Luk Aotem Gud Samting Long Evriwan
“Rememberim mi, O God bilong mi, for gudfala samting.”—NEHEMIAH 13:31.
1. Hao nao Jehovah hem showimaot gudfala fasin long evriwan?
BIHAEN staka day wea cloud satem sun, hem naes tumas taem sun hem shaen moa. Diswan mekem pipol feel gud and hapi. Olsem tu, taem hem rain bihaen planti day wea sun hem shaen big and weather hem drae fogud—nomata hem rain for shortfala taem—hem mekem pipol feel fresh and hapi. Loving Creator bilong iumi, Jehovah, wakem earth witim disfala nambawan present bilong weather. Jesus mekhae long wei wea God hem kaen tumas taem hem sei: “Go ahed for lovem olketa enemy bilong iufala and for prea for olketa wea persecutim iufala; mekem iufala savve showimaot iufala olketa son bilong Dadi bilong iufala wea stap long heven, from hem mekem sun bilong hem shaen long wicked pipol and long gudfala pipol, and hem mekem rain foldaon long pipol wea raeteous and wea no raeteous.” (Matthew 5:43-45) Tru nao, Jehovah showimaot gudfala fasin long evriwan. Olketa servant bilong hem shud trae hard for followim example bilong hem long wei for luk aotem gud samting long nara pipol.
2. (a) Wanem samting nao mekem Jehovah showimaot gudfala fasin? (b) Jehovah luksavve long wanem samting saed long wei wea iumi tinghae long gudfala fasin bilong hem?
2 Wanem samting nao mekem Jehovah showimaot gudfala fasin? Start kam from taem wea Adam hem sin, Jehovah hem evritaem luk aotem gud samting long olketa man. (Psalm 130:3, 4) Purpose bilong hem for olketa man wea obey hem for stap long Paradaes moa. (Ephesians 1:9, 10) Kaenfala fasin bilong God wea man no fit for kasem givim iumi chance for sev from sin and wei for no perfect thru long datfala Seed wea hem promisim. (Genesis 3:15; Romans 5:12, 15) For acceptim arrangement bilong ransom hem mekem chance for iumi gogo for kamap perfect moa. Distaem, Jehovah hem lukluk long iumi each wan for luksavve hao nao iumi ting long kaenfala samting wea hem duim. (1 John 3:16) Hem luksavve long eni samting wea iumi duim wea showimaot iumi tinghae long gudfala fasin bilong hem. Aposol Paul hem raet: “God hem no wicked mekem hem forgetim waka bilong iufala and love wea iufala showimaot for nem bilong hem.”—Hebrews 6:10.
3. Wanem kwestin nao hem gud for iumi tingim?
3 So, hao nao iumi savve followim example bilong Jehovah for luk aotem gud samting long nara pipol? Iumi lukluk long olketa ansa for disfala kwestin long fofala difren part long laef: (1) Christian ministry, (2) famili, (3) kongregeson, and (4) wei wea iumi fren witim nara pipol.
Long Waka for Preach and Mek Disaepol
4. Hao nao wei for share insaed long Christian ministry hem wanfala wei for luk aotem gud samting long nara pipol?
4 Taem olketa disaepol bilong Jesus askem hem for minim kam parabol abaotem wheat and rabis grass, hem sei: “Field nao hem world.” Iumi olketa disaepol bilong Christ distaem luksavve hao diswan hem tru taem iumi duim ministry bilong iumi. (Matthew 13:36-38; 28:19, 20) Long field ministry iumi talemaot faith bilong iumi long pablik. Wei wea pipol savve long Olketa Jehovah’s Witness olsem pipol wea duim ministry from haos tu haos and long street pruvim iumi busy for luk aotem evriwan wea willing for acceptim datfala Kingdom message. Tru nao, instruction bilong Jesus hem olsem: “Nomata wanem taon or vilij iufala go insaed, luk aotem eniwan wea fit.”—Matthew 10:11; Acts 17:17; 20:20.
5, 6. Why nao iumi no givap for visitim pipol long haos bilong olketa?
5 Taem iumi go long haos bilong pipol wea no expectim bae iumi kam, iumi lukim feeling bilong olketa abaotem message bilong iumi. Samfala taem wanfala famili member maet lisin long iumi, bat narawan singaot from insaed haos, “Mifala no interest,” and iumi lusim datfala haos. Iumi sorre for lukim hao wei wea wanfala man no interest or againstim iumi savve spoelem interest bilong narawan! So wanem nao iumi savve duim mekem iumi no givap for luk aotem gud samting long evriwan?
