Wea Nao for Faendem Trufala Comfort?
“God and Dadi bilong Lord bilong iumi Jesus Christ . . . comfortim iumi long evri trabol bilong iumi.”—2 CORINTHIANS 1:3, 4.
1. Wanem kaen problem nao savve mekem pipol barava needim comfort?
BARAVA bigfala sik savve mekem man feel olsem laef bilong hem bae hard for gud bak moa. Olketa earthquake, cyclone, and bigfala hangre spoelem pipol tumas. War savve killim dae olketa famili member, distroem olketa haos or forcem pipol for ranawe and lusim evri samting bilong olketa. Wei for no kasem justice savve mekem pipol feel olsem no eni ples stap wea olketa savve kasem help. Olketa wea kasem olketa problem olsem barava needim comfort. Wea nao for faendem datwan?
2. Why nao no eni comfort hem winim comfort wea kam from Jehovah?
2 Samfala pipol and organization trae for provaedem comfort. Pipol tinghae long kaenfala toktok. Olketa relief supply savve helpem pipol for lelebet taem. Bat only Jehovah, datfala tru God, savve stretem evri problem and provaedem kaen help wea savve stopem olketa problem hia for happen moa long future. Bible sei olsem abaotem hem: “Blessim God and Dadi bilong Lord bilong iumi Jesus Christ, Dadi bilong olketa kaenfala mercy and God bilong evri comfort, wea comfortim iumi long evri trabol bilong iumi, mekem iumi fit for comfortim olketa wea kasem enikaen trabol thru long comfort wea iumiseleva kasem from God.” (2 Corinthians 1:3, 4) Hao nao Jehovah comfortim iumi?
Deal Witim Samting wea Kosim Olketa Problem
3. Hao nao comfort wea God givim hem deal witim samting wea kosim olketa problem bilong man?
3 Evri man kasem wei for no perfect from sin bilong Adam, and datwan kosim staka problem wea gogo, lead go long dae. (Romans 5:12) Wei wea Devil Satan hem “ruler bilong disfala world” mekem diswan moa worse. (John 12:31; 1 John 5:19) Jehovah no just sei hem feel sorre bikos long disfala nogud samting wea kasem olketa man. Hem sendem only born Son bilong hem olsem ransom for sevem iumi, and Hem talem hao iumi savve kamap free from olketa samting wea kamaot from sin bilong Adam sapos iumi showimaot faith long Son bilong Hem. (John 3:16; 1 John 4:10) God talem tu hao Jesus Christ, wea kasem evri paoa long heven and earth, bae distroem Satan and full wicked system bilong hem.—Matthew 28:18; 1 John 3:8; Revelation 6:2; 20:10.
4. (a) Wanem nao Jehovah provaedem for strongim trust bilong iumi long promis bilong hem for help? (b) Hao nao Jehovah helpem iumi for luksavve wanem taem datfala help bae kam?
4 For strongim trust bilong iumi long olketa promis bilong hem, insaed long Bible God recordim staka pruv hao evri samting wea hem talem bae kamap tru. (Joshua 23:14) Hem talem tu wanem hem duim for sevem olketa servant bilong hem from olketa samting wea hard tumas for man seleva duim. (Exodus 14:4-31; 2 Kings 18:13–19:37) And thru long Jesus Christ, Jehovah showimaot hao hem purpose bilong hem for healim “evrikaen sik,” and resurrectim olketa wea dae finis. (Matthew 9:35; 11:3-6) Wanem taem nao bae evri samting hia happen? For ansarem diswan, Bible storyim olketa samting wea bae happen long olketa last day bilong disfala old system, bifor niu heven and niu earth bilong God bae kamap. Olketa samting wea Jesus sei bae happen hem barava fitim taem bilong iumi distaem.—Matthew 24:3-14; 2 Timothy 3:1-5.
Comfort for Pipol wea Kasem Trabol
5. Taem hem comfortim Israel bifor, wanem nao Jehovah mekem olketa for tingim?
5 From wei wea Jehovah hem deal witim Israel bifor, iumi lanem hao hem comfortim olketa long taem bilong trabol. Hem remindim olketa abaotem wanem kaen God nao hem. Diswan strongim trust bilong olketa long olketa promis bilong hem. Jehovah muvim olketa profet bilong hem for showimaot klia hao olketa idol wea no savve helpem seleva or olketa wea worshipim olketa, olketa barava difren from datfala tru and living God. (Isaiah 41:10; 46:1; Jeremiah 10:2-15) Taem hem talem Isaiah, “Comfortim, comfortim pipol bilong mi,” Jehovah muvim profet bilong hem for iusim olketa tokpiksa and for storyim creation bilong Hem for strongim wei wea Jehovah hem nambawan and only tru God.—Isaiah 40:1-31.
