Waswe, Iu Remember?
Waswe, iu enjoyim olketa Wastaoa wea iu readim insaed olketa month wea go pas finis? Sapos olsem, trae for ansarem olketa kwestin long daon:
• Hao nao wei for savve long famili bilong Shaphan savve helpem iumi?
Shaphan hem copyist and secretary bilong King Josiah bilong Judah. Shaphan, wea garem bigfala paoa long kingdom, hem saportim waka bilong king for startim bak tru worship. Tufala son bilong Shaphan stap loyal long profet Jeremiah. And nara son and tufala granson tu iusim bigfala paoa bilong olketa for saportim tru worship. Long sem wei, iumi tu shud iusim wanem iumi garem and paoa wea iumi garem for saportim tru worship.—12/15, page 19-22.
• Hao nao Irene Hochstenbach hem winim wei for earpas and fit for servem Jehovah?
Hem seven year taem hem kamap earpas. Nomata hem earpas, hem lane for story witim pipol and distaem hem gogo witim hasband bilong hem (wanfala traveling overseer) taem hem servem olketa kongregeson long Netherlands.—1/1, page 23-6.
• Wanem nao tufala niu Bible study buk wea release long “Pipol wea Strong for Talemaot Kingdom” Distrik Convention?
Olketa Christian raonem world hapi for kasem buk Worshipim Datfala Only Tru God, wea olketa wakem for olketa niu wan studyim bihaen olketa studyim finis buk Savvy Wea Lead Go long Laef Olawe; nara niu buk hem Draw Close to Jehovah, wea mekhae long fasin bilong Jehovah and olketa samting wea hem duim. Hem showim tu hao iumi savve followim olketa fasin bilong hem.—1/15, page 23-4.
• Wanem nao mining bilong Proverbs 12:5: “Tingting bilong raeteous wan hem stret”?
Tingting bilong gud pipol barava stret and followim wei for no teksaed and hem raeteous. From love for God and for narawan hem muvim olketa raeteous wan, goal bilong olketa hem gud.—1/15, page 30.
• Wanem nao savve helpem man for mekem grow balance tingting abaotem waka?
Training for tinghae long waka from taem hem smol yet bae helpem man. Bible encouragem iumi for waka gud, for no lesy. (Proverbs 20:4) Hem encouragem olketa Christian tu for no ova tumas long waka. Iumi shud luksavve hao wei for servem God shud first samting long laef bilong iumi. (1 Corinthians 7:29-31) And tu, olketa tru Christian feel sure God bae nating lusim olketa.—2/1, page 4-6.
• Wea long Bible nao hem firstaem storyim altar?
Hem long Genesis 8:20, wea storyim altar wea Noah buildim taem hem kamaot from ark bihaen datfala Flood. Maet Cain and Abel iusim olketa altar taem olketa givim offering. (Genesis 4:3, 4)—2/15, page 28.
• Hao nao samfala Christian savve iusim gud olketa change long living?
Samfala acceptim—or mekem—olketa change saed long waka for selen mekem olketa garem moa taem for ministry. Samfala mekem big taem and chance for serve insaed service bilong God taem famili responsibility bilong olketa hem katdaon, olsem taem pikinini kamap full-grown and marit.—3/1, page 19-22.
• Hao nao example bilong Jonah and aposol Peter helpem iumi for lukim olketa narawan olsem Jehovah lukim olketa?
Iumi savve gud long rong tingting and mistek bilong Jonah and Peter taem tufala feisim test bilong faith and wei for obey. Nomata olsem, Jehovah lukim klia olketa gud fasin tufala garem and hem go ahed for iusim tufala long service bilong hem. Taem narawan mekem iumi feel nogud, iumi savve tingting moa long olketa gud fasin bilong olketa wea iumi maet laekem bifor and long olketa gud samting wea God lukim long olketa.—3/15, page 16-19.
• Why nao olketa namba wea olketa markem for each psalm and each verse long buk bilong Psalms hem difren long olketa difren Bible transleison?
Wei wea olketa nambarem long firstfala Hebrew languis hem change taem olketa transleitim go long Greek Septuagint. Olketa transleison wea kamap bihaen wea transleit from Hebrew text olketa difren from olketa transleison wea transleit from Septuagint.—4/1, page 31.