6 Maet next taem iumi kasem datfala haos, iumi garem chance for story witim man wea stopem story lastaem. Sapos iumi rememberim samting wea happen lastaem, datwan savve helpem iumi for redy. Datfala man wea againstim iumi maet tingse hem duim gud samting for stopem narawan wea interest for lisin long Kingdom message. Maet eni laea information abaotem purpose bilong waka bilong iumi affectim tingting bilong hem. Bat datwan no stopem iumi for go ahed for preachim Kingdom gud nius long datfala haos, and long kaenfala wei trae for stretem rong tingting bilong olketa abaotem iumi. Iumi interest for helpem evriwan kasem stretfala savve abaotem God. Then, maet Jehovah pullim kam datfala man long hem.—John 6:44; 1 Timothy 2:4.
7. Wanem nao savve helpem iumi for tingim gud saed taem iumi story witim pipol?
7 Insaed instruction wea Jesus givim long olketa disaepol bilong hem, Jesus talem tu hao famili maet againstim man. Hem sei: “Mi kam for divaedem pipol, for mekem man againstim dadi bilong hem, and dota againstim mami bilong hem, and wanfala young waef againstim mami-in-law bilong hem.” Jesus sei moa: “Olketa enemy bilong man nao bae olketa long famili bilong hem.” (Matthew 10:35, 36) Nomata olsem, living and tingting bilong pipol savve change. Bigfala sik wea seknomoa kamap, relative hem dae, olketa disaster, problem saed long feeling, and staka nara samting savve affectim feeling bilong pipol abaotem preaching bilong iumi. Sapos iumi garem nogud tingting—hao pipol wea iumi preach long olketa bae nating interest—waswe, iumi really luk aotem gud samting long olketa? Hem moabeta for hapi for visitim olketa moa bihaen. Maet iumi lukim olketa change. Samfala taem, hem no just wanem iumi talem wea mekem pipol interest, bat wei wea iumi talem. Strongfala prea long Jehovah bifor iumi go preaching bae helpem iumi for tingim gud saed evritaem and for talemaot Kingdom message long wei wea here gud long evriwan.—Colossians 4:6; 1 Thessalonians 5:17.
8. Olketa wanem gud samting savve kamap taem olketa Christian luk aotem gud samting long relative wea no biliv?
8 Long samfala kongregeson planti member bilong sem famili servem Jehovah. Samfala taem, samting wea changem heart bilong olketa young wan hem from olketa tinghae and respectim wanfala full-grown relative from olketa lukim wei wea hem no givap and fren gud witim evriwan insaed famili and marit partner bilong hem. Wei wea planti Christian waef obeyim kaonsel bilong aposol Peter hem help for pullim kam hasband bilong olketa long truth “no [thru] long toktok.”—1 Peter 3:1, 2.
Long Famili
9, 10. Hao nao Jacob and Joseph luk aotem gud samting long famili bilong olketa?
9 Wei wea olketa insaed famili fren klos tugeta givim iumi nara chance for luk aotem gud samting long olketa narawan. Tingim samting wea iumi savve lanem from wei wea Jacob hem deal witim olketa son bilong hem. Long Genesis chapter 37, verse 3 and 4, Bible talem hao Jacob barava lovem Joseph. Olketa brata bilong Joseph jealous long diswan, and plan for killim dae brata bilong olketa. Bat, lukim tingting bilong Jacob and Joseph bihaen. Tufala evriwan luk aotem gud samting long famili bilong olketa.
10 Taem Joseph hem serve olsem chief ovarem kaikai long Egypt long taem bilong bigfala hangre, hem welkamim olketa brata bilong hem. Nomata hem no talem olketa stretawe hao hem nao Joseph, hem mek sure olketa kasem need bilong olketa and hem givim olketa kaikai for tekem go bak long olo dadi bilong olketa. Tru nao, nomata Joseph hem safa from wei wea olketa heitim hem, hem duim samting for helpem olketa. (Genesis 41:53–42:8; 45:23) And Jacob tu, taem hem redy for dae, hem talemaot olketa profesi blessing long evri son bilong hem. Nomata rong samting wea olketa duim minim olketa missim samfala privilege, evriwan long olketa kasem samfala land from dadi bilong olketa. (Genesis 49:3-28) Jacob showimaot nambawan example bilong love wea nating savve finis!
11, 12. (a) Wanem profesi example nao strongim hao hem important for iumi luk aotem gud samting insaed famili? (b) Wanem nao iumi savve lanem from example bilong datfala dadi long tokpiksa bilong Jesus abaotem olabaot son?
