Waswe, Wanfala ‘Tru Church’ Nomoa Stap?

“FROM wanfala Christ nomoa stap, so wanfala body bilong Christ nomoa stap, wanfala Bride bilong Christ nomoa: ‘wanfala Catholic Church wea start kam from olketa aposol.’”—Dominus Iesus.

Datwan nao wei wea wanfala Roman Catholic cardinal, Joseph Ratzinger, hem explainim teaching bilong church bilong hem abaotem wei wea wanfala tru church nomoa stap. Hem sei datfala church hem “Church bilong Christ wea hem wanfala nomoa, hem nao datfala Catholic Church.”

“Olketa No Olketa Really Church”

Nomata Pope John Paul II strong for sei datfala Dominus Iesus hem “no for sei olketa nao gud winim, or no minim olketa no respectim olketa nara religion,” olketa leader bilong Protestant church barava feel nogud long diswan. Olsem example, long datfala Presbyterian General Assembly long Belfast, Northern Ireland, long June 2001, wanfala minister hem sei datfala pepa hem kamap from wanfala “strongfala sekson insaed Roman Catholic Church . . . wea fraet tumas long wei wea Vatican II encouragem church for herem and acceptim olketa niu idea.”

Robin Eames, bishop bilong Church of Ireland, hem sei hem bae “barava feel nogud” sapos datfala pepa hem minim “wei for tan bak long kaen tingting wea Catholic Church garem bifor datfala Vatican II.” Taem hem story abaotem wei wea Vatican sei olketa church wea rejectim samfala Catholic teaching “olketa no olketa really Church,” Eames hem sei: “Long tingting bilong mi datwan hem tok daonem olketa nara church.”

Wanem nao muvim olketa for mekem datfala Dominus Iesus? Luk olsem olketa bilong Roman Catholic Curia wari abaotem kaen tingting for sei religion hem depend long man wanwan and olketa teaching bilong religion savve change. The Irish Times hem sei hao “from kaen tingting wea kamap wea sei evri religion hem gud. . . hem barava mekem Cardinal Ratzinger wari tumas.” Luk olsem disfala tingting nao hem muvim hem for talem toktok abaotem hao wanfala tru church nomoa stap.

Waswe, Hem Important Wanem Church Nao Iu Joinim?

Tru nao, samfala tingse, kaen tingting for sei olketa teaching bilong religion savve change or evri religion hem gud, hem nao stret and olketa laekem diswan winim wei for sei wanfala tru church nomoa stap. Long tingting bilong olketa, religion hem shud samting wea man wanwan nao chusim. Olketa sei, ‘really hem no important wanem church iu joinim.’

Datwan maet luk olsem gudfala wei for tingting—nomata wanfala main samting wea kamaot from diswan hem nao wei wea olketa religion divaed and kamap planti difren sismol sekson. Planti ting, ‘wei wea planti difren religion stap hem wanfala gudfala wei for showimaot freedom bilong man wanwan.’ Bat Steve Bruce, wanfala man for raet, hem ting, kaen “wei for acceptim evri religion” hem really showimaot wei for “no interest long religion.”—A House Divided: Protestantism, Schism, and Secularization.

So wanem nao stretfala wei for tingting long diswan? Waswe, wanfala tru church nomoa stap? Waswe, hem nao Roman Catholic Church? Waswe, God bae willing for acceptim olketa nara church tu? From olketa kwestin hia hem join witim wei wea iumi fren witim Creator, hem important for savve long tingting bilong hem abaotem diswan. Hao nao iumi savve duim datwan? Thru long wei for lukluk long Word bilong God, Bible. (Acts 17:11; 2 Timothy 3:16, 17) Bae iumi lukim wanem nao hem teachim iumi abaotem disfala topic bilong wanfala tru church.