Laef Story

Kasem Loving-Kaeness and Kea Bilong Jehovah

STORY BILONG FAY KING

Parents bilong mi olketa kaen pipol, bat olsem planti nara pipol, tufala les tumas long religion. Mami savve sei olsem: “Wanfala God mas stap, from sapos nomoa hu nao wakem olketa flaoa and olketa tree?” Bat datwan nomoa tingting bilong hem abaotem religion.

DADI dae long 1939 taem mi 11 year, and mi stap witim mami long Stockport, long south saed bilong Manchester, England. Mi bin laek for savve moa abaotem Creator and mi respectim Bible, nomata mi no savve eniting abaotem Bible. So, mi disaed for joinim Church of England for lukim wanem nao hem teachim.

Mi nating minim nomoa eniting long datfala church service, bat taem olketa readim olketa Gospel, toktok bilong Jesus mekem mi bilivim hao Bible mas tru. Taem mi ting go bak, mi no savve why nao mi no readim Bible. Nomata bihaen datwan, taem wanfala fren bilong famili bilong mifala givim mi wanfala “New Testament” long transleison bilong distaem, mi nating readim.

Datfala Korean War wea start long 1950 mekem mi for barava tingting. Waswe, datfala war bae kasem planti difren kantri olsem World War II? Sapos datwan happen, hao nao mi savve obeyim komand bilong Jesus for lovem olketa enemy bilong mi? Long narasaed, waswe, mi bae stap kwaet nomoa and lukluk taem pipol attakim kantri bilong mi and mi no stopem olketa? Sapos mi duim datwan, mi bae ranawe nao from responsibility bilong mi. Nomata mi konfius, mi sure hao evri ansa for olketa kwestin bilong mi hem stap insaed long Bible, nomata mi no garem idea long hao or wea for faendem.

Luk Aotem Truth Long Australia

Long 1954 mi and mami disaed for muv go long Australia, ples wea sista bilong mi Jean hem stap. Samfala year bihaen, Jean talem mi hao hem askem Olketa Jehovah’s Witness for visitim mi from hem savve mi interest long Bible and mi savve gogo long church. Hem laek for savve long tingting bilong mi abaotem Olketa Jehovah’s Witness. Hem sei long mi: “Mi no savve sapos wanem olketa explainim hem stret or nomoa, bat olketa garem olketa ansa, wea hem winim wanem olketa church garem.”

Wanfala naesfala hasband and waef, Bill and Linda Scheider, visitim mi. Tufala bin Jehovah’s Witness for planti year and tufala winim 60 year. Tufala waka bifor long radio station bilong Olketa Jehovah’s Witness long Adelaide, and taem gavman tambuim preaching waka long Australia long World War II, tufala joinim waka for preach full-taem. Nomata Bill and Linda helpem mi, mi still laek lukluk long olketa difren religion.

Wanfala wakfren tekem mi go long wanfala meeting bilong wanfala man for preach, Billy Graham, and bihaen datwan samfala long mifala askem olketa kwestin long wanfala bigman bilong church. Mi askem kwestin wea mi still tingting abaotem: “Hao nao iu savve sei iu wanfala Christian and lovem olketa enemy bat iu go long war and killim dae pipol?” Evriwan wea hipap barava singaot big from olketa tu bin tingting abaotem datfala kwestin! Bihaen lelebet taem, datfala bigman sei: “Mi no savve ansarem datfala kwestin. Mi tingting raonem yet.”

Long semtaem, mi go ahed studyim Bible witim Bill and Linda, and long September 1958, mi baptaes. Mi disaed for followim example bilong Bill and Linda, so long August 1959, mi kamap regular pioneer, wanfala wea talemaot gud nius full-taem. Bihaen eitfala month mi kasem invitation for kamap spesol pioneer. Mi hapi tumas for savve hao sista bilong mi, Jean, muv ahed long study bilong hem tu and hem baptaes!

Wanfala Door Hem Open

Mi serve long wanfala kongregeson long Sydney and conductim planti hom Bible study. Wanday mi meetim wanfala bigman bilong Church of England wea finis waka and askem hem tingting bilong church abaotem end bilong world. Nomata hem talem mi hao hem bin teachim olketa teaching bilong church for 50 year, mi sapraes for herem hem ansa olsem: “Mi bae needim taem for duim research for ansarem datwan bikos mi no savve gud long Bible olsem Olketa Jehovah’s Witness.”

