Kwestin From Reader
Waswe, Devil Satan savve wanem nao man tingim?
Nomata iumi no barava sure, luk olsem Satan and olketa demon bilong hem no savve long wanem nao iumi tingim.
Tingim olketa nem wea Bible givim wea barava fitim Satan. Hem garem nem Satan (Man for Againstim Man), Devil (Man for Tok Spoelem Man), Snek (Nara nem for Man for Giamanim man), Man for Testim Man, and Man for Laea. (Job 1:6; Matthew 4:3; John 8:44; 2 Corinthians 11:3; Revelation 12:9) No eniwan long olketa nem hia showimaot hao Satan hem fit for savve long wanem nao man tingim.
Bat long narasaed, Bible storyim Jehovah God olsem “datwan wea lukluk gud insaed olketa heart.” (Proverbs 17:3; 1 Samuel 16:7; 1 Chronicles 29:17) Hebrews 4:13 hem sei: “No eni creation savve haed from eye bilong [Jehovah], bat evri samting hem naked and showaot klia long eye bilong datwan wea iumi mas givim ansa long hem.” Iumi no sapraes hao Jehovah letem Son bilong hem, Jesus, for lukluk insaed heart bilong iumi. Jesus wea resurrect hem sei: “Mi nao man wea lukluk insaed long olketa kidney and heart, and mi bae give long iufala wanwan fitim waka bilong iufala.”—Revelation 2:23.
Bible no sei dat Satan hem fit for lukluk insaed heart and mind bilong pipol. Diswan hem important point bikos aposol Paul talem iumi hao olketa Christian “savve long olketa trik bilong [Satan].” (2 Corinthians 2:11) So iumi no need for fraetem Satan olsem hem savve duim samting wea iumi no savve long hem.
Nomata olsem, diswan no minim dat Enemy bilong iumi kanduit luksavve long olketa wik point bilong iumi. Satan studyim wei bilong olketa man for longfala taem finis. Hem no need for savve long wanem nao iumi tingim for luksavve long wei bilong iumi, for luksavve wanem kaen hapitaem iumi aftarem, or for lisin long olketa samting wea iumi tok abaotem, and samfala samting olsem. Lukluk bilong feis and wei wea iumi act showim long hem wanem nao feeling and tingting bilong iumi.
Bat main samting wea Satan iusim hem semsem witim wanem hem iusim long garden bilong Eden—wei for laea, giamanim man, and rong information. (Genesis 3:1-5) Nomata olketa Christian no need for fraet nogud Satan savve long tingting bilong olketa, olketa need for lukluk gud long wanem kaen tingting nao Satan maet trae for putim insaed mind bilong olketa. Hem laekem olketa Christian for kamap “nogud long mind and lusim truth.” (1 Timothy 6:5) Iumi no sapraes hao world bilong Satan hem fulap witim enikaen nogud information and hapitaem. For stand strong againstim disfala attak, olketa Christian mas protectim mind bilong olketa long wei for werem datfala “helmet bilong salvation.” (Ephesians 6:17) Olketa duim diswan long wei for fulimap mind bilong olketa witim Bible truth and stap klia from olketa nogud samting long world bilong Satan.
Satan hem wanfala strongfala enemy. Bat iumi no need for fraetem hem or olketa demon bilong hem. James 4:7 hem talem iumi: “Againstim Devil, and hem bae ranawe from iufala.” Sapos iumi followim disfala kaonsel, iumi bae fit for sei, olsem Jesus, hao Satan no garem paoa ovarem iumi.—John 14:30.