Hao for Mekem Grow Trufala Love
“Love nao hem ansa for evri samting insaed laef; love hem nao laef.”—Living to Purpose, wea Joseph Johnson raetem, 1871.
HAO nao man savve lane for garem love? Waswe, hem thru long wei for studyim mind? Waswe, hem thru long wei for readim olketa buk for helpem man kamap moabeta? Waswe, hem thru long wei for lukim olketa movie abaotem love? Nomoa. Olketa man firstaem lane for garem love thru long example and training bilong parents bilong olketa. Olketa pikinini bae lanem mining bilong love sapos living bilong olketa hem loving and olketa lukim parents bilong olketa feedim and protectim olketa, story witim olketa, and barava interest long olketa wanwan. And tu olketa lane for garem love taem parents teachim olketa for obeyim olketa gudfala principle wea showimaot wanem nao stret and rong.
Trufala love hem no just wei for showimaot feeling. Trufala love hem olowe duim best samting for olketa narawan, nomata sapos olketa no tinghae long datfala samting long datfala taem, diswan hem tru planti taem saed long olketa pikinini taem olketa kasem loving discipline. Wanfala perfect example bilong man wea showimaot love wea no selfish hem nao Creator. Aposol Paul raet olsem: “Son bilong mi, no ting daonem discipline wea Jehovah givim, and no wikdaon taem hem stretem iu; from man wea Jehovah lovem hem disciplinem.”—Hebrews 12:5, 6.
Parents, hao nao iu savve followim example bilong Jehovah for showimaot love long famili bilong iu? And hao important nao example wea iu showimaot olsem hasband and waef?
Teachim Love Thru Long Example
Sapos iu wanfala hasband, waswe iu tinghae long waef bilong iu and deal witim hem long wei wea showimaot honor and respect? Sapos iu wanfala waef, waswe iu lovem and saportim hasband bilong iu? Bible sei hasband and waef mas garem love and respect for each other. (Ephesians 5:28; Titus 2:4) Taem olketa duim olsem olketa pikinini savve lukim wei bilong Christian love. Datwan hem wanfala strongfala and important leson!
Parents savve apim love insaed famili taem olketa followim olketa hae standard for famili saed long hapitaem, fasin, olketa goal and olketa samting wea important. Evriwea long world, pipol lukim hao Bible hem barava helpem olketa for garem olketa hae standard for famili, diswan hem pruv hao Bible “hem kam from God and hem gud for teach, for givim kaonsel, for stretem evri samting, for givim discipline long raeteous fasin.” (2 Timothy 3:16) Tru nao, nomata insaed long Sermon Long Maunten nomoa iumi savve faendem olketa teaching saed long fasin and tu olketa point for helpem iumi long laef wea planti tingim olketa barava nambawan.—Matthew, chapter 5 go kasem 7.
Taem full famili depend long God for leadim olketa and taem olketa followim standard bilong hem, each wan insaed famili savve feel sef and olketa pikinini savve growap for garem love and respect for parents bilong olketa. Long difren wei, taem wanfala famili garem dabol, rongfala, or olketa olabaot standard, olketa pikinini maet konfius, kamap kros, and bighed.—Romans 2:21; Colossians 3:21.
Waswe long parents wea no garem partner? Waswe, olketa bae fit for teachim olketa pikinini bilong olketa for garem love? Yes olketa fit. Nomata no eni samting hem winim wei wea wanfala mami and dadi waka gud tugeta, pruv stap wea showimaot hao sapos famili hem garem gudfala wei for fren tugeta hem savve win nomata wanfala partner hem no stap. Sapos iu wanfala dadi or mami wea no garem partner, trae hard for followim olketa Bible principle insaed famili bilong iu. Tru nao, wanfala proverb hem sei: “Trustim Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae stretem gogo bilong iu”—insaed diswan tu hem waka bilong wanfala dadi or mami.—Proverbs 3:5, 6; James 1:5.
Planti nambawan young pipol big kam insaed famili wea garem dadi or mami nomoa and olketa go ahed for servem God long faithful wei long planti thousand Christian kongregeson bilong Olketa Jehovah’s Witness evriwea long world. Diswan hem pruv wea showimaot hao olketa dadi and mami wea no garem partner tu savve win for teachim olketa pikinini bilong olketa for garem love.