No longtaem bihaen diswan, olketa ask for samfala volunteer for serve long Pakistan. Mi apply, bat mi no savve hao diswan hem for olketa singol man or hasband and waef nomoa. Hem luk olsem olketa sendem application pepa bilong mi long Brooklyn headquarter from kwiktaem nomoa mi kasem wanfala leta wea sei olketa needim wanfala volunteer long Bombay (distaem hem Mumbai), India, sapos mi laek acceptim. Diswan hem long 1962. Mi acceptim and stap long Bombay for 18 month bifor mi muv go long Allahabad.

Mi redyim mind for lanem Hindi languis. Hem no hard for lanem disfala Indian languis from spelling and saond bilong toktok semsem nomoa. Bat, mi savve feel nogud taem olketa haosholder askem mi for no trae hard long languis bilong olketa bat for tok English nomoa! Bat disfala niu kantri hem interesting and garem olketa challenge wea muvim man, and mi enjoyim wei for kaban witim olketa Christian brata and sista from Australia.

Taem mi young, mi tingting abaotem marit, bat bihaen mi baptaes, mi busy for servem Jehovah so mi no tingim moa. Bat, distaem, mi feelim need for garem wanfala fren. Bat mi no laek lusim assignment bilong mi long difren kantri, so mi prea abaotem diswan long Jehovah and no tingim moa.

Blessing wea Mi No Expectim

Long datfala taem, Edwin Skinner nao lukaftarem waka bilong branch long India. Hem attendim mek-eit class bilong Watchtower Bible Skul bilong Gilead long 1946 witim planti nara faithful brata, olsem Harold King and Stanley Jones, wea tufala serve long China.a Long 1958, olketa putim Harold and Stanley insaed prison wea stap separate from olketa nara prisoner from tufala preach long Shanghai. Taem Harold go free long 1963, Edwin raet go long hem. Bihaen Harold go bak long Hong Kong bihaen hem go long United States and Britain, hem ansarem leta and talem tingting bilong hem for marit. Hem talem Edwin hao hem prea abaotem diswan taem hem long prison, and hem askem Edwin sapos hem savve long eni Witness wea bae kamap wanfala gud waef.

Long India, planti pipol followim kastom wea nara pipol chusim hu nao olketa bae maritim, and staka taem pipol askem Edwin for duim diswan, bat evritaem hem chus for no duim datwan. So, hem givim leta bilong Harold long Ruth McKay, wea hasband bilong hem, Homer, hem traveling overseer. Gogo, Ruth raet long mi and sei wanfala missionary wea stap long truth for planti year luk aotem wanfala waef, and hem askem mi sapos mi interest for raet long hem. Hem no talem mi hu nao disfala brata or eniting moa abaotem hem.

No eniwan savve abaotem prea bilong mi for wanfala fren, Jehovah nomoa savve, and first samting wea mi tingim nao hem for rejectim datfala idea. Bat, taem mi ting raonem moa diswan, mi ting hao klosap evritaem Jehovah no savve ansarem prea bilong iumi long wei wea iumi tingim. So mi raet go bak long Ruth and sei sapos hem klia long datfala brata hao mi no promis for maritim hem, Ruth savve askem hem for raet long mi. Harold King raetem mek-tu leta bilong hem kam long mi.

Bihaen Harold free from prison long China, olketa piksa and story bilong hem stap long planti niuspepa and magasin. Long datfala taem, planti pipol raonem world savve long hem, bat record long faithful theocratic service bilong hem nao mi barava tinghae long hem. So mitufala raet long each other for faevfala month, and then mi go long Hong Kong. Mitufala marit long October 5, 1965.

Mitufala evriwan laek marit and stap insaed full-taem service, and from mifala gogo for olo, mitufala garem strongfala need for garem fren. Gogo, love bilong mi for Harold hem grow, and taem mi lukim wei wea hem kaen and tingim narawan taem hem deal witim pipol and olketa problem wea kamap insaed service bilong mifala, hem kasem deep respect bilong mi. For 27 year mifala enjoyim barava hapi marit and kasem planti blessing from Jehovah.