6. Samfala taem, wanem nao Jehovah talem saed long taem wea hem bae sevem pipol bilong hem?
6 Samfala taem, Jehovah givim comfort long wei for talem wanfala taem, wea maet klosap or farawe, wea pipol bilong hem bae sev. Klosap long taem wea hem sevem olketa from Egypt, hem talem olketa Israelite wea kasem bigfala hevi: “Bae mi bringim wanfala trabol moa long Pharaoh and Egypt. Bihaen datwan, hem bae sendem iufala awe from hia.” (Exodus 11:1) Taem thrifala nation join tugeta for attakim Judah long taem bilong King Jehoshaphat, Jehovah talem olketa hao “tumoro” Hem bae duim samting for helpem olketa. (2 Chronicles 20:1-4, 14-17) Long narasaed, Isaiah recordim wei wea olketa bae sev from Babylon klosap 200 year bifor datwan hem happen, and klosap wan handred year bifor olketa sev, Jeremiah provaedem samfala moa information abaotem datwan. Olketa profesi hia barava encouragem olketa servant bilong God taem datfala taem for sev hem kam klosap!—Isaiah 44:26–45:3; Jeremiah 25:11-14.
7. Planti taem wanem nao insaed olketa promis bilong salvation, and hao nao diswan affectim faithful pipol long Israel?
7 Wanfala important point hem hao planti taem olketa promis wea comfortim pipol bilong God garem information insaed abaotem Messiah. (Isaiah 53:1-12) Long evri genereson, diswan givim hope long faithful pipol taem olketa kasem olketa difren kaen test. Long Luke 2:25, hem sei: “Lukim! wanfala man stap long Jerusalem wea nem bilong hem Simeon, and disfala man hem raeteous and holy, hem weitim man wea bae comfortim Israel [wea minim, kakam bilong Messiah], and holy spirit stap witim hem.” Simeon savve long datfala hope for wanfala Messiah wea Bible storyim, and wei wea hem weitim datwan for fulfill affectim laef bilong hem. Hem no minim evribit hao datfala hope bae fulfill, and hem dae bifor datfala hope for salvation fulfill, bat hem hapi taem hem luksavve long Datwan wea God bae iusim for “sevem pipol.”—Luke 2:30.
Comfort wea Kam Thru Long Christ
8. Hao nao help wea Jesus givim hem difren from samting wea planti pipol tingse olketa needim?
8 Taem Jesus Christ duim ministry bilong hem long earth, hem no evritaem provaedem kaen help wea pipol tingse olketa needim. Samfala wantem tumas wanfala Messiah wea bae mekem olketa kamap free from nogud rul bilong Rome. Bat Jesus no encouragem olketa for faet againstim gavman; hem talem olketa for “peim bak . . . olketa samting bilong Caesar long Caesar.” (Matthew 22:21) Purpose bilong God duim moa samting winim wei for mekem pipol kamap free from wanfala nogud gavman. Pipol want for mekem Jesus king, bat hem sei hem bae “givim soul bilong hem olsem ransom for baem bak planti pipol.” (Matthew 20:28; John 6:15) Hem no taem yet for hem kamap king, and datfala paoa for rul bae kam long hem from Jehovah nomoa, no from olketa crowd wea no satisfae.
9. (a) Wanem nao message bilong comfort wea Jesus talemaot? (b) Hao nao Jesus showaot datfala message savve helpem pipol witim olketa problem wea olketa feisim? (c) Ministry bilong Jesus kamap faondeson bilong wanem samting?
9 Comfort wea Jesus tekem kam hem part bilong “gud nius bilong kingdom bilong God.” Diswan nao message wea Jesus talemaot evriwea hem go. (Luke 4:43) Hem strongim wei wea datfala message savve helpem pipol witim olketa problem wea olketa kasem evriday taem hem showimaot wanem nao hem bae duim for olketa man olsem Messiah Ruler. Hem givim olketa wea safa reason for laek stap laef taem hem healim olketa wea blind and olketa wea no savve toktok (Matthew 12:22; Mark 10:51, 52), olketa wea disable (Mark 2:3-12), mekem olketa Israelite kamap klin from samfala nogud sik (Luke 5:12, 13), and healim olketa nara sik wea kosim bigfala hevi. (Mark 5:25-29) Hem barava comfortim olketa famili member wea feel sorre taem hem resurrectim pikinini bilong olketa. (Luke 7:11-15; 8:49-56) Hem showimaot hao hem garem paoa for kontrolem olketa big wind and for provaedem need bilong olketa big crowd for kaikai. (Mark 4:37-41; 8:2-9) Nara samting tu, Jesus teachim samfala principle saed long living wea savve helpem pipol for deal witim olketa problem and wea savve fulimap heart bilong olketa witim hope for datfala raeteous rul bilong Messiah. So, taem Jesus duim ministry bilong hem, hem no just comfortim olketa wea lisin witim faith, bat diswan kamap faondeson tu for givim encouragement long pipol for nara tu thousand year bihaen.