Hao Iumi Evriwan Savve Mekem Grow Love
Bible talem hao long “olketa last day” bae pipol “no garem love,” diswan minim pipol bae no garem love wea evri famili member shud garem. (2 Timothy 3:1, 3) Bat, olketa wea big kam insaed famili wea no garem love olketa tu savve lane for mekem grow love. Long wanem wei? Thru long wei for lane from Jehovah, wea hem nao Start bilong love and hem showimaot love long evriwan wea tan go long hem witim full heart. (1 John 4:7, 8) Wanfala man for raetem psalm hem sei: “Sapos dadi bilong mi and mami bilong mi lusim mi, Jehovah nao bae keepim mi.”—Psalm 27:10.
Jehovah showimaot love bilong hem for iumi long planti difren wei. Insaed diswan hem wei wea, olsem wanfala dadi, God hem leadim iumi thru long Bible, holy spirit wea helpem iumi, and loving saport from olketa Christian brata and sista. (Psalm 119:97-105; Luke 11:13; Hebrews 10:24, 25) Tingim wei wea thrifala samting hia wea hem provaedem savve helpem iumi for mekem grow love bilong iumi for God and olketa neiba.
Olsem Wanfala Dadi God Leadim Iumi
For mekem grow klos wei for fren witim samwan, iumi mas savve gud long hem. Jehovah invaetem iumi for kam klos long hem taem hem showimaot hemseleva long iumi insaed olketa page bilong Bible. Bat, wei for readim Bible nomoa hem no inaf. Iumi mas followim olketa teaching bilong hem and kasem gud samting from datwan. (Psalm 19:7-10) Isaiah 48:17 hem sei: “Mi, Jehovah, mi nao God bilong iufala, Datwan wea teachim iufala for kasem gud samting for iufala seleva, Datwan wea mekem iufala followim road wea iufala mas wakabaot long hem.” Yes, Jehovah, wea hem nao love, hem teachim iumi for kasem gud samting for iumi—no bikos hem laek for satem freedom bilong iumi thru long wei for putim planti law.
Stretfala savve abaotem Bible hem savve helpem iumi tu for mekem grow love for olketa narawan. Diswan hem from Bible truth hem teachim iumi tingting bilong God abaotem olketa man and hem showim iumi olketa principle wea iumi shud followim taem iumi deal witim each other. Kaen information olsem hem strongfala faondeson for mekem grow love for neiba. Aposol Paul hem sei: “Diswan nao mi go ahed for prea for hem, for love bilong iufala evritaem kamap moa big long stretfala savve and fasin for luksavve evribit.”—Philippians 1:9.
For showimaot hao “stretfala savve” hem leadim love, tingim example bilong datfala main truth wea stap long Acts 10:34, 35: “God hem no saed witim eniwan, bat long evri nation man wea fraet long hem and duim raeteous fasin nao hem acceptim.” Sapos God judgem pipol from raeteous fasin bilong olketa and wei wea olketa fraet long God, and no from kantri or kala skin bilong olketa, iumi tu shud ting long olketa narawan long sem wei olsem.—Acts 17:26, 27; 1 John 4:7-11, 20, 21.
Love—Frut Bilong Spirit Bilong God
Olsem wei wea rain wea kam long barava taem savve mekem olketa frut tree garem gud frut, spirit bilong God savve mekem olketa wea willing for acceptim diswan garem olketa fasin wea Bible kolem “frut bilong spirit.” (Galatians 5:22, 23) Main frut nao hem love. (1 Corinthians 13:13) Bat hao nao iumi savve kasem spirit bilong God? Prea nao hem wanfala important wei. Sapos iumi prea for spirit bilong God, hem bae givim long iumi. (Luke 11:9-13) Waswe, iu “go ahed” for prea for holy spirit? Sapos iu duim diswan, then olketa spesol frut bilong hem, insaed diswan hem love, bae showaot moa and moa long laef bilong iu.
Bat wanfala narakaen spirit hem stap wea waka againstim spirit bilong God. Bible kolem diswan “spirit bilong world.” (1 Corinthians 2:12; Ephesians 2:2) Hem wanfala wicked paoa, and hem kam from Devil Satan, “ruler bilong disfala world” bilong olketa man wea stap farawe from God. (John 12:31) Olsem wind wea savve mekem dust and rabis flae olabaot, “spirit bilong world” mekem kamap olketa nogud fasin wea savve spoelem love and wea satisfaem nomoa samting wea body laekem.—Galatians 5:19-21.
