‘God No Stap Long Olketa Temple wea Man Wakem Long Hand’
APOSOL Paul mas savve gud long olketa temple bilong Athena, from hem mas lukim planti long olketa taem hem travel long olketa missionary gogo bilong hem. Olsem The Encyclopædia Britannica talem, woman god Athena hem no god bilong war and wisdom nomoa bat tu “bilong wei for wakem olketa samting and olketa nara waka wea kamap taem peace stap.”
Main temple bilong Athena nao Parthenon, wea olketa buildim long Athens, taon wea olketa nemem followim datfala woman god. Tingim wanfala long olketa nambawan temple long taem bifor, Parthenon temple wea garem wanfala gold-and-ivory image bilong Athena, wea hem 12 meter. Taem Paul visitim Athens, disfala white temple wea olketa wakem from ston hem wanfala main building long datfala taon for 500 year finis.
Long ples wea Paul preach long olketa man bilong Athens abaotem ‘God wea no stap long olketa temple wea man wakem long hand,’ olketa savve lukim go nomoa datfala Parthenon temple. (Acts 17:23, 24) Maet glory bilong datfala temple bilong Athena and olketa nambawan idol bilong hem mekem samfala wea lisin long Paul tinghae long Athena winim wanfala God wea olketa no savve lukim wea olketa no savve long hem. Olsem Paul showimaot, olketa shud no ting long Creator bilong man “olsem gold or silver or ston, samting wea man . . . wakem.”—Acts 17:29.
Olketa god and olketa woman god olsem Athena—wea depend long olketa temple and idol for glory—olketa savve stap for lelebet taem and lus tu. Datfala idol bilong Athena hem lus from Parthenon temple long mek-faev century C.E., and samfala samting bilong olketa temple bilong hem nomoa stap. Long distaem, no eniwan luk for wisdom and help from Athena.
Datwan hem barava difren witim Jehovah, datfala “God bilong olowe” wea man no savve lukim enitaem. (Romans 16:26; 1 John 4:12) Olketa son bilong Korah raet olsem: “Disfala God hem God bilong mifala for olowe, barava olowe. Hemseleva bae leadim iumi.” (Psalm 48:14) Wanfala wei for enjoyim wei wea Jehovah God lead hem for studyim Word bilong hem, Bible, and strong for followim kaonsel bilong hem long laef bilong iumi.