Pipol long China pipol for waka hard, and mi laekem olketa tumas. Long Hong Kong olketa iusim Cantonese languis, wanfala Chinese languis wea man need for changem voice long planti wei winim Mandarin languis so hem hard lelebet for lanem. Mitufala Harold startim marit laef bilong mitufala long missionary hom long branch office bilong Olketa Jehovah’s Witness, and then mitufala serve long olketa difren ples long Hong Kong. Tru nao, mitufala barava hapi, bat long 1976 mi garem bigfala problem saed long health.

Deal Witim Health Problem

Mi bin lusim staka blood for samfala month, and mi short long blood. Mi needim operation, bat olketa doctor long hospital sei hao olketa no savve duim operation wea no iusim blood bikos sapos olketa duim olsem mi maet dae from nomoa blood. Wanday taem olketa doctor story abaotem sik bilong mi, olketa nurse trae for mekem mi changem mind bilong mi, and sei mi shud no dae olsem nomoa. Long datfala day olketa bae duim 12-fala operation, 10-fala hem for killim dae baby insaed bele, bat mi lukim hao no eniwan tok againstim olketa babule woman wea killim dae baby.

Gogo, Harold raetem wanfala leta wea sei hospital bae no kasem blame sapos mi dae, so olketa doctor agree for duim operation. Olketa tekem mi go long rum for operation and redyim olketa medicine for mekem man sleep. Bat, long last minute nomoa, man for mekem man sleep no willing for duim datwan, so hospital sendem mi go bak long haos.

So mitufala go lukim wanfala doctor bilong olketa woman wea no waka witim datfala hospital. From hem luksavve sik bilong mi big tumas, hem willing for duim operation for lelebet selen nomoa​—⁠sapos mifala no talem eniwan haomas nao mifala peim hem. Hem win long datfala operation​—⁠and no iusim blood tu. Long datfala taem loving-kaeness and kea bilong Jehovah barava showaot klia long mitufala Harold.

Long 1992, Harold kamap sik fogud. Mitufala muv go long branch office and olketa lukaftarem mifala long loving wei. Loving hasband bilong mi dae long 1993 taem hem 81 year.

Go Bak Long England

Mi hapi for member bilong Hong Kong Bethel famili, bat mi faendem hard tumas for deal witim weather long there. Then mi kasem wanfala leta wea mekem mi sapraes from Brooklyn headquarters. From health bilong mi olketa askem mi sapos mi laek muv go long branch wea garem olketa samting saed long health for sik pipol. So, long year 2000, mi go bak long England and joinim Bethel famili long London. Diswan hem wanfala loving arrangement! Evriwan welkamim mi long kaenfala wei, and mi barava enjoyim olketa difren assignment, wea insaed diswan hem for klinim and keepim Bethel famili library wea garem 2,000 buk.

Mi kaban witim Chinese kongregeson long London, bat long hia olketa samting change. Distaem, samfala pipol nomoa kam from Hong Kong, bat planti from mainland bilong China. Olketa iusim Mandarin languis, and datwan mekem challenge kamap long preaching waka. Insaed long kantri olketa report showimaot planti interesting Bible study wea olketa conductim witim olketa student from China wea go ahed for skul bihaen olketa finisim hae skul. Olketa waka hard and tinghae long truth wea olketa lanem from Bible. Hem wanfala hapi samting for helpem olketa.

Long niu hom bilong mi wea kwaet, planti taem mi savve ting raonem hapi laef bilong mi and go ahed sapraes long loving-kaeness bilong Jehovah. Disfala fasin hem part long evriting wea join witim purpose bilong hem, and wei wea hem kea for olketa servant bilong hem barava showaot klia. Mi garem planti reason for sei thankiu long evri loving kea bilong hem for mi.​—⁠1 Peter 5:​6, 7.

[Footnote]

[Piksa long page 24]

Serve long India

[Piksa long page 25]

Harold King long 1963 and taem hem serve long China long olketa year bilong 1950

[Piksa long page 26]

Day mitufala marit long Hong Kong, October 5, 1965

[Piksa long page 26]

Witim olketa member bilong Hong Kong Bethel, long midol hem Brata and Sista Liang, and long right saed hem Brata and Sista Gannaway