Waswe, Iu Savve Biliv Long Wanfala Paradaes Earth?
SAMFALA pipol nomoa biliv hao disfala earth bae kamap paradaes. Planti pipol ting earth bae no go ahed for stap. Olsem datfala buk, The Sacred Earth, bilong Brian Leigh Molyneaux talem, disfala earth stap only bikos long ‘wanfala big bosta’ planti million year bifor. And sapos man no distroem earth, planti bilivim hao earth and full universe maet gogo “bae bone and finis evribit.”
John Milton, man from England wea raetem poetry long mek-17 century no garem datkaen tingting. Long poem bilong hem, Paradise Lost, hem sei dat God creatim earth for kamap paradaes hom for famili bilong olketa man. Datfala Paradaes bilong firstaem hem lus. Bat, Milton bilivim hao hem bae stap moa—hao wanday Jesus Christ bae baem bak and “rewardim faithful pipol bilong hem, and mekem olketa barava hapi . . . long Heven or long Earth.” Milton barava sure long diswan and sei: “Long datfala taem Earth bae kamap Paradaes.”
Paradaes—Long Heven or Long Earth?
Planti lotu pipol garem semkaen tingting olsem Milton hao olketa bae kasem reward from olketa go ahed stand strong, nomata olketa safa long bigfala wei long earth. Bat long wea nao olketa bae kasem datfala reward? Waswe, hem bae long “Heven or Earth”? Samfala pipol ting hao hem bae no long earth. Olketa sei pipol bae kasem “barava hapi” only bihaen taem olketa lusim earth and stap long ples bilong olketa spirit long heven.
Long buk Heaven—A History, wea C. McDannell and B. Lang raetem, tufala sei savveman bilong religion long mek-tu century, Irenaeus, bilivim hao laef insaed wanfala paradaes wea kamap moa “bae no long wanfala farawe ples long heven, bat long earth.” Datfala buk talem hao nomata olketa leader bilong religion olsem John Calvin and Martin Luther hope for go long heven, olketa bilivim tu hao “God bae mekem earth kamap niu.” Olketa member bilong nara religion garem semkaen biliv. McDannell and Lang sei tu hao samfala Jew pipol bilivim hao long taem wea God markem, evri hardfala samting wea olketa man feisim “bae finis evribit and pipol bae garem laef long earth wea garem mining and wea mekem olketa feel satisfae.” The Encyclopaedia of Middle Eastern Mythology and Religion sei pipol bilong Persia bifor garem biliv hao “earth bilong firstaem wea hem wanfala paradaes bae kamap moa and pipol bae stap bak moa long peace.”
Wanem nao happen long hope for paradaes earth? Waswe, laef bilong iumi long earth hem for shortfala taem nomoa? Olsem tingting bilong first-century savveman bilong olketa Jew, Philo Judaes bilivim, waswe, laef hem for “shortfala taem, and planti taem hem fulap witim olketa nogud samting” long wanfala gogo for ples bilong olketa spirit? Or waswe, God garem difren purpose taem hem creatim earth and putim olketa man insaed paradaes? Waswe, olketa man savve kasem trufala spiritual wei for satisfae and hapi laef hia long earth? Hem gud for lukluk gud long wanem nao Bible talem abaotem disfala subject. Maet iu agree witim winim 6 million pipol wea garem disfala hope, hao hem fitim for iu hope long wanfala paradaes earth wea bae kamap moa.
[Piksa long page 3]
Man for raetem poetry, John Milton, bilivim hao Paradaes bae kamap moa
[Piksa Credit Line long page 2]
COVER: Earth: U.S. Fish & Wildlife Service, Washington, D.C./NASA
[Olketa Piksa Credit Line long page 3]
Earth: U.S. Fish & Wildlife Service, Washington, D.C./NASA; John Milton: Leslie’s