10. Olketa wanem gudfala samting nao kamaot from sakrifaes bilong Jesus?
10 Winim 60 year bihaen Jesus sakrifaesim laef bilong hem olsem man long earth and resurrect go long heven, God muvim aposol John for raet: “Olketa smolfala pikinini bilong mi, mi raetem evri samting hia long iufala mekem iufala no duim eni sin. Bat, sapos eniwan duim wanfala sin, iumi garem wanfala helper witim Father, Jesus Christ, datwan wea raeteous. And hem wanfala sakrifaes wea kavarem sin bilong iumi, no for iumi nomoa bat for full world tu.” (1 John 2:1, 2) Iumi kasem bigfala comfort from olketa gudfala samting wea iumi kasem from perfect sakrifaes bilong Jesus. Iumi savve iumi savve kasem forgiveness for olketa sin bilong iumi, klinfala conscience, wei for fren gud witim God, and hope for kasem laef olowe.—John 14:6; Romans 6:23; Hebrews 9:24-28; 1 Peter 3:21.
Holy Spirit Givim Comfort
11. Bifor hem dae, wanem nao nara samting wea Jesus promisim for provaedem comfort?
11 Long lastfala naet bifor hem dae olsem sakrifaes, Jesus story witim olketa aposol bilong hem abaotem narafala samting wea Father bilong hem long heven provaedem for comfortim olketa. Jesus sei: “Mi bae askem Father and hem bae givim narafala helper [man wea givim comfort; Greek, pa·raʹkle·tos] for stap witim iufala olowe, disfala spirit bilong truth.” Jesus promisim olketa: “Datfala helper, datfala holy spirit, . . . bae teachim iufala evri samting and mekem iufala rememberim evri samting wea mi talem long iufala.” (John 14:16, 17, 26) Hao nao datfala holy spirit comfortim olketa?
12. Hao nao wei wea holy spirit helpem olketa disaepol bilong Jesus for remember hem help for comfortim planti pipol?
12 Jesus teachim staka samting long olketa aposol bilong hem. Olketa hard for forgetim datwan, bat waswe, bae olketa rememberim barava toktok bilong hem? From olketa no garem perfect memory, waswe, bae olketa forgetim olketa important instruction? Jesus promisim olketa hao datfala holy spirit bae ‘mekem olketa rememberim evri samting wea hem talem olketa.’ Dastawe, samting olsem eit year bihaen Jesus hem dae, Matthew fit for raetem firstfala Gospel, wea hem recordim datfala Sermon long Maunten wea muvim heart, staka tokpiksa abaotem Kingdom, and evri information wea Jesus talem abaotem saen bilong taem wea hem bae stap moa. Winim 50 year bihaen, aposol John fit for raetem planti moa information wea iumi savve trustim abaotem last tu-thri day bilong laef bilong Jesus long earth. Olketa record hia wea God muvim olketa for raetem barava encouragem pipol kam kasem taem bilong iumi!
13. Hao nao holy spirit hem serve olsem wanfala teacher for olketa first Christian?
13 Datfala holy spirit no just helpem olketa disaepol for rememberim toktok bilong Jesus, bat hem teachim and leadim olketa tu for garem moa savve abaotem purpose bilong God. Taem Jesus stap yet witim olketa disaepol bilong hem, hem talem samfala samting long olketa wea olketa no minim gud long datfala taem. Nomata olsem, bihaen, holy spirit muvim John, Peter, James, Jude, and Paul for explainim olketa narafala part long purpose bilong God. So holy spirit hem serve olsem wanfala teacher wea mekem olketa disaepol feel sure God nao leadim olketa.
14. Long olketa wanem wei nao holy spirit helpem pipol bilong Jehovah?
14 Olketa mirakol present bilong holy spirit help for showimaot klia tu hao God rejectim really Israel and acceptim Christian kongregeson. (Hebrews 2:4) Olketa frut bilong spirit wea showaot long fasin bilong pipol hem wanfala important wei tu for luksavve long olketa tru disaepol bilong Jesus. (John 13:35; Galatians 5:22-24) And datfala spirit strongim olketa member bilong datfala kongregeson for kamap olketa witness wea strong and no fraet.—Acts 4:31.
Help Taem Barava Bigfala Hevi Kamap
15. (a) Wanem kaen hevi nao kasem olketa Christian bifor and distaem? (b) Why nao maet olketa wea givim encouragement need for kasem encouragement tu samfala taem?