11 Wei wea Jehovah showimaot long-safaring long nation bilong Israel wea no garem faith, teachim iumi moa samting abaotem wei wea hem luk aotem gud samting long pipol bilong hem. Jehovah iusim samting wea kasem famili bilong profet Hosea olsem example for showimaot hao love bilong hem nating savve finis. Waef bilong Hosea, Gomer, hem planti taem duim adultery. Nomata olsem, Jehovah givim instruction olsem long Hosea: “Go bak moa, lovem wanfala woman wea samwan lovem hem and wea duim adultery, long sem wei wea Jehovah lovem olketa son bilong Israel nomata olketa tan go long olketa nara god and lovem olketa raisin cake.” (Hosea 3:1) Why nao hem talem hem for duim datwan? Jehovah hem savve finis hao samfala from datfala nation wea go difren from olketa wei bilong hem bae willing for change from patient fasin bilong hem. Hosea hem sei: “Bihaen, olketa son bilong Israel bae kam bak and barava luk aotem God bilong olketa Jehovah, and for David king bilong olketa; and olketa bae barava seksek taem olketa kam long Jehovah and gudfala fasin bilong hem long olketa lastfala part bilong olketa day.” (Hosea 3:5) Diswan hem nambawan example for iumi ting raonem taem iumi feisim olketa problem long famili. Wei wea iu go ahed for luk aotem gud samting long olketa nara member bilong famili hem showimaot gudfala example bilong patient fasin.
12 Parabol bilong Jesus abaotem datfala olabaot son hem teachim iumi moa samting abaotem hao iumi savve luk aotem gud samting long olketa famili bilong iumiseleva. Bihaen hem lusim olabaot living bilong hem, datfala young son hem kam bak long hom. Dadi bilong hem showimaot mercy. Hao nao datfala dadi deal witim wei wea firstborn son wea nating lusim famili hem komplen? Hem sei long datfala firstborn son: “Pikinini, iu stap witim mi olowe, and evri samting bilong mi hem bilong iu.” Hem no talem diswan for showimaot hem kros, bat for strongim long hem hao hem lovem hem. Hem sei: “Mifala barava want for hapi bikos brata bilong iu wea dae finis hem laef bak moa, and hem lus bat iumi faendem hem.” Long sem wei, iumi tu savve go ahed for luk aotem gud samting long nara pipol.—Luke 15:11-32.
Long Christian Kongregeson
13, 14. Wanem nao wanfala wei for showimaot nambawan law bilong love insaed long Christian kongregeson?
13 Iumi olketa Christian trae hard for showimaot nambawan law bilong love. (James 2:1-9) Hem tru, maet iumi acceptim olketa member bilong kongregeson bilong iumi wea garem living wea long material wei hem difren from iumi. Bat, waswe, iumi garem disfala wei for “favorim pipol” saed long kala skin, kastom, or maet religion wea olketa garem bifor? Sapos olsem, wanem nao iumi mas duim for obeyim kaonsel bilong James?
14 Wei for welkamim evriwan wea attendim olketa Christian meeting showimaot iumi garem kaenfala fasin. Taem iumi story witim olketa niu wan wea kam long Kingdom Hall, iumi savve helpem olketa winim feeling for feel fraet or shame. Tru nao, samfala wea attendim first meeting bilong olketa sei: “Evriwan barava kaen tumas. Hem olsem evriwan savve finis long mi. Mi no feel olsem wanfala stranger.”
15. Hao nao iumi savve helpem olketa young wan for showimaot interest long full-grown pipol?
15 Long samfala kongregeson, tu-thri young wan maet hipap insaed or aotsaed long Kingdom Hall bihaen long meeting and no laek kaban witim olketa wea full-grown. Wanem nao gudfala wei for deal witim diswan? Hem tru, first samting hem for parents trainim olketa pikinini long haos, redyim olketa for olketa meeting. (Proverbs 22:6) Maet olketa kasem responsibility for redyim olketa pablikeson mekem evriwan garem samting olketa needim for tekem long meeting. Parents tu best wan for encouragem pikinini bilong olketa for story witim olketa olo or sik wan long Kingdom Hall. For garem gud samting for storyim witim olketa savve mekem pikinini feel satisfae.
16, 17. Hao nao olketa wea full-grown savve luk aotem gud samting long olketa young wan long kongregeson?
16 Olketa full-grown brata and sista shud showimaot interest long olketa young wan long kongregeson. (Philippians 2:4) Olketa savve story witim olketa young wan long wei for encouragem olketa. Planti taem samfala nambawan point kamap insaed long meeting. Maet olketa savve askem olketa young wan sapos olketa enjoyim meeting and wanem point nao olketa barava tinghae long hem and savve iusim. From olketa young wan important member bilong kongregeson, olketa shud kasem praise for wei wea olketa lisin gud and for eni koment wea olketa givim long meeting or part wea olketa share insaed. Wei wea olketa young wan savve story witim olketa long kongregeson wea full-grown and wei wea olketa duim olketa waka long haos bae showimaot olketa fit for lukaftarem samfala responsibility wea moa big taem olketa kamap moa mature.—Luke 16:10.
