Leson 4

Hu Nao Devil?

Satan disfala Devil​—⁠wea nao hem kam from? (1, 2)

Hao nao Satan giamanim pipol? (3-7)

Why nao iu mas againstim Devil? (7)

1. Disfala word “devil” hem meanim samwan wea talem no gud liar abaotem narafala man. “Satan” hem meanim wanfala enemy or man for againstim man. Tufala word hia nao olketa iusim for main enemy bilong God. Firstaem, hem wanfala perfect angel long heven wea stap withim God. But bihaen, hem tinghae tumas long hemseleva and hem laekem worship wea God nomoa fit for kasem.​—⁠Matthew 4:​8-10.

2. Disfala angel, Satan, tok long Eve thru long wanfala snek. From hem tok liar long Eve, hem mekem Eve for no obeyim God. So Satan hem challenge-im “rul” bilong God, or position bilong hem olsem Most Hae. Satan kwestinim sapos God hem rul long gudfala way, and long best way for helpem olketa wea Hem rulim. Satan kwestinim tu sapos eni man bae stap loyal long God. From hem duim diswan, Satan mekem hemseleva kamap enemy bilong God. Dastawe olketa kolem hem, Satan disfala Devil.​—⁠Genesis 3:​1-5; Job 1:​8-11; Revelation 12:⁠9.

3. Satan trae for trikim pipol for mekem olketa worshipim hem. (2 Corinthians 11:​3, 14) Wanfala way wea hem giamanim pipol hem thru long giaman religion. Sapos wanfala religion teachim liar samting abaotem God, hem barava duim samting wea Satan laekem. (John 8:44) Pipol wea insaed long giaman religion maet barava ting say olketa worshipim trufala God. But olketa really servim Satan. Hem nao ‘god bilong disfala world.’​—⁠2 Corinthians 4:⁠4.

4. Spiritism hem narafala way wea Satan mekem pipol for stap under long paoa bilong hem. Pipol maet askim olketa spirit for protectim olketa, for spoelem narafala pipol, for talem wanem bae happen long future, or for duim olketa mirakol. Satan nao badfala paoa wea bihaenem evri fasin hia. For mekem God hapi, iumi mas stap klia evribit from spiritism.​—⁠Deuteronomy 18:​10-12; Acts 19:​18, 19.

5. Satan giamanim pipol tu thru long way for barava mekhae long kantri and way for mekhae tumas long olketa sekson bilong politik. Samfala ting say kantri or tribe bilong olketa hem winim narawan. But diswan hem no tru. (Acts 10:​34, 35) Otherfala pipol depend long olketa sekson bilong politik for stretem problem bilong man. Taem olketa duim diswan, olketa rejectim Kingdom bilong God. Hem nomoa bae stretem olketa problem bilong iumi.​—⁠Daniel 2:⁠44.

6. Narafala way wea Satan giamanim pipol hem long way for sweetim olketa withim way bilong sin wea man laekem. Jehovah talem iumi for no followim way bilong sin bikos hem savvy olketa bae spoelem iumi. (Galatians 6:​7, 8) Maet samfala pipol laekem iu for joinim olketa for duim olketa fasin olsem. But, remember, Satan nomoa laekem iu for duim olketa samting hia.​—⁠1 Corinthians 6:​9, 10; 15:⁠33.

7. Satan maet iusim pipol for persecutim or againstim iu for mekem iu lusim Jehovah. Samfala insaed long famili bilong iu maet kros tumas from iu studyim Bible. Samfala maet mek funny long iu. But hu nao givim iu laef? Satan laek for mekem iu fraet mekem iu finis for study abaotem Jehovah. No letem Satan win! (Matthew 10:​34-39; 1 Peter 5:​8, 9) Taem iu againstim Devil, iu savvy mekem Jehovah hapi and show aot iu supportim rul bilong Hem.​—⁠Proverbs 27:11.

[Piksa long page 9]

Giaman religion, spiritism, and way for mekhae long kantri they giamanim pipol

[Piksa long page 9]

Againstim Satan taem iu go ahed for learn abaot Jehovah