mifala for kam bak for study witim hem.”

Nara pioneer grup wea visitim Chiapas report olsem: “Witim help bilong Jehovah, mifala kasem olketa gudfala samting. Insaed first week, mifala startim 27 study; insaed mek-tu week, mifala invaetem pipol for kam lukim video bilong mifala The Bible—Its Power in Your Life. Sixti pipol nao attend. Evriwan hapi tumas for lukluk long datfala video. Taem hem finis, mifala story raonem for startim wanfala Bible study grup. Mifala barava hapi from tufala study grup nao start long datfala vilij.

“Bihaen mifala finisim olketa territory wea olketa markem, mifala go bak moa long datfala vilij for strongim olketa interest wan, and for lukim hao nao olketa Bible study grup wea mifala organizem go ahed. Mifala invaetem olketa long wanfala pablik meeting and long Wastaoa Study. Bat, no eni ples big fitim olketa meeting hia. Man wea offerim haos bilong hem for datfala study grup pointim wanfala ples bihaen haos bilong hem and sei: ‘Olketa meeting savve kamap long datfala ples bihaen haos.’ ”

Long datfala weekend olketa pioneer and pipol wea interest evriwan help for redyim datfala ples mekem olketa savve iusim for olketa meeting. Long first meeting olketa wea attend hem 103. Distaem olketa conductim 40 Bible study long datfala vilij.

“Wanfala Nambawan Experience”

Witim olketa nambawan samting wea kamaot from preaching waka hia, olketa wea tekpart barava kasem gudfala samting for olketa seleva. María, wanfala young pioneer wea tekpart insaed wanfala long olketa campaign hia, talemaot feeling bilong hem olsem: “Diswan hem nambawan experience for tufala reason. Hapi bilong mi long preaching waka hem kamap moa big, and wei wea mi fren witim Jehovah hem kamap moa klos. Wantaem mifala barava taed for klaemap wanfala maunten. Bihaen mifala askem Jehovah for help, mifala experiencem wanem Isaiah 40:29-31 talem: ‘Olketa wea hope long Jehovah bae kasem paoa moa.’ So mifala kasem ples and conductim olketa study witim pipol wea kaen tumas for welkamim mifala.”

Nara young pioneer Claudia, wea 17 year talem iumi: “Mi kasem staka gud samting. Mi lane for kamap moabeta long ministry, wea givim mi bigfala hapi, and diswan leadim mi for markem olketa spiritual goal. Mi kamap mature tu long spiritual wei. Long haos mami nao duim evri samting for mi. Distaem, witim moa experience, mi kamap fit for duim samting seleva. Olsem example, mi getius for chusim tumas wanem mi kaikaim. Bat distaem mi mas change for fitim olketa difren living, mi no komplen nao abaotem kaikai. Diskaen service hem helpem mi for mekem grow barava gudfala wei for fren witim pipol. Mifala sharem wanem mifala garem and helpem each other.”

Wanfala Hapi Harvest

Wanem nao samfala gud samting wea kamaot from diswan? Long start bilong 2002, samting olsem 28,300 pioneer tekpart long olketa pioneer campaign hia. Olketa conductim winim 140,000 Bible study and olketa duim winim tu million hour insaed long preaching waka. For helpem pipol for lanem truth bilong Bible, olketa offerim klosap 121,000 buk and klosap 730,000 magasin. Planti taem olketa pioneer conductim 20 or moa Bible study.

Pipol hia barava thankiu tumas long hard waka and kaenfala fasin bilong olketa pablisa wea kam witim message bilong Bible. Nomata olketa poor, planti strong for olketa pablisa mas acceptim donation from olketa. Wanfala poor woman wea 70 year evritaem givim samting long olketa pioneer wea visitim hem. Sapos olketa no acceptim, hem bae krae nao. Wanfala poor famili talem olketa wea full-taem for talemaot gud nius dat kokorako hem leim samfala egg for olketa nomoa, and for olketa mas tekem olketa egg.

Moa important, pipol hia wea garem honest heart barava tinghae long olketa spiritual samting. Olsem example, wanfala young woman savve wakabaot seleva thri and haf hour for attendim olketa Christian meeting, and no savve missim eni meeting. Nomata tufala knee bilong hem nogud, wanfala olo woman wea interest travel for tufala hour for kasem instruction from Bible taem traveling overseer hem visit. Samfala wea no skul laek for lane for read and raet mekem olketa kasem gud samting moa from Bible education. Hard waka bilong olketa kasem bigfala blessing.

Long buk bilong Acts, Luke storyim wanfala vision wea aposol Paul hem lukim: “Wanfala man bilong Macedonia hem standap and go ahed for ask strong and sei: ‘Muv kam long Macedonia and helpem mifala.’ ” Paul willing for followim datfala invitation. Distaem long olketa area aotsaed long Mexico, planti showimaot sem spirit, mekem olketa seleva redy for talemaot gud nius “go kasem evri farawe ples long earth.”—Acts 1:8; 16:9, 10.

[Footnote]

[Piksa long page 9]

Planti Witness long Mexico share insaed olketa spesol preaching campaign