15 Evriwan wea lovem Jehovah and loyal long hem kasem samkaen persecution. (2 Timothy 3:12) Bat, planti Christian kasem barava bigfala hevi. Long taem bilong iumi, samfala kasem hard taem from samfala sekson, and nara pipol putim olketa long olketa concentration camp, prison, and labor camp wea no fitim for eni man stap insaed. Olketa gavman givim persecution, or letem olketa raf sekson for brekem law and duim nogud samting and no kasem panis. And tu, samfala Christian deal witim olketa bigfala sik or serious problem long famili. Maet wanfala mature Christian kasem hevi from hem helpem staka nara Christian for deal witim olketa hardfala problem. Long taem olsem, datwan wea givim encouragement maet need for kasem encouragement tu.
16. Taem David kasem bigfala hevi, hao nao hem kasem help?
16 Taem King Saul luk aotem David for killim hem dae, David luk long God olsem Wan for Helpem hem and begim hem: “O God, herem prea bilong mi. Long shadow bilong wing bilong iu mi stap sef.” (Psalm 54:2, 4; 57:1) Waswe, David kasem help? Barava nao. Long datfala taem, Jehovah iusim profet Gad and priest Abiathar for givim direction long David, and Hem iusim son bilong Saul, Jonathan, for strongim young David. (1 Samuel 22:1, 5; 23:9-13, 16-18) Jehovah letem olketa Philistine tu for attakim datfala land, mekem Saul busy long datwan and no luk aotem David.—1 Samuel 23:27, 28.
17. Taem hem kasem bigfala hevi, wea nao Jesus luk aotem help?
17 Jesus Christ tu kasem barava bigfala hevi taem laef bilong hem long earth hem klosap for finis. Hem barava savve hao fasin bilong hem savve affectim nem bilong Father bilong hem long heven and hao datwan savve affectim future bilong evri man. Hem barava prea strong and “kasem bigfala hevi saed long feeling.” God mek sure Jesus kasem saport wea hem needim long datfala barava hard taem.—Luke 22:41-44.
18. Hao nao God comfortim olketa first Christian wea kasem bigfala persecution?
18 From datfala persecution wea olketa Christian kasem bihaen first-century kongregeson hem start hem raf fogud, olketa aposol nomoa stap long Jerusalem, evri narawan mas ranawe. Pipol raosem olketa Christian from haos bilong olketa. Hao nao God comfortim olketa? Word bilong hem promisim “wanfala samting wea hem moabeta and stap for olowe,” wanfala reward long heven witim Christ wea no savve fail. (Hebrews 10:34; Ephesians 1:18-20) Taem olketa go ahed for preach, olketa lukim pruv hao spirit bilong God stap witim olketa, and olketa experience bilong olketa mekem olketa hapi tu.—Matthew 5:11, 12; Acts 8:1-40.
19. Nomata Paul kasem barava bigfala persecution, hao nao hem feel abaotem comfort wea God givim?
19 Gogo, Saul (Paul), wea firstaem barava persecutim olketa Christian long raf wei, kasem persecution seleva from hem kamap wanfala Christian. Long island bilong Cyprus, wanfala kastom man iusim giaman wei and raverave fasin for trae stopem ministry bilong Paul. Olketa long Galatia sutim Paul long ston and leavim hem for dae. (Acts 13:8-10; 14:19) Olketa long Macedonia whipim hem witim olketa stik. (Acts 16:22, 23) Bihaen wanfala sekson long Ephesus killim hem, hem raet: “Mifala kasem barava bigfala hevi wea winim strong bilong mifala, mekem mifala no sure for laef bilong mifala tu. Tru nao, mifala tingse mifala kasem panis for dae.” (2 Corinthians 1:8, 9) Bat long datfala sem leta, Paul raetem toktok bilong comfort wea hem stap long paragraf 2 bilong disfala article.—2 Corinthians 1:3, 4.
20. Long nextfala article, iumi bae lukluk long wanem samting?
20 Hao nao iu savve share for givim comfort olsem? Planti pipol distaem needim comfort taem olketa feel sorre from wanfala bigfala trabol wea seknomoa kasem staka pipol or wanfala trabol wea mekem olketa seleva nomoa safa. Long nextfala article, iumi bae lukluk long hao for givim comfort long olketa long taem olsem.
Waswe, Iu Remember?
• Why nao comfort from God winim eni nara comfort?
• Wanem comfort nao iumi savve kasem thru long Christ?
• Hao nao holy spirit givim comfort?
• Talem samfala example hao God comfortim olketa servant bilong hem taem olketa kasem olketa bigfala hevi.
[Olketa Piksa long page 15]
Bible showim iumi hao Jehovah comfortim pipol bilong hem long wei for sevem olketa
[Olketa Piksa long page 16]
Jesus provaedem comfort thru long teaching and healing and taem hem resurrectim olketa wea dae finis
[Piksa long page 18]
Jesus kasem help from antap