Hao Nao Pipol Ting Distaem Long Wei for Give?
BIHAEN samting wea happen long September 11, 2001, long New York City and Washington, D.C., pipol givim barava bigfala saport long olketa wea insaed disfala trabol. Olketa organization wea kolektem selen for olketa wea garem need barava sapraes for kasem donation bilong $2.7 billion U.S. for helpem olketa famili wea kasem trabol hia. Pipol evriwea want for help from olketa seke and feel sorre long samting wea happen.
Bat, taem pipol faendaot samfala organization wea planti pipol savve long hem no iusim datfala selen long stretfala wei, kwiktaem nomoa feeling hem change. Pipol barava kros taem olketa herem report hao wanfala bigfala organization hem plan for iusim for difren purpose klosap haf long $546 million U.S. wea pipol donatem for helpem olketa wea kasem trabol long Trade Center. Nomata bihaen datfala organization changem disison hia and sei sorre, wanfala man for reportim nius hem sei hao “pipol tingim diswan olsem hem tu leit nao for kasem bak trust” wea datfala organization garem bifor olketa samting hia happen. Waswe long iu? Wei wea iu trustim olketa organization wea givim help hem kamap wik distaem?
Givim Help or Westem?
Planti tingim diskaen wei for give long olketa organization olsem hem gud samting. Bat, no evriwan ting olsem. Winim 200 year go finis, Samuel Johnson, man for raet from England, hem raet olsem: “Iu savve feel moa sure iu duim gud samting taem iu peim selen long man wea waka hard, winim wei for givim selen olsem wanfala present.” Samfala distaem feel olsem tu, and taem pipol herem olketa report abaotem wei wea olketa organization for givim help iusim donation long rong wei, diswan mekem pipol for no trustim olketa. Tingim tufala example wea happen no longtaem go nomoa.
Olketa aotem wanfala bigman bilong wanfala lotu organization long San Francisco from olketa sei hem iusim selen bilong datfala organization for peim cosmetic surgery bilong hemseleva and tu for winim tufala year hem iusim $500 U.S. evri week for kaikai long olketa restaurant. Long Britain, olketa wea arrangem wanfala organization long television for givim help barava feel shame taem pablik faendaot hao from 6.5 million pounds (samting olsem $10 million, U.S.) wea olketa sendem go long Romania for help buildim olketa niu ples for keepim olketa pikinini wea no garem mami and dadi, only 12-fala haos nomoa olketa buildim, and planti handred thousand dollar hem lus. Olketa nogud report olsem hem mekem planti pipol for careful tumas long haomas selen nao olketa givim and tu olketa markem hu nao olketa give long hem.
Bae Give or No Give
Bat, hem bae sorre samting sapos iumi letem nogud samting wea samfala man or organization duim for stopem trufala wei wea iumi kea and feel sorre long olketa narawan. Bible hem sei: “Kaen worship wea klin and no dirty front long God and Father bilong iumi hem olsem: for lukaftarem olketa pikinini wea no garem dadi and mami and olketa widow woman wea kasem hardfala taem.” (James 1:27) Tru nao, wei for duim samting for showimaot iumi kea for olketa wea poor and wea no garem inaf samting hem wanfala main fasin bilong Christian Wei.
Nomata olsem, iu maet ting, ‘Waswe, mi shud go ahed for give long olketa organization wea helpem pipol wea garem need, or waswe, mi shud just trae for help long wei for givim olketa present long man wanwan?’ Wanem kaen wei for give nao God expectim? Next article bae story raonem olketa kwestin hia.