Comfort for Olketa wea Kasem Trabol
TAEM olketa faithful man and woman bifor safa from olketa problem, long strongfala wei olketa prea long God for help. Nomata olsem, olketa duim samting tu for daonem wei wea olketa safa, olsem wei for iusim gudfala tingting for stap klia long samting wea kosim datwan. Olsem example, for depend long Jehovah witim wei wea man seleva waka hard, hem helpem David for stand strong long problem wea kasem hem. Waswe long iumi distaem?
Taem iu safa long wanfala samting, iu maet start for duim samting for stretem problem bilong iu. Olsem example, sapos iu no garem waka, waswe, iu trae hard for luk aotem wanfala waka wea fitim, wea bae sapotim iu and famili bilong iu? (1 Timothy 5:8) Or sapos iu safa from wanfala sik, waswe, iu bae luk aotem help wea fitim from wanfala doctor? Hem interesting hao Jesus, wea kasem paoa from God for healim evrikaen sik, talemaot hao ‘olketa wea sik needim wanfala doctor.’ (Matthew 9:12) Nomata olsem, olketa problem bilong iu maet no evritaem finis; maet for samfala taem iu need for go ahed for deal witim.
Waswe sapos iu prea abaotem datfala samting long Jehovah God? Olsem example, taem iumi luk aotem waka for selen, for prea and depend evribit long Jehovah bae helpem iumi for winim temptation for acceptim eni waka wea no agree witim Bible principle. Iumi bae stap klia tu long wei for “lusim faith” thru long greedy fasin or fasin for lovem selen. (1 Timothy 6:10) Tru nao, taem iumi mekem olketa important disison saed long waka for selen or famili or olketa wari saed long health, iumi savve followim encouragement bilong David: “Torowem hevi bilong iu long Jehovah, and hem nao bae strongim iu. Hem bae no letem raeteous wan for seksek.”—Psalm 55:22.
Prea wea kamaot from heart bae helpem iumi tu for balancem tingting bilong iumi mekem datfala problem no winim iumi. Olsem aposol Paul, wanfala tru Christian, hem raet: “Long evri samting thru long prea and wei for barava askem witim wei for sei thankiu, talem evri samting long God.” Long wanem wei nao prea savve comfortim iumi? “Peace bilong God wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:6, 7) Peace bilong God hem “winim evri tingting bilong man.” So, hem fit for mekem iumi stedy taem iumi garem staka wari. Hem bae ‘gardim heart and tingting bilong iumi,’ and helpem iumi for stap klia from wei for kwiktaem duim samting and long wei wea hem no wise, wea bae mekem wei for safa kamap moa big.
Prea savve mekem samfala change kamap saed long olketa problem wea kasem iumi. Taem aposol Paul kamap prisoner long Rome, long hambol wei hem askem olketa nara Christian for prea for hem. Why nao Paul askem diswan? Hem sei “Mi barava strong for askem iufala for duim diswan, mekem mi savve kwiktaem kam bak long iufala.” (Hebrews 13:19) Diswan minim, Paul savve hao Jehovah bae herem olketa prea bilong olketa narawan wea biliv and maet changem taem wea hem bae kamap free from prison.—Philemon 22.
Waswe, prea bae changem samting wea kamaot from problem wea mekem iumi feel nogud? Hem maet changem. Bat, iumi shud luksavve hao Jehovah God maet no ansarem prea bilong iumi long wei wea iumi laekem. Paul prea planti taem abaotem “nila long body” bilong hem, wea maet wanfala physical problem. Winim wei for finisim datfala problem, God talem Paul: “Kaeness bilong mi wea man no fit for kasem hem inaf for iu; bikos paoa bilong mi kamap perfect long man wea wik.”—2 Corinthians 12:7-9.
So, wei wea iumi safa maet no savve finis kwiktaem. Bat, bae hem givim iumi chance for pruvim wei wea iumi depend evribit long Dadi bilong iumi long heven. (James 1:2-4) Iumi savve sure hao nomata Jehovah God no finisim datfala problem, hem savve “mekem wei for iumi savve stand strong.” (1 Corinthians 10:13) Hem barava spesol hao Jehovah hem “God bilong evri comfort, wea comfortim iumi long evri trabol bilong iumi.” (2 Corinthians 1:3, 4) God savve givim iumi wanem iumi needim for stand strong, and iumi garem hope for laef olowe.
Word bilong God, Bible, promisim hao Jehovah “bae aotem krae from eye bilong olketa, and dae bae nomoa, sorre and singaot and pain bae nomoa tu.” (Revelation 21:3, 4) Waswe, hem hard for bilivim wanfala world wea free from wei for safa? Hem maet olsem, from iu bin deal witim problem olowe. Nomata olsem, God hem promisim hao iumi bae kamap free from fraet and bigfala trabol, and purpose bilong hem bae win—Isaiah 55:10, 11.
[Olketa Piksa long page 9]
Firstaem safa then kasem comfort