Kwestin From Reader
Waswe, hem rong for endim laef bilong wanfala animal wea olo or sik tumas?
Long planti pipol, olketa animal hem samting wea interesting and mekem olketa hapi. Samfala animal olsem savve kamap fren bilong olketa. Olsem example, olketa dog savve lovem and obeyim masta bilong olketa. So iumi minim wei wea pipol lovem tumas animal olsem, especially wanfala animal wea olketa stap witim for planti year.
Bat, laef bilong planti animal hem no long tumas. Olketa dog savve stap for samting olsem 10 go kasem 15 year, puskat olsem tu, diswan depend long wanem kaen dog or puskat. Taem olketa animal hia olo, olketa savve kasem sik and no savve duim samting olsem bifor and diswan mekem olketa wea ownim olketa sorre tumas taem olketa ting go bak long taem wea olketa animal hia moa young and strong. Waswe, hem rong for endim laef bilong olketa mekem olketa no safa?
Wanfala Christian bae want for obeyim will bilong God taem hem deal witim olketa animal. Wei for treatim olketa long raf wei hem barava againstim will bilong God, from Bible sei: “Man wea raeteous hem lukaftarem soul bilong animal bilong hem.” (Proverbs 12:10) Bat, diswan no minim God hem tingim olketa animal long sem wei wea hem tingim olketa man. Taem God wakem olketa man, hem showim wei wea olketa man barava difren from olketa animal. Olsem example, hem givim hope bilong laef olowe long olketa man, bat hem no givim datfala hope long olketa animal. (Romans 6:23; 2 Peter 2:12) Olsem Creator, hem garem right for markem stretfala wei for fren midolwan olketa man and animal.
Genesis 1:28 talem iumi datfala wei for fren. God sei long first man and woman: “Olketa fish bilong sea and olketa bird bilong heven and evri living samting wea muv long graon mas stap anda long iufala.” Olsem tu, Psalm 8:6-8 hem sei: “Evri samting iu [God] putim andanit leg bilong hem [olketa man]: smolfala buluka and ox, evriwan long olketa, and olketa animal bilong open field tu, olketa bird bilong heven and fish bilong sea.”
God talem klia hao man savve killim dae olketa animal and iusim olketa long stretfala wei. Olsem example, olketa savve iusim skin bilong olketa olsem kaleko. God letem tu for olketa man kaikaim meat bilong olketa animal bihaen long Flood long taem bilong Noah, for kaikaim witim vegetable wea hem givim olketa firstaem.—Genesis 3:21; 4:4; 9:3.
Diswan no givim olketa man paoa for killim dae olketa animal for sports nomoa. Long Genesis 10:9, Bible storyim Nimrod olsem “wanfala maeti man for hunting.” Bat datfala sem verse sei hao diswan mekem hem “againstim Jehovah.”
Dastawe, nomata man savve bossim olketa animal, hem mas no iusim datfala paoa long rong wei bat iusim long wei wea fitim olketa principle bilong Word bilong God. Diswan minim tu wei for no letem wanfala animal safa bikos hem olo tumas, garekil, or sik. Taem samting olsem kamap, hem responsibility bilong each Christian for disaedem wanem for duim. Sapos hem disaed for showimaot mercy for no letem animal safa taem no eni hope stap for hem kamap gud moa, then hem savve chus for endim laef bilong hem.