Tru Worship Joinim Wanfala Famili Tugeta

MARIA hem 13 year taem wanfala relative story long hem and smol sista bilong hem Lucy abaotem Jehovah. Hem explainim tu hope for stap long Paradaes earth. From tufala barava interest, tufala go witim datfala relative long Kingdom Hall bilong Olketa Jehovah’s Witness. Kliafala instruction wea Maria herem long there barava muvim hem. Hem barava difren from service long church bilong tufala, wea main samting hem for singsing nomoa! Stretawe Maria and Lucy start for studyim Bible witim wanfala Jehovah’s Witness.

Big brata bilong tufala, Hugo, hem interest long olketa idea and tingting bilong man and evolution. Hem biliv no eni God stap. Bat taem hem serve long army, hem readim buk Life—How Did It Get Here? By Evolution or by Creation? a Hem faendem olketa ansa long olketa kwestin wea no eni nara religion savve ansarem. Taem hem finisim service bilong hem long army, hem start for strongim niufala faith bilong hem long God long wei for studyim Bible and attendim olketa meeting witim olketa sista bilong hem. Bihaen tufala year from taem tufala herem truth, Maria and Lucy baptaes long 1992, and brata bilong tufala baptaes tufala year bihaen datwan.

Long semtaem, parents bilong olketa barava hol strong long olketa Catholic biliv, and no interest long truth bilong Bible. Olketa ting nogud abaotem Olketa Jehovah’s Witness, nomata olketa tinghae long olketa young Witness wea savve kam witim tufala pikinini bilong olketa long haos wea olketa garem gud fasin and gudfala wei for werem kaleko. And tu, long taem bilong kaikai, taem olketa pikinini tok abaotem olketa samting wea olketa lanem long meeting, datwan mekem parents bilong olketa start for interest.

Nomata olsem, parents bilong olketa interest long kastom magic. Dadi bilong olketa hem man for drunk and savve hitim mami bilong olketa. Famili bilong olketa barava klosap for brekdaon nao. Long datfala taem, dadi hia hem stap long prison for tufala week from hem drunk and duim samfala fasin wea no stret. Taem hem insaed prison, hem start for readim Bible. Taem hem read, hem lukim toktok bilong Jesus abaotem saen bilong olketa last day. From dadi and mami konfius, tufala go long Kingdom Hall and acceptim wanfala hom Bible study. Taem tufala lanem truth, olketa distroem evri buk bilong tufala abaotem kastom magic and olketa demon finis for attakim olketa taem olketa singaot long nem bilong Jehovah. Tufala start for changem planti samting saed long fasin bilong tufala tu.

Tingim feeling bilong Maria and Lucy taem tufala lukim Hugo baptaesim parents bilong olketa long wanfala distrik convention long Bolivia long 1999. Diswan happen naenfala year bihaen Maria and Lucy first here abaotem Jehovah and olketa promis bilong hem. Distaem Hugo and tufala sista bilong hem olketa insaed long full-taem ministry. Olketa barava hapi tumas trufala worship joinim tugeta famili bilong olketa!

[Footnote]