Report Bilong Olketa wea Talemaot Kingdom
Help for Keepim Wei wea Blood Hem Holy
EVRIWEA long earth olketa servant bilong Jehovah showimaot loyal fasin long God taem olketa tinghae long wei wea blood hem holy. (Acts 15:28, 29) Faithful and wise slave class provaedem help for olketa Christian brata and sista. (Matthew 24:45-47) Iumi lukluk long samting wea kamaot from diswan long Philippines.
Branch long Philippines talem disfala report: “Long 1990 olketa talem mifala hao samfala brata from Brooklyn Bethel bae holem wanfala seminar hia long Philippines. Olketa invaetem samfala brata from samfala branch long Asia, olsem Korea, Taiwan, and Hong Kong. Purpose bilong diswan hem for help for startim Hospital Information Services long branch bilong olketa and tu for arrange for olketa Hospital Liaison Komiti. Long Philippines, firstaem olketa startim olketa komiti long fofala bigfala taon.” Olketa komiti hia bae trae for faendem olketa doctor wea willing for respectim Christian biliv bilong iumi saed long blood. Olketa bae helpem olketa brata taem problem saed long blood kamap.
Olketa chusim Remegio for serve long Hospital Liaison Komiti long Baguio. Gogo, olketa doctor start for luksavve long waka bilong olketa Hospital Liaison Komiti. Remegio rememberim taem olketa doctor wea holem meeting witim wanfala Hospital Liaison Komiti want for savve hao for treatim olketa Witness wea sik wea no willing for tekem blood. Remegio sei: “Olketa doctor start for askem staka kwestin, bat hem hard for ansarem olketa bikos olketa kwestin hia garem olketa hard toktok insaed.” Hem prea long Jehovah for helpem hem deal witim disfala challenge. Remegio sei moa: “Bihaen each kwestin, olketa nara doctor apim hand bilong olketa and talem hao olketa deal witim semkaen problem olsem bifor.” Remegio hapi long help hia, especially from taem bilong kwestin-and-ansa hia go ahed for tufala hour.
Distaem 21 komiti stap insaed full kantri, witim total bilong 77 brata wea serve long olketa komiti hia. Danilo, wanfala Witness wea hem wanfala medical doctor, sei: “Olketa doctor luksavve hao olketa Witness wea sik garem saport bilong wanfala organization wea kea for olketa long loving wei.” Wanfala doctor firstaem hem hol bak for duim operation wea no iusim blood long wanfala brata. Bat brata hia stand strong long biliv bilong hem. Disfala operation hem go ahed and hem win. Hospital Information Services sei: “Datfala doctor barava sapraes long wei wea datfala brata kamap gud kwiktaem. Hem sei: ‘From disfala samting wea happen, distaem sapos eni member bilong iufala needim operation wea no iusim blood, mi bae hapi for duim.’”