Wanem Nao Bae Iu Laek Askem God?
PIPOL evriwea raonem earth garem olketa important kwestin abaotem laef. Waswe, iu tu? Planti askem olketa kwestin hia long olketa teacher bilong religion, bat olketa no kasem ansa wea mekem olketa satisfae. Olketa narawan ting raonem olketa kwestin hia seleva nomoa. Samfala prea for kasem direction. Waswe, iu savve really kasem olketa ansa from God abaotem olketa kwestin wea mekem iu konfius? Samfala kwestin wea planti pipol sei olketa laek askem God hem nao olketa hia.
God, hu nao iu?
Wei wea olketa man tingting long God hem depend long kastom bilong olketa, religion bilong parents, and samting wea olketa seleva chusim. Samfala iusim wanfala nem for datfala God; olketa narawan kolem hem God nomoa. Waswe, hem important? Waswe, wanfala tru God nomoa stap wea showim iumi hu nao hem and wanem nao nem bilong hem?
Why nao wei for safa hem big tumas?
Sapos man wea garem nogud or dirty living hem spoelem health bilong hem or mekem hemseleva poor, maet hem komplen. Bat hem bae savve finis why nao hem safa.
Bat, planti narawan safa tu bat diswan no kamap from samting olketa duim. Samfala garem olketa bigfala sik. Olketa narawan stragol for faendem ples for stap and inaf kaikai for famili bilong olketa. Planti million pipol safa from criminal fasin, war, raf fasin, natural disaster, or no eni justice from pipol wea garem paoa.
So hem isi for minim why planti ask olsem: ‘Why nao kaen fasin olsem hem kamap big tumas? Why nao God letem evrikaen wei for safa olsem?’
Why nao mi laef? Wanem nao purpose bilong laef?
Olketa kwestin olsem planti taem kamap from man feel wiki from olketa samting insaed evriday living bilong hem no mekem hem really satisfae—and planti pipol nao savve feel olsem. Planti million narawan biliv hao God markem finis laef bilong each man. Waswe, diswan hem tru? Sapos hem tru dat God garem spesol purpose for iu, for sure iu bae want for savve wanem nao datwan.
Long evri buk long world, wanfala nomoa hem talemaot klia hao hem buk wea kam from God. Olsem iumi expectim for happen long wanfala message wea really kam from God, disfala buk hem stap long moa languis winim eni nara buk. Diswan nao Holy Bible. Insaed long diswan, Creator bilong heven and earth, God, hem showimaot hu nao hem and wanem nao nem bilong hem. Waswe, iu savve long datfala nem? Waswe, iu savve samting wea Bible talem abaotem wanem kaen man nao God? Waswe, iu savve wanem nao datwan talem abaotem samting wea God mas kasem from iu?
[Piksa Credit Line long page 2]
COVER: Chad Ehlers/Index Stock Photography
[Piksa Credit Line long page 3]
Mountain: Chad Ehlers/Index Stock Photography