Love Hem Barava Important
NOMATA man difren saed long age, kastom, languis, or kantri, evriwan garem bigfala need for love. Sapos olketa no kasem datfala need, olketa no hapi. Wanfala man wea duim medical research raet olsem: “Love and wei for fren klos hem wanfala main samting wea savve affectim iumi saed long sik and for stap healthy, saed long sorre and for mekem hapi kamap, for mekem iumi safa and mekem man kamap gud moa. Sapos wanfala niu medicine savve affectim man long sem wei olsem, bae klosap evri doctor long kantri givim datwan long olketa sikman. Wei for no givim bae hem wanfala barava nogud samting.”
Nomata olsem, long living distaem, especially long radio, television, niuspepa, buk and pipol wea samfala man tinghae long olketa, olketa apim riches, paoa, bignem, and sex winim datfala need bilong olketa man for garem loving wei for fren tugeta. Planti teacher mekhae long wei for garem olketa goal saed living and waka, and olketa sei man win sapos hem kasem olketa samting hia. Tru, education and wei for mekem grow savve wea man garem hem important, bat waswe, man shud aftarem diswan gogo hem no tingim nao famili and olketa fren bilong hem? Wanfala man for raet bifor wea kasem gud education and wea hem savve tumas long wei bilong olketa man hem sei man wea garem savve bat wea no garem love hem olsem “wanfala bell wea mekem bigfala noise.” (1 Corinthians 13:1) Kaen pipol olsem maet kamap barava rich, maet garem bignem tu, bat bae olketa no really garem hapi.
Jesus Christ, wea barava minim gud and garem spesol love for olketa man, hem sei love for God and neiba nao hem main important samting insaed teaching bilong hem. Hem sei: “Iu mas lovem Jehovah God bilong iu witim full heart bilong iu and witim full soul bilong iu and witim full mind bilong iu. . . . Iu mas lovem neiba bilong iu olsem iuseleva.” (Matthew 22:37-39) Olketa trufala follower bilong Jesus nomoa olketa wea followim toktok hia. Dastawe, hem sei: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.”—John 13:35.
Bat hao nao man savve mekem grow love nomata hem insaed world distaem? And hao nao olketa parents savve teachim love long olketa pikinini bilong olketa? Next article bae story raonem olketa kwestin hia.
[Olketa Piksa long page 3]
For iumi mekem love grow insaed world wea fulap witim greedy fasin hem wanfala challenge