Story wea Muvim Man for Garem Faith and Fasin for No Fraet​—Olketa Jehovah’s Witness Long Ukraine

OLSEM olketa Christian long first century kasem persecution, hem semsem tu witim pipol bilong God distaem. (Matthew 10:22; John 15:20) No staka ples kasem persecution wea go ahed for longfala taem or ova tumas winim long Ukraine, wea olketa tambuim Kingdom-preaching waka for 52 year.

Datfala 2002 Yearbook of Jehovah’s Witnesses story abaotem pipol bilong God long datfala kantri. Hem storyim faith, fasin for no fraet, and strong taem olketa feisim barava bigfala wei for safa. Long hia hem samfala koment bilong olketa wea tinghae long diswan and raetem leta go long branch office bilong Olketa Jehovah’s Witness long Ukraine:

“Mi readim finis nao 2002 Yearbook. Mi krae taem mi read abaotem waka bilong iufala long Ukraine. Mi laekem iufala for savve hao mi kasem bigfala encouragement from gudfala example and strong faith bilong iufala. Mi hapi tumas from iumi evriwan insaed disfala sem spiritual famili. Mi laek sei thankiu from full heart bilong mi!”—Andrée, France.

“Mi no savve hao for sei thankiu long iufala and Jehovah for disfala 2002 Yearbook. Mi krae taem mi readim planti experience bilong olketa brata wea young and strong stap long prison and concentration camp. Mi tinghae tumas long fasin bilong olketa for no fraet. Nomata mi wanfala Witness for 27 year, mi savve still lanem samting from olketa brata and sista hia. Olketa strongim faith bilong mi long Dadi bilong iumi long heven, Jehovah.”—Vera, kantri wea Yugoslavia bifor.

“Mi raetem disfala leta witim hapi from gudfala example bilong wei wea iufala stand strong and faithful for planti year wea pipol againstim iufala. Wei wea iufala trustim evribit Jehovah and disaed strong for stap faithful bringim honor long iufala. And tu, taem iufala go ahed for stand strong long olketa test strongim biliv bilong mi hao Jehovah no savve lusim pipol bilong hem. From gudfala example bilong iufala long wei for no fraet, stand strong, and no givap, diswan mekem mifala for acceptim olketa smol problem wea mifala kasem.”—Tuteirihia, French Polynesia.

“Bihaen mi readim datfala Yearbook, mi mas raetem disfala leta long iufala. Evri experience hia barava encouragem mi. Mi hapi tumas from mi member bilong wanfala organization wea loyal, garem wan mind, and wea wanfala loving Dadi saportim and strongim iumi long taem iumi needim. Mi sorre from planti servant bilong Jehovah wea no fraet and strong safa tumas and dae. Bat mi hapi tu from olketa strong and no fraet, wea mekem planti pipol lanem truth and savve long loving Dadi bilong iumi.”—Colette, Netherlands.

“Mi and waef bilong mi mas raet for sei hao hem barava muvim mitufala taem mifala readim story abaotem Ukraine long Yearbook. Iufala faithful brata showimaot nambawan example for go ahed strong nomata diswan go ahed for longfala taem and barava hard. For fitim toktok long Proverbs 27:11, Jehovah mas barava hapi for savve hao planti faithful brata long Ukraine keepim faithful fasin nomata long olketa nogud samting wea Devil duim.”—Alan, Australia.

“Mi krae taem mi read abaotem olketa brata long Ukraine. Olketa go ahed strong long planti samting—planti year long prison, spoelem olketa long nogud wei, kasem bigfala hevi, separate from famili. Mi laek for talem evri brata wea still serve long olketa kongregeson hao mi lovem and barava respectim olketa. Mi hapi tumas from olketa no fraet and no givap. Mi savve spirit bilong Jehovah nao strongim olketa. Jehovah hem klos long iumi and laek for helpem iumi.”—Sergei, Russia.

“Mi krae taem mi readim 2002 Yearbook. Long kongregeson bilong mifala planti sista and brata story abaotem iufala. Iufala barava spesol. Mi hapi tumas for stap insaed disfala big spiritual famili.”—Yeunhee, South Korea.

“Disfala record bilong faith bilong iufala barava muvim heart bilong mi, from iufala stand strong and showimaot trufala love for Jehovah and Kingdom bilong hem. Samfala taem mifala forget for tinghae long freedom wea mifala garem and planti spiritual kaikai wea Jehovah provaedem. Bat, iufala no olsem. Faithful example bilong iufala helpem mifala for luksavve hao sapos iumi garem klos wei for fren witim God, hem savve strongim iumi for deal witim olketa difren kaen test.”—Paulo, Brazil.

“Mi garem privilege for readim olketa experience bilong iufala long 2002 Yearbook. Hem barava muvim heart bilong mi, especially experience bilong Sista Lydia Kurdas. Hem olsem mi fren witim hem long klos wei.”—Nidia, Costa Rica.

“Tuday mi readim finis 2002 Yearbook. Hem strongim faith bilong mi long Jehovah. Mi bae no savve forgetim disfala story wea samfala plantim seed bilong daot abaotem olketa wea lead. Hem teachim mi for no daotem olketa brata wea lead. Barava bigfala thankiu! Disfala spiritual kaikai strongim faith and redyim iumi for taem wea faith bilong iumi bae kasem test.”—Leticia, United States.

“Mifala sei thankiu for datfala nambawan Yearbook. Hem firstaem for planti pablisa read abaotem waka bilong olketa brata long Ukraine. Olketa brata hia kasem strong from diswan. Planti young wan mekem service bilong olketa moa big saed long preaching waka. Samfala start for regular or auxilary pioneer. Evriwan kasem encouragement from olketa story bilong olketa brata and sista wea servem Jehovah long taem olketa tambuim preaching waka long hia.”—Wanfala kongregeson service komiti, Ukraine.

Faithful fasin bilong olketa brata long Ukraine barava encouragem pipol bilong Jehovah evriwea long world. Tru nao, for evritaem readim olketa story wea muvim heart long Yearbook bilong each year hem nambawan wei for strongim faith and fasin for go ahed strong long disfala important taem distaem.—Hebrews 12:1.