17 From wei wea olketa acceptim responsibility, samfala young wan muv ahed gud, gogo, spiritual fasin bilong olketa mekem olketa fit for kasem samfala assignment wea moa important. For busy olsem savve protectim olketa tu from krangge fasin. (2 Timothy 2:22) For olketa brata wea reach aot for kamap olketa ministerial servant, olketa assignment olsem savve ‘testim olketa firstaem for showimaot sapos olketa fit.’ (1 Timothy 3:10) Wei wea olketa willing for tekpart long olketa meeting and strong long ministry, and tu, wei wea olketa interest long evriwan insaed long kongregeson, mekem olketa elder fit for luksavve sapos olketa fit for duim samfala nara assignment.
Luk Aotem Gud Samting Long Evriwan
18. Olketa elder mas stap klia long wanem trap saed long wei for judge, and why nao olsem?
18 Proverbs 24:23 hem sei: “Wei for teksaed long judgment hem nogud.” Wisdom from heven minim olketa elder mas no teksaed taem olketa judgem samting insaed kongregeson. James hem sei: “Wisdom from antap hem firstaem klin, then keepim peace, hem balance, redy for obey, fulap witim mercy and gudfala frut, no teksaed witim eniwan, no hypocrite.” (James 3:17) Hem klia hao taem olketa elder luk aotem gud samting long narawan, olketa mas mek sure feeling or wei for fren no affectim judgment bilong olketa. Asaph wea raetem psalm hem sei: “God hem stap midolwan long olketa bilong God wea hipap. Hem judge midolwan long olketa god [“olketa wea olsem god,” footnote, wea minim olketa man wea judge]: ‘Hao long nao bae iufala go ahed for judge and no followim justice fasin and teksaed witim olketa wea wicked?’” (Psalm 82:1, 2) Olsem tu, olketa Christian elder barava stap klia from wei for favorim man taem samting hem kamap wea maet fren or relative bilong olketa insaed long diswan. Long wei olsem olketa keepim wan mind bilong kongregeson and no stopem spirit bilong Jehovah.—1 Thessalonians 5:23.
19. Long olketa wanem wei nao iumi savve luk aotem gud samting long olketa narawan?
19 Taem iumi luk aotem gud samting long olketa brata and sista bilong iumi, iumi garem sem wei for tingting olsem Paul taem hem tok long kongregeson long Thessalonica. Hem sei: “And tu, mifala barava sure long Lord abaotem iufala, hao iufala duim and bae go ahed for duim olketa samting wea mifala talem.” (2 Thessalonians 3:4) Bae hem helpem iumi for no tingim olketa wik point bilong narawan sapos iumi luk aotem gud samting long olketa. Bae iumi luk aotem eni wei for praisem olketa brata, and stap klia long wei for judgem olketa. Paul hem raet: “Samting wea olketa wantem long olketa wakman hem for man mas faithful.” (1 Corinthians 4:2) Iumi lovem evri Christian brata and sista bilong iumi and olketa wea lukaftarem kongregeson for faithful fasin bilong olketa. Diswan mekem iumi moa klos long olketa, and hem strongim Christian wei for fren. Iumi garem sem tingting wea Paul garem for olketa brata long taem bilong hem. Olketa nao ‘waka witim iumi for kingdom bilong God’ and “olketa nao help for strongim” iumi. (Colossians 4:11) Long wei olsem iumi showimaot tingting bilong Jehovah.
20. Wanem nao olketa blessing wea olketa wea luk aotem gud samting long evri narawan bae kasem?
20 For sure, prea bilong iumi hem olsem prea bilong Nehemiah: “Rememberim mi, O God bilong mi, for gudfala samting.” (Nehemiah 13:31) Iumi barava hapi Jehovah hem luk aotem gud samting long pipol! (1 Kings 14:13) Iumi tu mas duim sem samting long olketa narawan. For duim olsem minim iumi garem chance for kamap free from sin and kasem laef olowe long niu world wea barava klosap distaem.—Psalm 130:3-8.
Hao Nao Bae Iu Ansa?
• For wanem reason nao Jehovah showimaot gudfala fasin long evriwan?
• Hao nao iumi savve luk aotem gud samting long olketa narawan
• long ministry bilong iumi?
• long famili bilong iumi?
• long kongregeson bilong iumi?
• long evriwan?
[Piksa long page 18]
Nomata olketa brata bilong hem heitim hem bifor, Joseph luk aotem gud samting long olketa
[Piksa long page 19]
Wei wea pipol againstim iumi no stopem iumi for trae helpem evriwan
[Piksa long page 20]
Nomata wanem samting olketa duim bifor, evri son bilong Jacob kasem blessing from hem
[Piksa long page 21]
Welkamim evriwan long olketa Christian meeting