Wanem Olketa Bird Teachim Iumi
“LUKLUK gud long olketa bird long skae, from olketa no savve plantim seed or harvest or keepim long stoahaos; bat Father bilong iufala long heven hem feedim olketa. Waswe, iufala nao moa important winim olketa?” (Matthew 6:26) Jesus Christ talem toktok hia long sermon wea hem givim long saed long maunten klosap long Sea Bilong Galilee. Hem no olketa follower bilong hem nomoa wea stap long audience. Big crowd stap wea fit for kamap disaepol bilong hem, wea kam from evri part long kantri. Planti long olketa hia olketa poor pipol wea tekem kam olketa wea sik long Jesus for hem healim.—Matthew 4:23–5:2; Luke 6:17-20.
Bihaen hem healim evriwan wea sik, Jesus lukluk nao long important spiritual need bilong olketa. Wanfala long olketa samting wea hem teachim hem datfala leson antap.
Olketa bird long skae stap longtaem finis. Samfala kaikaim olketa insect, samfala kaikaim frut and olketa seed. Sapos God fit for provaedem planti kaikai olsem for olketa bird, for sure hem bae fit for helpem olketa servant bilong hem for kasem kaikai evriday. Hem maet duim diswan long wei for helpem olketa faendem waka for kasem selen for baem kaikai. Or hem maet mekem garden bilong olketa garem staka kaikai. And long taem wea man needim help kwiktaem, God fit for muvim heart bilong kaenfala neiba and fren for sharem kaikai olketa garem witim olketa wea garem need.
Iumi savve lanem planti moa samting taem iumi lukluk long laef bilong olketa bird. God creatim olketa bird witim nambawan wei for wakem nest wea olketa savve bringimap pikinini bilong olketa insaed. Lukluk long tufala difren kaen nest hia. Long piksa long left saed hem nest bilong wanfala African rock martin. Hem savve buildim long saed bilong wanfala rok or wall bilong wanfala haos. Ruf bilong olketa nest hia hem nao ston wea hange kamaot, or olsem iu lukim long piksa, hem end long ruf bilong wanfala building. Olketa wakem botom long nest hia from olketa sismol raon mud wea olketa putim tugeta gogo hem olsem wanfala kap. Tufala evriwan, man wan and mere wan savve waka hard for kolektem olketa raon mud hia and hem savve winim wan month bifor olketa finisim nest bilong olketa. Then olketa kavarem insaed witim olketa grass and feather. Tufala evriwan share for feedim olketa baby bilong tufala. Long daon hem nest bilong man masked weaver. Disfala bird from Africa iusim leaf bilong grass and olketa sismol stik for buildim nest bilong hem. Hem savve finis for wakem wanfala nest insaed wan day and maet mekem winim 30-fala nest long wanfala season!
Wanem nao leson? Sapos God givim savve for olketa bird and provaedem planti samting for olketa wakem nest, for sure hem fit for helpem olketa servant bilong hem for kasem haos wea olketa needim. Nomata olsem, Jesus showimaot iumi bae need for duim samting moa sapos iumi wantem Jehovah helpem iumi kasem olketa material need. Jesus promisim iumi: “So, go ahed for luk aotem firstaem kingdom and raeteous fasin bilong hem, and iufala bae kasem olketa narafala samting hia.” (Matthew 6:33) Iu maet ask, ‘Wanem nao insaed wei for luk aotem kingdom bilong God firstaem?’ Olketa Jehovah’s Witness, wea givimaot magasin hia, bae hapi for ansarem datfala kwestin.