Waswe, Hem Kastom Nomoa or Hem Fasin for Bribe?

LONG samfala college long Poland, olketa student savve kolektem selen for baem present for olketa teacher, from olketa ting olketa bae kasem hae mark long exam bilong olketa. Dastawe, iumi no sapraes hao wanfala young Christian girl long Poland wea nem bilong hem Katarzyna feisim problem. “Waswe, mi bae givim selen or nomoa?” hem tingting. Olketa skul fren bilong hem sei olsem long hem: “Hem kastom bilong iumi. Iu bae no missim eni big samting, bat iu bae kasem big samting, so why nao iu daot?”

Katarzyna sei: “Mi mas talemaot hao insaed first year wea mi attendim skul long there, mi share long datfala wei for kolektem selen. Bihaen nao mi luksavve hao mi saportim fasin for bribe, wea Bible tok againstim.” Hem rememberim olketa scripture wea showim hao Jehovah tok strong againstim fasin for bribe. (Deuteronomy 10:17; 16:19; 2 Chronicles 19:7) Katarzyna sei: “Mi minim hao hem isi tumas for foldaon long hevi from olketa skul fren. Mi ting raonem diswan and start dat taem mi no share moa long disfala kastom.” Insaed last thrifala year, nomata olketa nara student mekfani long hem, hem explainim long samfala hao hem no share long “olketa present” kolekson olsem bikos long biliv bilong hem wea kam from Bible.

Samfala accusim Katarzyna for sei hem selfish and no tingim nara pipol. Hem sei: “Mi still no fren gud witim samfala long olketa. Long narasaed, planti respectim tingting bilong mi, wea diswan mekem mi hapi.” Olketa savve hao Katarzyna hem wanfala Jehovah’s Witness, wea obeyim olketa Bible principle long evriday living.