Pipol savve garem datfala wicked spirit taem olketa aftarem olketa material samting, garem wei for mista-mi, garem raf fasin, and tu diskaen rong tingting abaotem love wea planti pipol long world distaem garem. Sapos iu want for mekem grow trufala love, iu mas strong for againstim spirit bilong disfala world. (James 4:7) Bat, iu mas no trustim strong bilong iuseleva; askem Jehovah for help. Spirit bilong hem—barava strongfala paoa winim eniwan long universe—savve strongim iu and mekem iu win.—Psalm 121:2.
Lanem Love From Olketa Christian Brata
Long sem wei wea pikinini lane from famili bilong hem for showimaot love, iumi evriwan—young and olo—savve mekem grow love taem iumi kaban witim olketa nara Christian. (John 13:34, 35) Tru nao, wanfala main waka bilong Christian kongregeson hem nao for provaedem ples wea iumi wanwan savve “muvim each other for showimaot love and gudfala waka.”—Hebrews 10:24
Insaed world wea no garem love samfala maet “garekil and stap olabaot” and olketa hia bae barava tinghae long diskaen love. (Matthew 9:36) Planti experience showimaot hao wei for garem olketa loving fren taem man full-grown savve helpem hem winim olketa nogud samting wea kamap from wei for no garem love taem hem pikinini. Dastawe, hem important for evri Christian wea dedicate for showimaot trufala loving wei for welkamim olketa niu wan wea kam!
“Love Hem Nating Savve Fail”
Bible sei “love hem nating savve fail.” (1 Corinthians 13:8) Hao nao olsem? Aposol Paul talem iumi: “Love hem long-safaring and kaen. Love hem no jealous, hem no tok praod, hem no bighed, hem no duim fasin wea no fitim, hem no luk aotem samting bilong hemseleva nomoa, hem no savve kros. Hem no keepim record bilong rong wea samwan duim.” (1 Corinthians 13:4, 5) Hem klia tumas hao diswan hem no wanfala idea nating or wanfala feeling nomoa. Nomoa nao—olketa wea showimaot diswan olketa savve and minim olketa samting long laef wea savve mekem iumi wiki and feel pain, bat olketa no letem diswan for spoelem love bilong olketa for narawan. Tru nao, kaen love olsem hem “perfect wei for keepim wan mind.”—Colossians 3:12-14.
Tingim example bilong wanfala Christian girl long Korea wea kasem 17 year. Taem hem start for servem Jehovah God, famili bilong hem no hapi long hem so hem mas muv aot from haos. Nomata olsem, winim wei for feel kros, hem prea abaotem diswan and letem spirit and Word bilong God for leadim tingting bilong hem. Bihaen datwan, hem raet long famili bilong hem olowe and planti taem hem talemaot trufala loving feeling wea hem garem for olketa. From diswan, tufala big brata bilong hem start for studyim Bible and distaem olketa kamap olketa Christian wea dedicate. And tu mami and smol brata bilong hem gogo acceptim Bible truth. And gogo, dadi bilong hem wea barava againstim hem, hem changem tingting bilong hem. Datfala Witness girl raet olsem: “Mifala evriwan maritim olketa nara Christian, and distaem 23 member bilong famili bilong mifala wan mind long worship.” Love hem barava win!
Waswe, iu laek for mekem grow trufala love and helpem olketa narawan for duim datwan tu? Then tan go long Jehovah, datwan wea Start bilong datfala spesol fasin. Yes, barava followim Word bilong God, prea for holy spirit, and evritaem kaban witim olketa Christian brata. (Isaiah 11:9; Matthew 5:5) Hem mekem hapi heart bilong iumi hapi taem iumi savve hao klosap nao olketa wea wicked bae finis and olketa wea showimaot trufala Christian love nomoa bae stap! Tru nao, love hem key for kasem hapi and laef.—Psalm 37:10, 11; 1 John 3:14.
[Piksa long page 6]
Prea and wei for studyim Word bilong God bae helpem iumi for mekem grow trufala love